ସେପ୍ଟେମ୍ବର ପହିଲାରୁ ୧ କୋଟି ଟଙ୍କା ଜିିତିବାର ସୁଯୋଗ; ଏହି ସରଳ ଉପାୟରେ ଆପଣ ବି ବନିପାରନ୍ତି କୋଟିପତି

ନୂଆଦିଲ୍ଳୀ: ସେପ୍ଟେମ୍ବର ପହିଲାରୁ କେନ୍ଦ୍ର ସରକାର ‘ମେରା ବିଲ୍‌ ମେରା ଅଧିକାର୍‌’ ନାମରେ ସାମଗ୍ରୀ ଓ ସେବା କର (ଜିଏସ୍‌ଟି) ଯୋଜନା ଲଞ୍ଚ୍‌ କରିବାକୁ ଯାଉଛନ୍ତି। ଏହି ଯୋଜନା ମୁତବକ, ମାତ୍ର ୨୦୦ ଟଙ୍କାର ସାମଗ୍ରୀ କିଣି ୧ କୋଟି ଟଙ୍କାର ପୁରସ୍କାର ରାଶି ଜିତିବାର ସୁଯୋଗ ମିଳିବ। କେନ୍ଦ୍ର ସରକାର ଏହି ଯୋଜନାକୁ ରାଜ୍ୟ ସରକାରଙ୍କ ସହଯୋଗରେ ଲଞ୍ଚ୍‌ କରିବାକୁ ଯାଉଛନ୍ତି।

ଏହି ଯୋଜନା ଅଧିନରେ ଲୋକଙ୍କୁ ୨୦୦ କିମ୍ବା ତାଠାରୁ ଅଧିକ ଟଙ୍କାର ଜିଏସ୍‌ଟି ଚାଲାଣକୁ ଅପ୍‌ଲୋଡ କରିବାକୁ ହେବ। ସରକାର ଏହି ଯୋଜନାକୁ ଏଥିପାଇଁ ଆରମ୍ଭ କରୁଛନ୍ତି, ଯେପରି ପ୍ରତ୍ୟେକ କ୍ରୟ ପାଇଁ ଜିଏସ୍‌ଟି ବିଲ୍‌ ମାଗିବାର ପ୍ରଥାକୁ ପ୍ରୋତ୍ସାହିତ କରାଯାଇପାରିବ।

ସେପ୍ଟେମ୍ବର ପହିଲାରୁ ଏହି ଯୋଜନାକୁ ପାଇଲଟ୍‌ ପ୍ରକଳ୍ପ ଭାବେ ଆସାମ, ଗୁଜୁରାଟ, ହରିଆଣା, କେନ୍ଦ୍ର ଶାସିତ ଅଞ୍ଚଳ ପୁଡୁଚେରି, ଦାଦର ନଗର ହବେଲି ଓ ଦାମନ ଡିଉରେ ଲଞ୍ଚ୍‌ କରାଯିବ।

ଆପଣ ଭାବୁଥିବେ ଯେ ଜିଏସ୍‌ଟି ବିଲ୍‌କୁ କେଉଁଠାରେ ଓ କିପରି ଅପ୍‌ଲୋଡ୍‌ କରିବେ। 'Web.merebill.gst.gov.in' ବୋଲି ସରକାରଙ୍କର ଏକ ପୋର୍ଟାଲ୍‌  ଉପଲବ୍ଧ। ପୋର୍ଟାଲ୍‌ରେ ଥିବା ‘ମେରା ବିଲ୍‌ ମେରା ଅଧିକାର୍‌’ ଉପରେ ଯାଇ ସେଠାରେ କ୍ଲିକ୍‌ କରି ଏହି ବିଲ୍‌କୁ ଅପ୍‌ଲୋଡ କରାଯାଇପାରିବ।

ତେବେ ଚାଲାଣ ଅପ୍‌ଲୋଡ୍‌ କରିବା ବେଳେ ଗ୍ରାହକଙ୍କୁ ଯୋଗାଣକାରୀଙ୍କ ଜିଏସ୍‌ଟିଆଇଏନ୍‌, ଚାଲାଣ ନମ୍ବର, ଚାଲାଣ ତାରିଖ, ଚାଲାଣର ମୂଲ୍ୟ ଏବଂ ଗ୍ରାହକଙ୍କୁ ରାଜ୍ୟ କିମ୍ବା କେନ୍ଦ୍ର ଶାସିତ ଅଞ୍ଚଳର ନାମ ଆଦି ଦେବାକୁ ହେବ।