ବଲୁଚିସ୍ତାନର ସ୍ୱତନ୍ତ୍ରତା ପାଇଁ କାମ କରୁଛି ବଲୁଚ ଲିବରେସନ୍ ଆର୍ମି

ନୂଆଦିଲ୍ଲୀ: ପାକିସ୍ତାନରେ ଆତଙ୍କବାଦୀମାନେ ଟ୍ରେନ ହାଇଜାକ କରି ୪୫୦ ଯାତ୍ରୀଙ୍କୁ ବନ୍ଧକ କରିନେଇଛନ୍ତି । ତେବେ ଏହି ଘଟଣା ପଛରେ ବଲୁଚି ଲିବରେସନ ଆର୍ମିର ହାତ ଥିବା କୁହାଯାଉଛି । ବଲୁଚ ଲିବରେସନ ଆର୍ମି ଦାବି କରିଛି ଯେ ସେ କ୍ୱେଟାରୁ ପେଶାବର ଯାଉଥିବା ଜାଫର ଏକ୍ସପ୍ରେସକୁ ବୋଲନରେ ହାଇଜାକ କରିନେଇଛନ୍ତି, ଆଉ ୪୫୦ ଯାତ୍ରୀ ତାଙ୍କ କବଜାରେ ରହିଛନ୍ତି । ଏହା ପ୍ରଥମଥର ହୋଇନି ଯେଉଁଠି ବିଏଏଲ ପାକିସ୍ତାନ ଆର୍ମୀଙ୍କ ନାକରେ ପାଣି ପିଆଇଛନ୍ତି । 

ବଲୁଚି ଲିବରେସନ ଆର୍ମି ଏକ ବିଦ୍ରୋହୀ ସଶସ୍ତ୍ର ସଂଗଠନ । ଯାହା ପାକିସ୍ତାନର ବଲୁଚସ୍ତାନ ପ୍ରାନ୍ତରେ ଲମ୍ୱା ସମୟ ଯାଏ ସକ୍ରିୟ ରହିଛି । ଆଫଗାନିସ୍ତାନକୁ ଲାଗିଥିବା ଏହି ଅଞ୍ଚଳର ଲୋକଙ୍କ କହିବା କଥା ହେଲା ସେମାନଙ୍କୁ କୌଣସି ସୁବିଧା ମିଳୁନାହିଁ । ବଲୁଚିସ୍ତାନର ସ୍ୱତନ୍ତ୍ରତା ପାଇଁ ବଲୁଚର ଲୋକମାନେ ନିଜ ଅଧିକାରୀ ଦାବି କରିଆସୁଛନ୍ତି । ତେବେ ଏଥିପାଇଁ ବଲୁଚି ଲିବରେସନ ଆର୍ମି କାମ କରୁଛି । ସେମାନେ ମୁଖ୍ୟତଃ ପାକିସ୍ତାନୀ ସେନା, ସରକରୀ ପ୍ରତିଷ୍ଠାନ ଓ ଚୀନ ପରିୟୋଜନା ଉପରେ ଆକ୍ରମଣ କରନ୍ତି । ପାକିସ୍ତାନ ୨୦୦୬ରେ ବିଏଲଏକୁ ଆତଙ୍କୀ ସଂଗଠନ ଘୋଷଣା କରିଛି । 

୧୯୪୭ରେ ଯେତେବେଳେ ପାକିସ୍ତାନ ଗଠନ ହେଲା, ବଲୁଚିସ୍ତାନ ଏକ ସ୍ୱତନ୍ତ୍ର ଅଞ୍ଚଳ ଥିଲା । ହେଲେ ୧୯୪୮ ମସିହାରେ ପାକିସ୍ତାନ ଏହାକୁ ବଳପୂର୍ବକ ନିଜ ଦେଶରେ ସାମିଲ କରିଦେଇଥିଲା। ବଲୁଚସ୍ତାନର ଲୋକ ନିଜ ସାଂସ୍କୃତିକ ଓ ରାଜନୈତିକ ପରିଚୟକୁ ନେଇ ସଂଘର୍ଷ କରୁଥିଲେ । ୧୯୭୦ରେ ଦଶକରେ ବଲୁଚି ରାଷ୍ଟ୍ରବାଦୀମାନେ ପାକିସ୍ତାନଠାରୁ ଅଲଗା ହେବାକୁ ଅନେକ ପ୍ରୟାସ କରିଥିଲେ । ପାକିସ୍ତାନ ୧୯୭୦ରେ ଏକ ବଡ଼ ସୈନ୍ୟ ଅଭିଯାନ ଆରମ୍ଭ କରିଥିଲେ; ଯେଉଁଥିରେ ବଲୁଚର ଅନେକ ନେତା ଓ ସମୁଦାୟଙ୍କୁ ପ୍ରତାଡିତ କରାଯାଇଥିଲା ଓ ସେବେଠାରୁ ବଲୁଚର କିଛି ସଂଗଠନ ସଶସ୍ତ୍ର ବିଦ୍ରୋହର ରାସ୍ତା ବାଛିଥିଲେ ।