ନୂଆ ବ୍ରିଟିସ ପ୍ରଧାନମନ୍ତ୍ରୀ କେୟର ଷ୍ଟାର୍ମର କିଏ?

ଲଣ୍ଡନ: ବ୍ରିଟେନର ସଂସଦୀୟ ନିର୍ବାଚନରେ ଲେବର ପାର୍ଟି ବିପୁଳ ବିଜୟ ହାସଲ କରିବା ପରେ କେୟର ଷ୍ଟାର୍ମର୍ ଶୁକ୍ରବାର ବ୍ରିଟେନର ପରବର୍ତ୍ତୀ ପ୍ରଧାନମନ୍ତ୍ରୀ ନିଯୁକ୍ତ ହୋଇଛନ୍ତି। ଋଷି ସୁନକ ଜାତୀୟ ନିର୍ବାଚନରେ ପରାଜୟ ସ୍ୱୀକାର କରିଛନ୍ତି। ଏହି ଫଳାଫଳ କଞ୍ଜର୍ଭେଟିଭ୍ ଦଳର ୧୪ ବର୍ଷ ଶାସନର ଅନ୍ତ ଘଟାଇଛି। ବ୍ରିଟେନର ଲେବର ନେତା କେୟର ଷ୍ଟାର୍ମର ଜଣେ ପୂର୍ବତନ ମାନବାଧିକାର ଆଇନଜୀବୀ ଓ ପବ୍ଲିକ ପ୍ରସିକ୍ୟୁଟର, ଯାହାଙ୍କୁ ଏବେ ଦେଶର ପରିସ୍ଥିତିକୁ ସୁଧାରିବା ପାଇଁ ବହୁ ପରିଶ୍ରମ କରିବାକୁ ପଡିବ। ୬୧ ବର୍ଷୀୟ ଷ୍ଟାର୍ମର ପ୍ରାୟ ଅର୍ଦ୍ଧଶତାବ୍ଦୀ ଭିତରେ ବ୍ରିଟିସ ପ୍ରଧାନମନ୍ତ୍ରୀ ହେବାରେ ସବୁଠାରୁ ବୟସ୍କ ବ୍ୟକ୍ତି ଏବଂ ପ୍ରଥମ ଥର ପାଇଁ ସଂସଦକୁ ନିର୍ବାଚିତ ହେବାର ମାତ୍ର ୯ ବର୍ଷ ପରେ ଏହି ସର୍ବୋଚ୍ଚ ପଦରେ ଅଧିଷ୍ଠିତ ହୋଇଛନ୍ତି। ୨୦୦୩ ମସିହାରେ ସେ ଉତ୍ତର ଆୟର୍ଲାଣ୍ଡରେ ପୁଲିସ ମାନବାଧିକାର ଆଇନ ପାଳନ କରିବାକୁ ସୁନିଶ୍ଚିତ କରିବା ପାଇଁ ପ୍ରଥମେ କାର୍ଯ୍ୟ କରିଥିଲେ। ପାଞ୍ଚ ବର୍ଷ ପରେ ଲେବର ଦଳର ଗର୍ଡନ ବ୍ରାଉନ୍ ପ୍ରଧାନମନ୍ତ୍ରୀ ଥିବା ବେଳେ ତାଙ୍କୁ ଇଂଲଣ୍ଡ ଓ ୱେଲ୍ସର ଡାଇରେକ୍ଟର ଅଫ୍ ପବ୍ଲିକ୍ ପ୍ରସିକ୍ୟୁସନ୍ (ଡିପିପି) ଭାବେ ନିଯୁକ୍ତ କରାଯାଇଥିଲା।

୨୦୦୮ରୁ ୨୦୧୩ ମଧ୍ୟରେ ଷ୍ଟାର୍ମର ସାଂସଦମାନେ ପାଣ୍ଠିର ଅପବ୍ୟବହାର କରିବା, ସାମ୍ବାଦିକ ଓ ଯୁବ ବିଦ୍ରୋହୀଙ୍କ ଫୋନ୍ ହ୍ୟାକିଂ କରିବା ଭଳି ମାମଲାର ତଦାରଖ କରିଥିଲେ। ରାଣୀ ଏଲିଜାବେଥ୍ ଦ୍ବିତୀୟ ତାଙ୍କୁ ନାଇଟ୍ ଉପାଧି ଦେଇଥିଲେ, କିନ୍ତୁ ସେ କ୍ବଚିତ୍ ଏହି ଉପାଧି ବ୍ୟବହାର କରନ୍ତି। ୨୦୧୫ରେ ସେ ବାମପନ୍ଥୀ ଉତ୍ତର ଲଣ୍ଡନର ଏକ ଆସନକୁ ପ୍ରତିନିଧିତ୍ୱ କରି ନିମ୍ନ ସଦନର ସଦସ୍ୟ ଭାବରେ ନିର୍ବାଚିତ ହୋଇଥିଲେ। ସେ ନିର୍ବାଚିତ ହେବାର କିଛି ସପ୍ତାହ ପୂର୍ବରୁ ତାଙ୍କ ମା’ ଏକ ବିରଳ ଗଣ୍ଠି ରୋଗରେ ମୃତ୍ୟୁବରଣ କରିଥିଲେ। ୨୦୨୦ରେ ବ୍ରିଟେନର ଲେବର ପାର୍ଟିର ନେତୃତ୍ୱ ନେବାକୁ କେୟର ଷ୍ଟାର୍ମର ନିର୍ବାଚିତ ହୋଇଥିଲେ, ଯେତେବେଳେ ଦଳ ୮୫ ବର୍ଷ ମଧ୍ୟରେ ସାଧାରଣ ନିର୍ବାଚନରେ ସବୁଠାରୁ ଖରାପ ପରାଜୟର ସମ୍ମୁଖୀନ ହୋଇଥିଲା। ଷ୍ଟାର୍ମର ଓ ଲେବର ଦଳ ମଧ୍ୟ ଟୋରି ଦଳ ଅଧୀନରେ ବର୍ଷ ବର୍ଷ ଧରି ଚାଲିଥିବା ଆର୍ଥିକ ଓ ରାଜନୈତିକ ବିଶୃଙ୍ଖଳାର ଫାଇଦା ଉଠାଇଛନ୍ତି, ଯେଉଁଥିପାଇଁ ଲୋକମାନେ ପରିବର୍ତ୍ତନ ଚାହୁଥିଲେ। ସେପ୍ଟେମ୍ବର ୨, ୧୯୬୨ରେ ଜନ୍ମଗ୍ରହଣ କରିଥିବା କେୟର ରଡ୍‌ନୀ ଷ୍ଟାର୍ମରଙ୍କର ତିନି ଭାଇଭଉଣୀ ଅଛନ୍ତି। ତାଙ୍କ ପିତାମାତା ପଶୁପ୍ରେମୀ ଥିଲେ ଯିଏ ଗଧମାନଙ୍କୁ ପାଳନ କରିଥିଲେ। ଜଣେ ପ୍ରତିଭାସମ୍ପନ୍ନ ସଙ୍ଗୀତଜ୍ଞ ଷ୍ଟାର୍ମର ବିଦ୍ୟାଳୟରେ ଭାୟୋଲିନ ଶିକ୍ଷା ଗ୍ରହଣ କରିଥିଲେ। ଲିଡ୍ସ ଓ ଅକ୍ସଫୋର୍ଡ ବିଶ୍ୱବିଦ୍ୟାଳୟରେ ଆଇନ ଅଧ୍ୟୟନ ପରେ ଷ୍ଟାର୍ମର ବାମପନ୍ଥୀ ଉଦ୍ଦେଶ୍ୟ ପ୍ରତି ଧ୍ୟାନ ଦେବା ସହ ଟ୍ରେଡ୍ ୟୁନିୟନ, ମ୍ୟାକ୍‌ଡୋନାଲ୍ଡ ବିରୋଧୀ କାର୍ଯ୍ୟକର୍ତ୍ତା ଏବଂ ବିଦେଶରେ ମୃତ୍ୟୁଦଣ୍ଡାଦେଶ ପାଇଥିବା କଏଦୀମାନଙ୍କୁ ରକ୍ଷା କରିବା ଦିଗରେ କାମ କରିଥିଲେ।