ଦିନ ୧ଟା ସୁଦ୍ଧା ୱାୟନାଡରେ ୪୦.୬୭% ମତଦାନ

ୱାୟନାଡ: କେରଳର ୱାୟନାଡ ଲୋକସଭା ଆସନ ସମେତ ଦେଶର  ବିଭିନ୍ନ ରାଜ୍ୟର ୩୧ଟି ବିଧାନସଭା ଆସନ ଲାଗି ଆଜି ସକାଳୁ ମତଦାନ ପ୍ରକ୍ରିୟା ଆରମ୍ଭ ହୋଇଥିଲା। ଏବେ ମତଦାନ ଚାଲିଥିବା ବେଳେ ଦିନ ୧ଟା ସୁଦ୍ଧା ମୋଟ ୪୦. ୬୭% ଭୋଟ ଗ୍ରହଣ କରାଯାଇଥିବା ଜଣାପଡ଼ିଛି। ପ୍ରଥମ କରି ପ୍ରିୟଙ୍କା ଗାନ୍ଧୀ ନିର୍ବାଚନ ଲଢ଼ୁଥିବା ବେଳେ ତାଙ୍କୁ ମତଦାତାଙ୍କ ଭଲପାଇବା ମିଳିବ କି ନାହିଁ ତା’ ଉପରେ ଏବେ କଂଗ୍ରେସର ନଜର ରହିଛି।

ୱାୟନାଡରୁ ଲୋକସଭା ନିର୍ବାଚନରେ ​​ଜିତିଥିବା ରାହୁଲ ଗାନ୍ଧୀ ସେହି ଆସନକୁ ଛାଡ଼ିବାକୁ ନିଷ୍ପତ୍ତି ନେବା ପରେ ୱାୟାନାଡ ଲୋକସଭା ଆସନ ପାଇଁ ଉପ-ନିର୍ବାଚନ ଜରୁରୀ ହୋଇପଡ଼ିଥିଲା। ଅନେକ ଆଲୋଚନା ପରେ ପ୍ରିୟଙ୍କା ସେହି ଆସନରୁ ଲଢ଼ିବା ପାଇଁ ନିଷ୍ପତ୍ତି ନେଇଥିଲେ। ପ୍ରିୟଙ୍କା କଂଗ୍ରେସ ପ୍ରାର୍ଥୀ ଭାବେ ଲଢ଼ୁଥିବା ବେଳେ ସିପିଆଇ(ଏମ୍) ନେତୃତ୍ବାଧୀନ ଏଲଡିଏଫରୁ ପ୍ରାର୍ଥୀ ହୋଇଛନ୍ତି ସତ୍ୟନ ମୋକେରୀ ଓ ବିଜେପି ନେତୃତ୍ୱାଧୀନ ଏନଡିଏର ନବ୍ୟା ହରିଦାସ | ଏଦୁହିଁଙ୍କୁ ଟକ୍କର ଦେଇ ପ୍ରିୟଙ୍କା ବାଜି ମାରିପାରିବେ କି ନାହିଁ, ତାହା ଏବେ ବଡ଼ ପ୍ରଶ୍ନ।

ତେବେ ୱାୟାନାଡରେ ଥିବା ୧୦୦୦ରୁ ଅଧିକ ବୁଥରେ ସକାଳ ୭ଟାରେ ମତଦାନ ଆରମ୍ଭ ହୋଇଥିଲା। ଏହାର ଫଳାଫଳ ନଭେମ୍ବର ୨୩ରେ ଆସିବ ବୋଲି ଜଣାପଡ଼ିଛି।