ପଶ୍ଚିମବଙ୍ଗ : ଚର୍ଚ୍ଚ ଉପରେ ଆକ୍ରମଣ, ୩ ଗିରଫ

ପୂର୍ବ ମେଦିନିପୁର : ପଶ୍ଚିମବଙ୍ଗର ପୂର୍ବ ମେଦିନିପୁରରେ ରବିବାରଦିନ କେତେକ ଦୁର୍ବୁତ୍ତ ଏକ ଚର୍ଚ୍ଚ ଉପରେ ବୋମା ମାଡ଼ କରିବା ସହ ଏକ ଧାର୍ମିକ ସ୍ଲୋଗାନ ଦେଇ ଫେରାର ହୋଇଯାଇଛନ୍ତି । ବୋମା ଫିଙ୍ଗିବା ପୂର୍ବରୁ ସେମାନେ ଚର୍ଚ୍ଚର ଆସବାବପତ୍ର ଭଙ୍ଗାରୁଜ୍ଜା କରିଥିବା ଖବର ମିଳିଛି । ପୁଲିସ ଏହି ଘଟଣାରେ୩ ଜଣଙ୍କୁ ଗିରଫ କରିଛି ।

ପୁଲିସ ସୁତ୍ରରୁ ମିଳିଥିବା ସୂଚନା ଅନୁସାରେ କୋଲକତାଠାରୁ ୧୩୦ କିଲୋମିଟର ଦୂର ଭବାନିପୁର ଅଞ୍ଚଳରେ ଥିବା ଆପୋଷ୍ଟୋଲିକ ରିକନସିଲିଏସନ ଚର୍ଚ୍ଚରେ ରବିବାର ଦିନ ୨ଟା ବେଳେ ପ୍ରାର୍ଥନା ଚାଲୁଥିବାବେଳେ ୩ ଜଣ ଦୁର୍ବୁତ୍ତ ଆସି ଚର୍ଚ୍ଚ ର ଆସବାବପତ୍ର ଭଙ୍ଗା ରୁଜ୍ଜା କରିବାସହ ଶ୍ରଦ୍ଧାଳୁମାନଙ୍କୁ ଧମକ ଚମକ ଦେଇଥିଲେ । ଏହା ପରେ ସେମାନେ ବୋମା ଫିଙ୍ଗିବା ସହ ଜୟ ଶ୍ରୀରାମ ସ୍ଲୋଗାନ ଦେଇଥିଲେ । ଏହି ନବନିର୍ମିତ ଚର୍ଚ୍ଚରେ ପ୍ରାର୍ଥନା କରିବାକୁ ପ୍ରାୟ ୮୦୦ ଲୋକ ଏକତ୍ରିତ ହୋଇଥିଲେ । ଦୁର୍ବୁତ୍ତମାନେ ଚର୍ଚ୍ଚର ପାଦ୍ରିଙ୍କୁ ମଧ୍ୟ ଧମକ ଚମକ ଦେଇଥିଲେ ଓ ଫେରାର ହୋଇଯାଇଥିଲେ । ଫାଦରଙ୍କ ଅଭିଯୋଗ କ୍ରମେ ପୁଲିସ ଏକ ଏଫଆଇଆର ରୁଜ୍ଜୁ କରି ତଦନ୍ତ ଚଳାଇଛି ।