କଲମ୍ବୋ : ଗୋଟାବାୟା ରାଜପକ୍ଷେ ବିଦେଶ ପଳାଇଯିବା ପରେ ଧୀରେ ଧୀରେ ଶ୍ରୀଲଙ୍କାର ସ୍ଥିତି ଶାନ୍ତ ହେବାରେ ଲାଗିଛି । ଏହା ସହିତ ଦେଶକୁ ସହାୟତା କରିବାକୁ ଆଗେଇ ଆସିଛନ୍ତି ବିଦେଶରେ ରହୁଥିବା ଶ୍ରୀଲଙ୍କା ଲୋକ । ଦେଶର ବୈଦେଶିକ ମୁଦ୍ରା ଭଣ୍ଡାରକୁ ବଢାଇବାକୁ ସେମାନେ ନିଜ ନିଜର ଯୋଗଦାନ ଦେବା ଆରମ୍ଭ କରିଛନ୍ତି । ଏଥିପାଇଁ ‘ #ଶ୍ରୀଲଙ୍କା ଡଲାର ଚ୍ୟାଲେଞ୍ଜ’ ନାମକ ଅଭିଯାନ ସୋସିଆଲ ମିଡିଆରେ ଆରମ୍ଭ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ଶ୍ରୀଲଙ୍କାର କାମଚଳା ରାଷ୍ଟ୍ରପତି ଦାୟିତ୍ବ ନେବା ପରେ ରାନିଲ ବିକ୍ରମସିଂଘେ ସାଧାରଣ ଲୋକଙ୍କ ସହାୟତା ପାଇଁ କେତେକ ପଦକ୍ଷେପ ନେଇଛନ୍ତି । ଲୋକମାନଙ୍କୁ ଖାଦ୍ୟ ସାମଗ୍ରୀ, ଇନ୍ଧନ ଯୋଗାଇବାକୁ ସେ ନିର୍ଦ୍ଦେଶ ଦେଇଛନ୍ତି । ଏହା ସହିତ ଦେଶର ଅର୍ଥନୀତିକୁ ପୁଣି ସୁଧାରିବାକୁ ସେ ଶିଳ୍ପପତି ଓ ବ୍ୟବସାୟୀମାନଙ୍କୁ ସହାୟତା କରିବାକୁ ଘୋଷଣା କରିଛନ୍ତି ।
ସୂଚନାଯୋଗ୍ୟ, ଶ୍ରୀଲଙ୍କାରେ ଆର୍ଥିକ ସଂକଟ ଯୋଗୁଁ ଏହି ଦେଶର ଶାସନ ବ୍ୟବସ୍ଥା ଭୁଶୁଡ଼ି ପଡ଼ିଛି । ଏହି ଦେଶ ୧୯୪୮ରେ ନିଜର ସ୍ବାଧୀନତା ପରଠାରୁ ସବୁଠାରୁ ବଡ଼ ସଂକଟ ଦେଇ ଗତିକରୁଛି । ଖାଦ୍ୟ, ଔଷଧ, ପେଟ୍ରୋଲିୟମ ଓ ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀ ପାଇଁ ଏହି ଦେଶର ଲୋକମାନେ ସଂଘର୍ଷ କରୁଛନ୍ତି । ଏହାଫଳରେ ଲୋକମାନେ ସରକାରଙ୍କ ବିରୋଧରେ ରାସ୍ତାକୁ ଓହ୍ଲାଇ ଆନ୍ଦୋଳନ କରିବା ପରେ ରାଷ୍ଟ୍ରପତି ଗୋଟାବାୟ ରାଜପକ୍ଷେ ବିଦେଶ ଫେରାର ହୋଇଯାଇଛନ୍ତି ।