ଆସନ୍ତା କାଲି ପଶ୍ଚିମବଙ୍ଗରେ ୬ଷ୍ଠ ପର୍ଯ୍ୟାୟ ଭୋଟଗ୍ରହଣ : ମୈଦାନରେ ୮୭ ଦାଗୀ ପ୍ରାର୍ଥୀ
ନୂଆଦିଲ୍ଲୀ : ଆସନ୍ତା କାଲି ପଶ୍ଚିମବଙ୍ଗରେ ୬ଷ୍ଠ ପର୍ଯ୍ୟାୟ ଭୋଟଗ୍ରହଣ ହେବ । ଏହା ପୂର୍ବରୁ ଆସୋସିଏସନ ଫର ଡେମୋକ୍ରାଟିକ ରିଫର୍ମ୍ସ (ଏଡିଆର) ପକ୍ଷରୁ ଏହି ପର୍ଯ୍ୟାୟରେ ପ୍ରତିଦ୍ବନ୍ଦିତା କରୁଥିବା ପ୍ରାର୍ଥୀମାନଙ୍କ ଅପରାଧିକ ପୃଷ୍ଠଭୂମି, ଅର୍ଥନୈତିକ ସ୍ଥିତି, ଶିକ୍ଷାଗତ ଯୋଗ୍ୟତା ସମ୍ପର୍କରେ ଏକ ରିପୋର୍ଟ ପ୍ରକାଶ କରିଛି ।
Sambad is now on WhatsApp
Join and get latest news updates delivered to you via WhatsApp
ଏହି ରିପୋର୍ଟରେ କୁହାଯାଇଛି ଯେ ୬ଷ୍ଠ ପର୍ଯ୍ୟାୟରେ ପ୍ରତିଦ୍ବନ୍ଦିତା କରୁଥିବା ୩୦୬ ପ୍ରାର୍ଥୀଙ୍କ ମଧ୍ୟରୁ ୮୭ ଜଣ ବା ୨୮ ପ୍ରତିଶତ ପ୍ରାର୍ଥୀଙ୍କ ନାମରେ ଅପରାଧିକ ମାମଲା ରହିଛି । ଏମାନଙ୍କ ମଧ୍ୟରୁ ୭୧ ଜଣ ବା ୨୩ ପ୍ରତିଶତ ପ୍ରାର୍ଥୀଙ୍କ ନାମରେ ଗୁରୁତର ଅପରାଧିକ ମାମଲା (ହତ୍ୟା, ହତ୍ୟା ଉଦ୍ୟମ, ନାରୀ ବିରୋଧୀ ଅପରାଧ ଇତ୍ୟାଦି) ରହିଛି । ସିପିଆଇ(ଏମ)ର ସର୍ବାଧିକ ୬୧ ପ୍ରତିଶତ, ବିଜେପିର ୫୮ ପ୍ରତିଶତ ଓ ଟିଏମସିର ୫୬ ପ୍ରତିଶତ ପ୍ରାର୍ଥୀଙ୍କ ନାମରେ ଅପରାଧିକ ମାମଲା ରହିଛି ।
ଅନ୍ୟପକ୍ଷରେ, ତୃଣମୂଳ କଂଗ୍ରେସ (ଟିଏମସି)ରେ ସବୁଠାରୁ ଅଧିକ କୋଟିପତି ପ୍ରାର୍ଥୀ ରହିଛନ୍ତି । ୬ଷ୍ଠ ପର୍ଯ୍ୟାୟରେ ପ୍ରତିଦ୍ବନ୍ଦିତା କରୁଥିବା ୩୦୬ ପ୍ରାର୍ଥୀଙ୍କ ମଧ୍ୟରୁ ୬୬ ଜଣ ବା ୨୨ ପ୍ରତିଶତ ପ୍ରାର୍ଥୀ କୋଟିପତି । ତୃଣମୂଳ କଂଗ୍ରେସର ସର୍ବାଧିକ ୬୫ ପ୍ରତିଶତ ପ୍ରାର୍ଥୀ କୋଟିପତି ଥିବାବେଳେ ବିଜେପିର ୪୪ ପ୍ରତିଶତ ପ୍ରାର୍ଥୀ ହେଉଛନ୍ତି କୋଟିପତି ।