ନୂଆଦିଲ୍ଲୀ : କରୋନା ମହାମାରୀ କେବେ ଶେଷ ହେଲା ବୋଲି ଘୋଷଣା କରାଯିବ ? ଏନେଇ ବିଶ୍ବ ସ୍ବାସ୍ଥ୍ୟ ସଂଗଠନ (ହୁ)ର ଜନସ୍ବାସ୍ଥ୍ୟ ବିଶେଷଜ୍ଞମାନେ ବିଚାର ବିମର୍ଷ ଆରମ୍ଭ କରିଦେଇଛନ୍ତି । ବିଶ୍ବରେ କରୋନା ମହାମାରୀର ସଂକ୍ରମଣ ସ୍ତର କେଉଁ ଗୁରୁତ୍ବପୂର୍ଣ୍ଣ ମାଇଲଖୁଣ୍ଟ ଅତିକ୍ରମ କଲେ ତାହାକୁ ମହାମାରୀ ଶେଷ ହେଲା ବୋଲି ଧରାଯିବ, ସେ ସମ୍ପର୍କରେ ଆଲୋଚନା ଚାଲିଛି ।
Sambad is now on WhatsApp
Join and get latest news updates delivered to you via WhatsApp
ବିଶ୍ବ ସ୍ବାସ୍ଥ୍ୟ ସଂଗଠନର କୋଭିଡ୍ ସଂପର୍କିତ ଅନ୍ତର୍ଜାତୀୟ ଜରୁରୀକାଳୀନ ସ୍ବାସ୍ଥ୍ୟ ନିୟାମକ କମିଟିର ବିଶେଷଜ୍ଞମାନେ ବର୍ତ୍ତମାନ ସଂକ୍ରମଣର ସ୍ତର ଉପରେ ନଜର ରଖିଛନ୍ତି । ବିଶ୍ବର ଅନେକ ଦେଶରେ ସଂକ୍ରମଣ ହ୍ରାସ ପାଇଚାଲିଛି । ତେବେ ଚୀନରେ ଏବେ ସଂକ୍ରମଣ ପୁଣି ବୃଦ୍ଧି ପାଇଥିବା ଦେଖାଯାଉଛି । ସେହିପରି ଆମେରିକାରେ ସଂକ୍ରମଣ କମୁଥିଲେ ବି ତାହା ଚିନ୍ତାଜନକ ସ୍ତରରେ ରହିଛି । ଏସବୁ କଥାକୁ କମିଟି ବିଚାର କରୁଛି ।
ବିଶ୍ବରେ କରୋନା ମହାମାରୀ ଆରମ୍ଭ ହେବାର ଇତି ମଧ୍ୟରେ ଦୁଇ ବର୍ଷରୁ ଅଧିକ ବିତିଗଲାଣି । କୋଭିଡ୍ ସଂକ୍ରମଣ ୨୦୧୯ ଡିସେମ୍ବର ସୁଦ୍ଧା ଚୀନରେ ଆରମ୍ଭ ହୋଇଯାଇଥିଲେ ବି ବିଶ୍ବ ସ୍ବାସ୍ଥ୍ୟ ସଂଗଠନ (ହୁ) ଜାନୁଆରି ୩୦, ୨୦୨୦ରେ ଏହାକୁ ମହାମାରୀ ବା ପାଣ୍ଡେମିକ୍ ଘୋଷଣା କରିଥିଲା । ଏବେ ସଂକ୍ରମଣ ଅନେକ ହ୍ରାସ ପାଇଥିବାରୁ ପାଣ୍ଡେମିକକୁ ପ୍ରତ୍ୟାହାର କରି ଏଣ୍ଡେମିକ୍ ଘୋଷଣା କରାଯିବାକୁ ବିଚାର କରାଯାଉଛି । ଏଣ୍ଡେମିକର ଅର୍ଥ ହେଉଛି କରୋନା ଅଳ୍ପ କିଛି ଅଂଚଳରେ ସୀମିତ ରହିବା ।