ବାହ୍ୟ ଚାପରେ କୋଭାକ୍ସିନକୁ ତରବରିଆ ଭାବେ ପ୍ରସ୍ତୁତ କରାଯାଇଥିବା ଖବରକୁ କମ୍ପାନିର ଖଣ୍ଡନ
ନୂଆଦିଲ୍ଲୀ : ରାଜନୈତିକ ଚାପ ଯୋଗୁଁ କରୋନାଭାଇରସ୍ ଟିକା କୋଭାକ୍ସିନକୁ ତରବରିଆ ଭାବେ ବଜାରକୁ ଛଡ଼ାଯାଇଥିଲା ବୋଲି ହୋଇଥିବା ଅଭିଯୋଗର ଉତ୍ତର ରଖିଛି ଭାରତ ବାୟୋଟେକ୍ । ଏକ ବୟାନ ଜାରି କରି କମ୍ପାନି ପକ୍ଷରୁ କୁହାଯାଇଛି ଯେ କୋଭାକ୍ସିନକୁ ବିକଶିତ କରିବାବେଳେ କୌଣସି ବାହ୍ୟ ଚାପ ପଡ଼ୁନଥିଲା । ପୁଣି ବାରମ୍ବାର ଟାର୍ଗେଟ୍ କରାଯାଉଥିବାରୁ କମ୍ପାନି ତାହାର ନିନ୍ଦା କରିଛି ।
Sambad is now on WhatsApp
Join and get latest news updates delivered to you via WhatsApp
କମ୍ପାନି ପକ୍ଷରୁ ଆହୁରି ମଧ୍ୟ କୁହାଯାଇଛି, “ଭାରତ ଏବଂ ସାରା ବିଶ୍ବର ଲୋକମାନଙ୍କୁ କୋଭିଡ ପ୍ରକୋପରୁ ବଞ୍ଚାଇବା ପାଇଁ କିପରି ଏକ ସୁରକ୍ଷିତ ଏବଂ ପ୍ରଭାବଶାଳୀ ଟିକା ବିକଶିତ କରାଯିବ” କେବଳ ସେହି ଚାପ କମ୍ପାନି ଉପରେ ଥିଲା ।
ଭାରତ ବାୟୋଟେକ୍ ଦୃଢୋକ୍ତି ପ୍ରକାଶ କରିଛି ଯେ “ସମଗ୍ର ଉତ୍ପାଦ ବିକାଶ ଏବଂ କ୍ଲିନିକାଲ୍ ଅଧ୍ୟୟନ ବିଶ୍ୱସ୍ତରୀୟ ନିର୍ଦ୍ଦେଶାବଳୀ ଅନୁଯାୟୀ କାର୍ଯ୍ୟକାରୀ କରାଯାଇଥିଲା ଏବଂ ତାହାକୁ ବିଶ୍ୱବ୍ୟାପୀ ଦାଖଲ କରାଯାଇଥିଲା । କୋଭାକ୍ସିନ ୨୦ଟି ପ୍ରି-କ୍ଲିନିକାଲ ଷ୍ଟଡି ଦେଇ ଗତିକରିଥିଲା । ଏହା ମଧ୍ୟରେ ୩ଟି ଚ୍ୟାଲେଞ୍ଜ ଟ୍ରାୟାଲ ଓ ୯ଟି ମାନବୀୟ ପରୀକ୍ଷଣ ଅନ୍ତର୍ଭୁକ୍ତ ଥିଲା । ସାରା ବିଶ୍ବରେ ଲକ୍ଷ ଲକ୍ଷ ଡୋଜ୍ କୋଭାକ୍ସିନ ଲୋକଙ୍କୁ ଦିଆଯାଇଥିବାବେଳେ, ତାହା ସବୁଠାରୁ ନିରାପଦ, ପ୍ରଭାବୀ ସାବ୍ୟସ୍ତ ହୋଇଥିଲା ।
ଏହା ପୂର୍ବରୁ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ ମଧ୍ୟ ଏକ ବୟାନ ଜାରି କରି କୋଭାକ୍ସିନ ବାହାର କରିବାକୁ କମ୍ପାନି ଉପରେ କୌଣସି ଚାପ ଦିଆଯାଇଥିବା ଖବରକୁ ଖଣ୍ଡନ କରାଯାଇଥିଲା ।