ହରିୟାଣା ମୁଖ୍ୟମନ୍ତ୍ରୀ କିଏ? ପ୍ରଚାର ଶେଷ ପୂର୍ବରୁ ସୋନିଆଙ୍କୁ ଭେଟିଲେ ଶୈଲଜା

ଚଣ୍ଡିଗଡ଼: ହରିୟାଣାରେ ନିର୍ବାଚନ ପ୍ରଚାର ଗୁରୁବାର ସନ୍ଧ୍ୟାରେ ବନ୍ଦ ହେବାକୁ ଯାଉଛି।  କିନ୍ତୁ ଏହାପୂର୍ବରୁ କଂଗ୍ରେସ ସାଂସଦ କୁମାରୀ ଶୈଲଜା  ଏବଂ ଦଳର ପୂର୍ବତନ ସଭାପତି ସୋନିଆ ଗାନ୍ଧୀଙ୍କ ସାକ୍ଷାତ ରାଜନୈତିକ ଉଷ୍ଣତାକୁ ବଢ଼ାଇ ଦେଇଛି।

ସୂଚନାନୁସାରେ, ଏହି  ସାକ୍ଷାତ୍ ବୈଠକ ପ୍ରାୟ ଅଧ ଘଣ୍ଟା ଧରି ଚାଲିଥିଲା ​​ଏବଂ  ହରିୟାଣା ରାଜନୀତି ପାଇଁ ଏହା ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି। ରାଜ୍ୟ କଂଗ୍ରେସରେ ଗୋଷ୍ଠୀ ବିବାଦ ଦେଖାଦେଇଥିବା ନେଇ  ଚର୍ଚ୍ଚା ହେଉଥିବାବେଳେ ହାଇକମାଣ୍ଡଙ୍କ ସହ ଶୈଲଜାଙ୍କ ଏହି  ସାକ୍ଷାତ୍ ସ୍ବତନ୍ତ୍ର ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି।

ହରିୟାଣା କଂଗ୍ରେସରେ ମୁଖ୍ୟମନ୍ତ୍ରୀ ପଦକୁ ନେଇ ଭୁପେନ୍ଦ୍ର ସିଂ ହୁଡା ଏବଂ କୁମାରୀ ଶୈଲଜାଙ୍କ ମଧ୍ୟରେ ଚାଲିଥିବା କଳହକୁ ନେଇ ଚର୍ଚ୍ଚା ଜୋର ଧରିଛି। ଏହି କାରଣରୁ କଂଗ୍ରେସ ରାଜ୍ୟରେ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବରେ କାହାକୁ ଘୋଷଣା କରି ନାହିଁ।

ଉଭୟ ଶୈଲଜା ଏବଂ ହୁଡା ମୁଖ୍ୟମନ୍ତ୍ରୀ ପଦବୀ ଉପରେ ନଜର ରଖିଛନ୍ତି ଏବଂ ଦଳ ମଧ୍ୟରେ ଗୋଷ୍ଠୀ ବିବାଦକୁ  ଏଡ଼ାଇବା ପାଇଁ  କଂଗ୍ରେସ ପକ୍ଷରୁ ନେଇ କୌଣସି  ଘୋଷଣା କରାଯାଇ ନାହିଁ।

ନିକଟରେ ଭୁପେନ୍ଦ୍ର ସିଂ ହୁଡା ଏକ ସାକ୍ଷାତକାରରେ କୁମାରୀ ଶୈଲଜାଙ୍କ ଅସନ୍ତୋଷକୁ ନେଇ ପ୍ରଶ୍ନର ସମ୍ମୁଖୀନ ହୋଇଥିଲେ। ହୁଡା ଏହାକୁ ଗଣମାଧ୍ୟମ ଦ୍ବାରା ସୃଷ୍ଟି ହୋଇଥିବା ଏକ ପ୍ରସଙ୍ଗ ବୋଲି କହିଥିଲେ।  କଂଗ୍ରେସ ଏକଜୁଟ ରହିଛି ବୋଲି କହିଥିଲେ। ଯେତେବେଳେ ସବୁକିଛି ଠିକ ଅଛି କି ବୋଲି ପଚରାଯିବାରୁ ସେ ଉତ୍ତର ଦେଲେ ଯେ ପୂର୍ବରୁ ସବୁକିଛି ଠିକ ଅଛି ଏବଂ ବର୍ତ୍ତମାନ ମଧ୍ୟ ଠିକ ଅଛି ।

ଏହାପୂର୍ବରୁ ଶୈଲଜା ମଧ୍ୟ କହିଥିଲେ ଯେ କଂଗ୍ରେସ ହାଇକମାଣ୍ଡ ମୁଖ୍ୟମନ୍ତ୍ରୀ ଭାବରେ ଯାହା ନିଷ୍ପତ୍ତି ନେବେ, ସେ ଏହାକୁ ଗ୍ରହଣ କରିବେ।

ଏହି ସମୟରେ ଏକ ଖବର ମଧ୍ୟ ଆସିଥିଲା ​​ଯେ ନିର୍ବାଚନ ପ୍ରଚାର ସମୟରେ କୁମାରୀ ଶୈଲଜାଙ୍କୁ ଭାରତୀୟ ଜନତା ପାର୍ଟି (ବିଜେପି) ପକ୍ଷରୁ ମଧ୍ୟ ଏକ ଅଫର ମିଳିଥିଲା। ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ତଥା କେନ୍ଦ୍ର ମନ୍ତ୍ରୀ ମନୋହର ଲାଲ ଖଟ୍ଟର ତାଙ୍କୁ ବିଜେପିରେ ଯୋଗଦେବାକୁ ନିମନ୍ତ୍ରଣ କରିଥିଲେ ମଧ୍ୟ ଶୈଲଜା ଏହି ଅଫର ପ୍ରତି  ଧ୍ୟାନ ଦେଇ ନ ଥିଲେ।

ଏବେ  ରାଜ୍ୟ ରାଜନୈତିକ ମହଲରେ ପ୍ରଶ୍ନ ଉଠୁଛି ଯେ, କୁମାରୀ ଶୈଲଜା ଏବଂ ସୋନିଆ ଗାନ୍ଧୀଙ୍କ ଏହି ବୈଠକ ମୁଖ୍ୟମନ୍ତ୍ରୀ ପଦବୀ ସମ୍ପର୍କରେ ହୋଇଛି କି? ସୋନିଆ ଗାନ୍ଧୀ ଶୈଲଜାଙ୍କ ନାମକୁ ଅନୁମୋଦନ କରିଛନ୍ତି ନା ନିର୍ବାଚନ ପରେ ଭୁପେନ୍ଦ୍ର ସିଂ ହୁଡା ମୁଖ୍ୟମନ୍ତ୍ରୀ ହେବେ ବୋଲି ବୁଝାଛନ୍ତି କି?

ହରିୟାଣା କଂଗ୍ରେସର ଗୋଟିଏ ଗୋଷ୍ଠୀ ଶୈଲଜାଙ୍କୁ ସମର୍ଥନ କରୁଥିବାବେଳେ ଅନ୍ୟ ଗୋଷ୍ଠୀ  ହୁଡାଙ୍କ ସପକ୍ଷରେ ଅଛନ୍ତି। ଏହି ବୈଠକ ମୁଖ୍ୟମନ୍ତ୍ରୀ ପଦବୀ ସମ୍ପର୍କରେ କଂଗ୍ରେସ ମଧ୍ୟରେ ଚାଲିଥିବା କଳ୍ପନାଜଳ୍ପନାକୁ ଅଧିକ ଇନ୍ଧନ ଯୋଗାଇଥିବା କୁହାଯାଉଛି।