ଡାଉନ ହେଲା ହ୍ବାଟ୍ସଆପ୍, ମେସେଜ ପଠାଇବା ବେଳେ ସମସ୍ୟା

ନୂଆଦିଲ୍ଲୀ : ଶନିବାର ବିଭିନ୍ନ ୟୁପିଆଇ ଆପ୍ ଧୀମା ହେବାର ଖବର ଆସିଥିଲା । ଏବେ ମେସେଜିଂ ଆପ୍ ହ୍ବାଟ୍ସଆପ୍ ମଧ୍ୟ ଅଚଳ ହେବାର କେତେକ ଖବର ଆସିଛି। ହଜାର ହଜାର ଉପଭୋକ୍ତାଙ୍କ ପାଇଁ  ହ୍ୱାଟ୍ସଆପ୍ କାମ କରୁନଥିବା ସୂଚନା ମିଳିଛି। ଅନେକ ଉପଭୋକ୍ତା ମେସେଜ୍ ପଠାଇବା ଏବଂ ଷ୍ଟାଟସ୍ ଅପଲୋଡ୍ କରିବାରେ ସମସ୍ୟା ହେଉଥିବା ଅଭିଯୋଗ କରିଥିଲେ। ଡାଉନଡିଟେକ୍ଟର ଅନୁଯାୟୀ, ଶନିବାର ସନ୍ଧ୍ୟା ୫:୨୨ ସୁଦ୍ଧା ହ୍ୱାଟସଆପ ବିରୋଧରେ ଅତି କମରେ ୫୯୭ଟି ଅଭିଯୋଗ ଦାଖଲ ହୋଇଛି।

ଡାଉନଡିଟେକ୍ଟର ଅନୁଯାୟୀ, ଏହି ଅଭିଯୋଗଗୁଡ଼ିକ ମଧ୍ୟରୁ ୮୫ ପ୍ରତିଶତ ମେସେଜ୍ ପଠାଇବା ସହିତ ଜଡିତ ଥିଲା। କେବଳ ଏତିକି ନୁହେଁ, ୧୨ ପ୍ରତିଶତ ଲୋକ ଆପ୍‌ରେ ସମସ୍ୟାର ସମ୍ମୁଖୀନ ହୋଇଥିଲେ ଏବଂ ୩ ପ୍ରତିଶତ ଲୋକ ଲଗଇନ୍ ସମୟରେ ସମସ୍ୟାର ସମ୍ମୁଖୀନ ହୋଇଥିଲେ।

ଅନେକ ବ୍ୟବହାରକାରୀ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ ରେ ହ୍ବାଟ୍ସଆପ୍ ଡାଉନ୍ ହେବା ବିଷୟରେ ମଧ୍ୟ ଅଭିଯୋଗ କରିଥିଲେ। ଜଣେ ବ୍ୟବହାରକାରୀ ଏହା ବିଷୟରେ ପୋଷ୍ଟ କରି ପଚାରିଥିଲେ ଯେ ହ୍ବାଟ୍ସଆପ୍ ଡାଉନ୍ ଅଛି କି, କାରଣ ମୁଁ ଏକ ଷ୍ଟାଟସ୍ ଦେବାକୁ ଚେଷ୍ଟା କରୁଛି କିନ୍ତୁ ତାହା ଅପଲୋଡ୍ ହେଉନାହିଁ। ଉପଭୋକ୍ତା ଏହା ସହିତ ଏକ ସ୍କ୍ରିନସଟ୍ ମଧ୍ୟ ସେୟାର କରିଛନ୍ତି, ଯେଉଁଥିରେ 'ଅପଲୋଡ୍ ପେଣ୍ଡିଂ' ସ୍ଥିତି ସ୍ପଷ୍ଟ ଭାବରେ ଦୃଶ୍ୟମାନ ହେଉଛି।