କରୋନା ବାବଦରେ ସବୁ ତାଜା ସୂଚନା ଦେଉଥିବା ଏହି ଅଫିସରଙ୍କୁ ଜାଣିଛନ୍ତି କି?

ନୂଆଦିଲ୍ଲୀ: ସମଗ୍ର ଦେଶ ବର୍ତ୍ତମାନ କରୋନା ଭୂତାଣୁ ବିରୁଦ୍ଧରେ ଏକ ବଡ ଯୁଦ୍ଧ କରୁଛି। ଦେଶରେ କରୋନା ମାମଲା ୬୦୦୦ ସଂଖ୍ୟା ଆଡକୁ ଗତି କରୁଛି। ଆଜିକାଲି ଆପଣ କରୋନାକୁ ନେଇ ସନ୍ଧ୍ୟାରେ ଆପଣଙ୍କ ଟିଭି ପରଦାରେ ଏକ ଚେହେରା ଦେଖିଥିବେ | ଗତ ପ୍ରାୟ ଏକ ମାସ ଧରି ଏହି ବ୍ୟକ୍ତି ଜଣକ ଆପଣଙ୍କ ଟିଭି ପରଦାରେ ଦେଶରେ କରୋନା ମାମଲା ବିଷୟରେ ସୂଚନା ଦେଇଆସୁଛନ୍ତି | ଏହି ବ୍ୟକ୍ତି ହେଉଛନ୍ତି ଆଇଏଏସ୍ ଅଧିକାରୀ ଲବ ଅଗ୍ରୱାଲ, ଯିଏ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟର ଯୁଗ୍ମ ସଚିବ ଅଟନ୍ତି। ୪୮ ବର୍ଷୀୟ ଲବ ଅଗ୍ରୱାଲ୍ ଆତ୍ମବିଶ୍ୱାସର ସହ କୋଭିଡ୍ -୧୯ କୁ ନେଇ ପ୍ରତ୍ୟେକ ସାମ୍ବାଦିକଙ୍କ ପ୍ରଶ୍ନର ଉତ୍ତର ଦିଅନ୍ତି |

ଉତ୍ତରପ୍ରଦେଶର ସାହାରନପୁରର ଲବ ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (ଆଇଆଇଟି) ଦିଲ୍ଲୀରୁ ତାଙ୍କର ବିଟେକ କରିଥିଲେ। ୧୯୯୩ରେ ଲବ,ମେକାନିକାଲ୍ ଇଞ୍ଜିନିୟରିଂରେ ଡିଗ୍ରୀ ହାସଲ କରିଥିଲେ | ୧୯୯୬ ମସିହାରେ ଆଇଏଏସ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲେ | ଏହା ପରେ ଆନ୍ଧ୍ର କ୍ୟାଡର ଅଧୀନରେ ତାଙ୍କର ପୋଷ୍ଟିଂ କରାଯାଇଥିଲା। ସ୍ୱାସ୍ଥ୍ୟ ମନ୍ତ୍ରଣାଳୟ ବ୍ୟତୀତ ଲବ ଶିକ୍ଷା କ୍ଷେତ୍ରରେ ମଧ୍ୟ କାର୍ଯ୍ୟ କରିଛନ୍ତି। ଲବ ଆନ୍ଧ୍ରପ୍ରଦେଶର ମାଧ୍ୟମିକ ଶିକ୍ଷା ବିଭାଗର ନିର୍ଦ୍ଦେଶକ ଥିଲେ। ଏଠାରେ ସେ ଶିକ୍ଷା ସହିତ ସ୍ୱାସ୍ଥ୍ୟ କ୍ଷେତ୍ରରେ ମଧ୍ୟ କାର୍ଯ୍ୟ କରିଥିଲେ।

ଏହା ବ୍ୟତୀତ ସେ ଆନ୍ଧ୍ରପ୍ରଦେଶର ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗର କମିଶନର ଭାବରେ କାର୍ଯ୍ୟ କରିଛନ୍ତି। ୨୦୧୬ରେ ସେ ଡେପୁଟେସନରେ କେନ୍ଦ୍ରକୁ ଯାଇଥିଲେ । ତାଙ୍କର ଉନ୍ନତ ଟ୍ରାକ୍ ରେକର୍ଡ ଦେଖିବା ପରେ ମୋଦୀ ସରକାରଙ୍କ ଦ୍ୱାରା ୨୮ ଅଗଷ୍ଟ ୨୦୧୬ରେ ସ୍ୱାସ୍ଥ୍ୟ ମନ୍ତ୍ରଣାଳୟରେ ଯୁଗ୍ମ ସଚିବ ଭାବରେ ନିଯୁକ୍ତ ହୋଇଥିଲେ। ପାଞ୍ଚ ବର୍ଷ ପାଇଁ ଅର୍ଥାତ ୨୦୨୧ ପର୍ଯ୍ୟନ୍ତ ଲବ ଏହି ପଦବୀରେ ରହିବେ | ଦିନକୁ ୧୫ ରୁ ୧୬ ଘଣ୍ଟା କାମ କରୁଥିବା ଲବଙ୍କ ସହକର୍ମୀ କୁହନ୍ତି ଯେ ଲବ ପ୍ରଥମେ ଅଫିସକୁ ଆସନ୍ତି ଏବଂ ଶେଷରେ ଘରକୁ ଯାଆନ୍ତି |