ଶୋଇବାଘର-ଶୌଚାଳୟ-ଟେଲିଫୋନ, ଦିନକୁ ଭଡ଼ା ୯୯୦ଟଙ୍କା, ଜାଣନ୍ତୁ ମୋଦୀଜୀ ଧ୍ୟାନ କରୁଥିବା ଗୁମ୍ଫାରେ ଉପଲବ୍ଧ ଥିବା ଅନ୍ୟ ସୁବିଧା ବିଷୟରେ
ନୂଆଦିଲ୍ଲୀ : ଲୋକସଭା ନିର୍ବାଚନ ୨୦୧୯ର ଅନ୍ତିମ ପର୍ଯ୍ୟାୟ ନିର୍ବାଚନ ପ୍ରଚାର ଶେଷ ହେବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ଉତ୍ତରାଖଣ୍ଡରେ କେଦାରନାଥ ଧାମ ପହଞ୍ଚିଥିଲେ। ସେଠାରେ ପହଞ୍ଚି ସେ କେଦାରନାଥ ମନ୍ଦିରରେ ପୂଜା-ଅର୍ଚ୍ଚନା କରିଥିଲେ। ଏହାପରେ ନରେନ୍ଦ୍ର ମୋଦୀ ପାଦରେ ପାହାଡ ଚଢ଼ି ସାଧନା ପାଇଁ ରୁଦ୍ରା ଗୁମ୍ଫାରେ ପହଞ୍ଚିଥିଲେ। ରବିବାର ସକାଳ ପର୍ଯ୍ୟନ୍ତ ଏହି ଗୁମ୍ଫାରେ ସେ ଧ୍ୟାନ କରିଥିଲେ । ତେବେ ମୋଦୀଜୀ ସେଠାରୁ ଧ୍ୟାନ କରି ଫେରି ଆସିଥିବା ବେଳେ ଏବେ ଗୁମ୍ଫାରେ ମିଳୁଥିବା ସୁବିଧାକୁ ନେଇ ଚର୍ଚ୍ଚା ଆରମ୍ଭ ହୋଇ ଯାଇଛି । ଚଳିତ ବର୍ଷ ଅପ୍ରେଲରେ ଏହି ଗୁମ୍ଫାର ନିର୍ମାଣ କାର୍ଯ୍ୟ ଶେଷ ହୋଇଥିବା ବେଳେ ଏହାର ନିର୍ମାଣ ନେହେରୁ ପର୍ବତାରୋହଣ ସଂସ୍ଥାନ ଦ୍ୱାରା କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
୫ମିଟର ଲମ୍ବ ଏବଂ ୩ମିଟର ଚଉଡ଼ା ଥିବା ଏହି ଗୁମ୍ଫାରେ ଶୋଇବା ପାଇଁ ଖଟ, ଶୌଚାଳୟ, ବିଜୁଳି ଏବଂ ଟେଲିଫୋନ ଭଳି ଆଧୁନିକ ଜିନିଷର ବ୍ୟବସ୍ଥା କରାଯାଇଛି । ଏହି ଗୁମ୍ଫା ସମୁଦ୍ର ତଳୁ ୧୨, ୨୫୦ଫୁଟ ଉପରେ ରହିଛି । ଏହି ଗୁମ୍ଫାକୁ ଏବେ ଟ୍ରାଏଲ ହିସାବରେ ତିଆରି କରାଯାଇଥିବା ବେଳେ ଆଗକୁ ଏଭଳି ୫ଟି ଗୁମ୍ଫା ତିଆରି କରାଯିବାର ବ୍ୟବସ୍ଥା କରିଛି । ୯୯୦ଟଙ୍କା ଦେଇ ଶ୍ରଦ୍ଧାଳୁମାନେ ଏହି ଗୁମ୍ଫାକୁ ବୁକ୍ କରି ପାରିବେ । କେବଳ ୩ଦିନ ପାଇଁ ଏହି ଗୁମ୍ଫାକୁ ବୁକ୍ କରି ପାରି ପାରିବେ ଶ୍ରଦ୍ଧାଳୁ । କିନ୍ତୁ ଦରକାର ପଡ଼ିଲେ ଏହାର ଅବଧି ବଢ଼ାଇ ଦିଆ ଯାଇପାରେ ।
ଗତକାଲି ରାତି ସମୟରେ ମୋଦୀଜୀଙ୍କୁ ଖାଇବା ପଠା ଯାଇଥିଲା । ଅଧିକ ଥଣ୍ଡା ହେତୁ ଭିତରେ ହିଟର, ଗିଜର ଏବଂ ବିଜୁଳିର ବ୍ୟବସ୍ଥା କରାଯାଇଥିଲା । ଏହା ସହ ଗୁମ୍ଫା ପାଖରେ ସୁରକ୍ଷାକର୍ମୀମାନଙ୍କର ଟେଣ୍ଟ ମଧ୍ୟ ଲଗାଯାଇଥିଲା ବୋଲି ଜଣା ପଡ଼ିଛି ।