ଟିଏମସି ସାଂସଦମାନେ କାହିଁକି ଭେଟିଲେ ଶରଦ ପାୱାରଙ୍କୁ?…

ନୂଆଦିଲ୍ଲୀ: ଏକ୍‌ଜିଟ୍‌ ପୋଲ୍‌ ପରେ ଷ୍ଟକ ବଜାରରେ ହୋଇଥିବା ହେରଫେରର ତଦନ୍ତ ଦାବିକୁ ସମର୍ଥନ କରିଥିବା ଏନସିପି (ଏସପି) ଅଧ୍ୟକ୍ଷ ଶରଦ ପାୱାରଙ୍କୁ ମଙ୍ଗଳବାର ତୃଣମୂଳ କଂଗ୍ରେସ (ଟିଏମସି) ସାଂସଦଙ୍କ ଏକ ପ୍ରତିନିଧି ଦଳ ଭେଟିଛନ୍ତି।

କଂଗ୍ରେସ ସାଂସଦ ରାହୁଲ ଗାନ୍ଧି ଅଭିଯୋଗ କରିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ‘ସବୁଠାରୁ ବଡ଼ ଷ୍ଟକ ବଜାର ଦୁର୍ନୀତି’ରେ ସିଧାସଳଖ ସମ୍ପୃକ୍ତ ଥିବା ବେଳେ ଚଳିତ ମାସ ପ୍ରାରମ୍ଭରେ ଲୋକସଭା ନିର୍ବାଚନ ଫଳାଫଳ ପରେ ବଜାର ହ୍ରାସ ଯୋଗୁଁ ଖୁଚୁରା ନିବେଶକମାନେ ୩୦ ଲକ୍ଷ କୋଟି ଟଙ୍କା ହରାଇଛନ୍ତି।

ତେବେ, ତାଙ୍କ ଅଭିଯୋଗକୁ ଭିତ୍ତିହୀନ ବୋଲି କହି ଭାରତୀୟ ଜନତା ପାର୍ଟି (ବିଜେପି) ଖଣ୍ଡନ କରିଛି। ଅନ୍ୟପକ୍ଷରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସ ମୁଖ୍ୟ ମମତା ବାନାର୍ଜୀ ନକଲି ଏକ୍‌ଜିଟ୍‌ ପୋଲ୍‌ ବ୍ୟବହାର କରି କିପରି ଷ୍ଟକ ବଜାରରେ ହେରଫେର ହୋଇଛି ତାହାର ତଦନ୍ତ ଦାବି କରିଛନ୍ତି।

ଏହି ପରିପ୍ରକ୍ଷୀରେ ମଙ୍ଗଳବାର ଶରଦ ପାୱାର କହିଛନ୍ତି, ‘ଅଲ୍‌ ଇଣ୍ଡିଆ ତୃଣମୂଳ କଂଗ୍ରେସର ସାଂସଦ କଲ୍ୟାଣ ବାନାର୍ଜୀ, ସାଗରିକା ଘୋଷ ଏବଂ ସାକେତ ଗୋଖଲେ ଏକଜିଟ୍‌ ପୋଲ୍‌ ସମୟରେ ଷ୍ଟକ ମାର୍କେଟ ହେରଫେରର ତଦନ୍ତ ଦାବି କରି ସେବି ଗସ୍ତ କରିବାକୁ ମୁମ୍ବାଇ ଆସିଛନ୍ତି। ଜାତୀୟତାବାଦୀ କଂଗ୍ରେସ ପାର୍ଟି- ଶରଦଚନ୍ଦ୍ର ପାୱାର, ଏନ୍‌ସିପି (ଏସ୍‌ପି) ଏହି କାମରେ ସେମାନଙ୍କୁ ସମର୍ଥନ କରୁଛି।’

ପାୱାର କହିଛନ୍ତି ଯେ ଟିଏମସି ସାଂସଦମାନେ ସକାଳେ ତାଙ୍କ ମୁମ୍ବାଇ ବାସଭବନକୁ ସୌଜନ୍ୟମୂଳକ ପରିଦର୍ଶନ କରିଥିଲେ। ବୈଠକରେ ଶିବସେନା ସାଂସଦ ଅରବିନ୍ଦ ସାୱନ୍ତ, ଶରଦ ପାୱାରଙ୍କ ଝିଅ ଏନସିପି (ଏସପି) ସାଂସଦ ସୁପ୍ରିୟା ସୁଲେ ଏବଂ ପୂର୍ବତନ ଏମଏଲସି ବିଦ୍ୟା ଚୌହାନ ମଧ୍ୟ ଉପସ୍ଥିତ ଥିଲେ।

ସମ୍ବନ୍ଧିତ ଖବର