ମଙ୍ଗଳରେ ଜଳ: ମହାକାଶ ବିଜ୍ଞାନୀମାନେ ଲାଲଗ୍ରହରେ ଆବିଷ୍କାର କଲେ ୩ଟି ପୋତି ହୋଇ ଯାଇଥିବା ହ୍ରଦ
ନୂଆଦିଲ୍ଲୀ: ପୁଣିଥରେ ଚର୍ଚ୍ଚାର ପରିସରକୁ ଆସିଯାଇଛି ଲାଲଗ୍ରହ ରୂପେ ପରିଚିତ ମଙ୍ଗଳ। ମହାକାଶ ବିଜ୍ଞାନୀ ଓ ଅନୁସନ୍ଧାନକାରୀମାନେ ସଂପ୍ରତି ମଙ୍ଗଳ ପୃଷ୍ଠରେ ଲୁଚି ରହିଥିବା ଆଉ ତିନିଟି ହ୍ରଦର ସନ୍ଧାନ ପାଇଛନ୍ତି ଏବଂ ଦୁଇ ବର୍ଷ ପୂର୍ବେ ମଙ୍ଗଳରେ ଆବିଷ୍କୃତ ହୋଇଥିବା ଅନ୍ୟ ଏକ ବୃହତ ଲୁଣିଆ ଜଳ ହ୍ରଦର ଉପସ୍ଥିତିକୁ ନିଶ୍ଚିତ କରିବା ପରେ ଆରମ୍ଭ ହୋଇଛି ଏହି ଚର୍ଚ୍ଚା। ମହାକାଶ ବିଜ୍ଞାନୀଙ୍କ ଏହି ନୂତନ ଆବିଷ୍କାର ପରେ ମଙ୍ଗଳ ଗ୍ରହରେ ଜୀବସତ୍ତା ସମ୍ଭବ ନା ନୁହେଁ ତାକୁ ନେଇ ଆଲୋଚନା ଆରମ୍ଭ ହେବା ସହ ଗବେଷଣା ମଧ୍ୟ ଆରମ୍ଭ ହୋଇଯାଇଛି।
‘ପ୍ରକୃତି ଜ୍ୟୋତିର୍ବିଜ୍ଞାନ’ରେ ଗତ ସୋମବାର ପ୍ରକାଶ ପାଇଥିବା ଏକ ଗବେଷଣାଧର୍ମୀ ଅନୁସନ୍ଧାନମୂଳକ ରିପୋର୍ଟ ଅନୁଯାୟୀ, ମହାକାଶ ବିଜ୍ଞାନୀ ଓ ଅନୁସନ୍ଧାନକାରୀମାନେ ଗୋଟିଏ ଲୁଣିଆ ଜଳ ହ୍ରଦର ଉପସ୍ଥିତିକୁ ନିଶ୍ଚିତ କରିଛନ୍ତି, ଯାହା ଦୁଇ ବର୍ଷ ପୂର୍ବେ ଗ୍ରହ ବୈଜ୍ଞାନିକମାନଙ୍କ ଦ୍ୱାରା ଆବିଷ୍କୃତ ହୋଇଥିଲା। ଏବଂ ଏଥିସହ ମଙ୍ଗଳ ଗ୍ରହ ପୃଷ୍ଠରେ ଲୁଚି ରହିଥିବା ଆଉ ତିନିଟି ହ୍ରଦର ସନ୍ଧାନ ପାଇଛନ୍ତି ଯାହା ମଙ୍ଗଳ ଗ୍ରହର ବରଫ ପୃଷ୍ଠରେ ପୋତି ହୋଇପଡ଼ିଛି ବୋଲି ଏହି ରିପୋର୍ଟରେ ଉଲ୍ଲେଖ ରହିଛି।
Sambad is now on WhatsApp
Join and get latest news updates delivered to you via WhatsApp
ଏହି ଗବେଷଣାତ୍ମକ ରିପୋର୍ଟର ଅନ୍ୟତମ ସହ-ଲେଖକ ତଥା ରୋମ ବିଶ୍ୱବିଦ୍ୟାଳୟର ଗ୍ରହ ବୈଜ୍ଞାନିକ ଏଲିନା ପେଟ୍ଟିନେଲି କହିଛନ୍ତି ଯେ ଆମେ ପୂର୍ବରୁ ମଧ୍ୟ ସମାନ ଜଳକୁ ଚିହ୍ନଟ କରିଥିଲୁ। କିନ୍ତୁ, ଏବେ ଏହାର ଚାରିପାଖରେ ଅନ୍ୟ ତିନିଟି ଜଳ ଉତ୍ସ ମଧ୍ୟ ପାଇଲୁ। ଅନୁସନ୍ଧାନ ଅନୁଯାୟୀ, ହ୍ରଦଗୁଡିକ ପ୍ରାୟ ୭୫,୦୦୦ ବର୍ଗ କିଲୋମିଟର ଅଞ୍ଚଳ ଉପରେ ପରିବ୍ୟାପ୍ତ। ବର୍ତ୍ତମାନ ଗବେଷକମାନେ ମଙ୍ଗଳ ଗ୍ରହରେ ଭୂତଳ ଜଳର ଉପସ୍ଥିତିକୁ ନିଶ୍ଚିତ କରିବା ପରେ ଏହା ଏବେ ଲାଲ ଗ୍ରହରେ ଜୀବସତ୍ତା ସମ୍ଭବ ନା ନୁହେଁ ତା’ ଉପରେ ଅଧିକ ଅନୁସନ୍ଧାନ ପାଇଁ ନୂତନ ରାସ୍ତା ଖୋଲିବ ବୋଲି ଗ୍ରହ ବିଜ୍ଞାନୀମାନେ କହୁଛନ୍ତି।