ସ୍ୱାମୀଙ୍କ ହତ୍ୟାରେ କି ଭୂମିକା ଥିଲା ସୋନମ୍‌ଙ୍କର? ରହସ୍ୟପେଡ଼ି ଖୋଲିଲେ ସହ-ଅଭିଯୁକ୍ତ

ଇନ୍ଦୋର: ହନିମୁନ୍ ସମୟରେ ନିଖୋଜ ହୋଇଥିବା ଦମ୍ପତିଙ୍କୁ ଖୋଜିବା ପାଇଁ ପୁଲିସ ତଦନ୍ତ ଆରମ୍ଭ କରିଥିଲା। କିନ୍ତୁ କିଛି ଦିନ ମଧ୍ୟରେ ଏକ ଭୟଙ୍କର ଷଡ୍‌ଯନ୍ତ୍ର ସାମ୍ନାକୁ ଆସିଲା - ପତ୍ନୀ ସୋନମ୍ ତାଙ୍କ ସ୍ୱାମୀ ରାଜା ରଘୁବଂଶୀଙ୍କ ହତ୍ୟାରେ ମୁଖ୍ୟ ସନ୍ଦିଗ୍ଧ ଭାବରେ ଉଭା ହୋଇଥିଲେ। ଏହି ହତ୍ୟାକାଣ୍ଡରେ ସୋନମ୍‌ଙ୍କର କେତେ ଭୂମିକା ରହିଛି, ତଦନ୍ତକାରୀ ପୁଲିସ ଓ ଦୋଷ ସ୍ବୀକାର କରିଥିବା ଅନ୍ୟ ସନ୍ଦିଗ୍ଧମାନେ ତାହାର ବିବରଣୀ ପ୍ରଦାନ କରିଛନ୍ତି। 

ମେ ୧୦ରେ ଇନ୍ଦୋରରେ ବିବାହ କରିଥିବା ରାଜା ଓ ସୋନମ୍ ମେ ୨୧ରେ ଶିଲଂରେ ପହଞ୍ଚିଥିଲେ। ଏହାର ଦୁଇ ଦିନ ପରେ ସୋହରା (ଚେରାପୁଞ୍ଜି) ନିକଟରେ ଥିବା ଏକ ଘାଟି ମୂଳରୁ ରାଜାଙ୍କ ଗଳିତ ମୃତଦେହ ମିଳିଥିଲା। ପ୍ରତିଦିନ ନୂଆ ନୂଆ ତଥ୍ୟ ସାମ୍ନାକୁ ଆସିବା ସହ ଏହି ଅପରାଧର ବର୍ବରତା ଦେଶବାସୀଙ୍କୁ ଚକିତ କରିଛି। ସହକାରୀ ପୁଲିସ କମିସନର ପୁନମ୍ ଚାନ୍ଦ ଯାଦବଙ୍କ କହିବା ଅନୁଯାୟୀ, ଏହି ହତ୍ୟାକାଣ୍ଡରେ ଗିରଫ ହୋଇଥିବା ୪ ଜଣ ବ୍ୟକ୍ତି ନିଜର ଦୋଷ ସ୍ୱୀକାର କରିଛନ୍ତି ଏବଂ ସମସ୍ତେ ସୋନମ୍‌ଙ୍କ ସକ୍ରିୟ ସଂପୃକ୍ତି ଥିବା ଦର୍ଶାଇଛନ୍ତି। ଏସିପି ଯାଦବ କହିଛନ୍ତି, ଅଭିଯୁକ୍ତ ବିଶାଲ ଠାକୁର ପ୍ରଥମ ମରଣାନ୍ତକ କରିଥିଲା।

ଅନୁସନ୍ଧାନକାରୀମାନେ ବିଶ୍ୱାସ କରନ୍ତି ଯେ ଏହି ହତ୍ୟାକାଣ୍ଡ ଯୋଜନାବଦ୍ଧ ଥିଲା ଏବଂ ସୋନମ୍ ଆରମ୍ଭରୁ ଶେଷ ପର୍ଯ୍ୟନ୍ତ ପ୍ରମୁଖ ଭୂମିକା ଗ୍ରହଣ କରିଥିଲେ। ଏହି ଦମ୍ପତି ମେ ୨୩ ତାରିଖରେ ଜଳପ୍ରପାତ ଦେଖିବା ପାଇଁ ଏକ ତୀଖ ଶିଖରକୁ ଚଢ଼ିଥିଲେ ଏବଂ ଭଡ଼ାଟିଆ ହତ୍ୟାକାରୀନେ ତାଙ୍କୁ ଅନୁସରଣ କରୁଥିଲେ। ସୋନମ୍ ଆକ୍ରମଣକାରୀ ବିଶାଲ ଠାକୁର, ଆକାଶ ରାଜପୁତ ଓ ଆନନ୍ଦ କୁଲିଙ୍କ ସହ ଲାଇଭ୍ ଲୋକେସନ୍ ଡାଟା ସେୟାର କରିଥିବା ଅଭିଯୋଗ ହୋଇଛି। ଟ୍ରେକ୍ ସମୟରେ ସୋନମ୍ କ୍ଳାନ୍ତ ହେବାର ବାହାନା କରି ଜାଣିଶୁଣି ସ୍ୱାମୀ ଓ ଆକ୍ରମଣକାରୀଙ୍କ ପଛରେ ପଡ଼ିଯାଇଥିଲେ। ସେମାନେ ଏକ ନିର୍ଜନ ଅଞ୍ଚଳରେ ପହଞ୍ଚିବା ପରେ ସେ ରାଜାଙ୍କୁ ହତ୍ୟା କରିବାକୁ ହତ୍ୟାକାରୀମାନଙ୍କୁ ନିର୍ଦ୍ଦେଶ ଦେଇଥିବା ଅଭିଯୋଗ ହୋଇଛି। ତେବେ ୩ ଜଣ ପ୍ରଥମେ ଅତ୍ୟଧିକ ଥକିଯାଇଥିବା ଦର୍ଶାଇ ମନା କରିଦେଇଥିଲେ। ଏହାପରେ ସୋନମ୍ ସେମାନଙ୍କୁ ମନାଇବା ପାଇଁ ଏହି ଅଫରକୁ ୨୦ ଲକ୍ଷ ଟଙ୍କାକୁ ବୃଦ୍ଧି କରିଥିବା ଜଣାପଡିଛି। ପୁଣି ଅଭିଯୋଗ ହୋଇଛି ଯେ ସୋନମ୍ ଅଭିଯୁକ୍ତଙ୍କୁ ରାଜାଙ୍କ ମୃତଦେହକୁ ଖାଲରେ ଫିଙ୍ଗିବାରେ ସାହାଯ୍ୟ କରିଥିଲେ।

ରାଜାଙ୍କ ଭାଇ ବିପୁଲ ରଘୁବଂଶୀ ଖୋଲାଖୋଲି ଭାବେ ସୋନମ୍ ଓ ତାଙ୍କ ପରିବାର ବିରୋଧରେ ଏହି ହତ୍ୟାକାଣ୍ଡ ଘଟାଇଥିବା ଅଭିଯୋଗ ଆଣିଛନ୍ତି ଏବଂ ସିବିଆଇ ତଦନ୍ତ ଦାବି କରିଛନ୍ତି। ଅନ୍ୟପକ୍ଷରେ ସୋନମ୍‌ଙ୍କ ପ୍ରେମିକ କୁଶୱାହଙ୍କ ପରିବାର ତାଙ୍କୁ ନିର୍ଦ୍ଦୋଷ ବୋଲି କହୁଥିବା ବେଳେ ସୋନମ୍‌ଙ୍କ ବାପା ମେଘାଳୟ ପୁଲିସ ମନଗଢ଼ା କାହାଣୀ ରଚନା କରୁଥିବା ଅଭିଯୋଗ ଆଣିଛନ୍ତି।