ତେହେରାନ : ମଧ୍ୟପ୍ରାଚ୍ୟରେ ଆଉ ଏକ ଅଂଚଳରେ ଆଶାନ୍ତି ଦେଖାଦେଇଛି । ଇରାକ ଅଧିନସ୍ଥ କୁର୍ଦ୍ଦିସ୍ତାନ ଉପରେ ଇରାନର ରିଭୋଲ୍ୟୁସନାରି ଗାର୍ଡସମାନେ ଡ୍ରୋନ ଓ ବିମାନରେ ଆକ୍ରମଣ ଆରମ୍ଭ କରିଦେଇଛନ୍ତି । ଇରାନରେ ଚାଲିଥିବା ଆନ୍ଦୋଳନକୁ କୁର୍ଦ୍ଦ ବିଦ୍ରୋହୀମାନେ ସହାୟତା ଦେଉଥିବା ଇରାନ ଅଭିଯୋଗ କରୁଛି । ଏହି କାରଣରୁ କୁର୍ଦ୍ଦିସ୍ତାନ ଉପରେ ଆକ୍ରମଣ କରୁଛି ବୋଲି କୁହାଯାଉଛି ।
Sambad is now on WhatsApp
Join and get latest news updates delivered to you via WhatsApp
ଇରାନର ଯୁବତୀମାନେ ଇରାନର ପଶ୍ଚିମରେ ଥିବା କୁର୍ଦ୍ଦିସ୍ତାନ ବିଦ୍ରୋହୀମାନଙ୍କ ସହ ହାତ ମିଳାଇ ଅସ୍ତ୍ରଶସ୍ତ୍ର ତାଲିମ ନେଉଛନ୍ତି ବୋଲି ଇରାନ ଅଭିଯୋଗ କରିଛି । ଚଳିତ ମାସ ଆରମ୍ଭରେ କେତେକ ଯୁବତୀ ବୋମା ବିସ୍ଫୋରଣ କରିବା ପରେ ଇରାନ ସରକାରଙ୍କ ଚିନ୍ତା ବଢିଯାଇଥିଲା । କୁର୍ଦ୍ଦ ବିଦ୍ରୋହୀମାନେ ହିଁ ଏହି ଯୁବତୀମାନଙ୍କୁ ବିସ୍ଫୋରକ ତାଲିମ ଦେଇଥିବା ଇରାନ ଦାବି କରିଛି ।
ଅନ୍ୟପକ୍ଷରେ ଇରାନରେ ଚାଲିଥିବା ଆନ୍ଦୋଳନ ଏବେ ବି ଜାରି ରହିଛି । ଏହି ଆନ୍ଦୋଳନ ଇତି ମଧ୍ୟରେ ୪୦ ଦିନରେ ପ୍ରବେଶ କରିଛି । ଇରାନ ସରକାର ଆନ୍ଦୋଳନକାରୀଙ୍କୁ କଠୋର ହସ୍ତରେ ଦମନ କରୁଥିଲେ ବି ଆନ୍ଦୋଳନ ଜାରି ରହିଛି ।
ସୂଚନାଯୋଗ୍ୟ ଯେ, ସେପ୍ଟେମ୍ବର ମାସ ୨ୟ ସପ୍ତାହରେ ଇରାନର ରାଜଧାନୀ ତେହେରାନ ବୁଲିବାକୁ ଆସିଥିବା ମାସା ଅମିନି ନାମକ ଜଣେ ୨୨ ବର୍ଷୀୟା ଯୁବତୀ ଠିକଭାବେ ହିଜାବ ପିନ୍ଧିନଥିବାରୁ ମୋରାଲ ପୁଲିସ ( ଧାର୍ମିକ ବ୍ୟାପାର ସଂପର୍କିତ ପୁଲିସ) ଗିରଫ କରିଥିଲା । ହାଜତରେ ତାଙ୍କୁ ପ୍ରବଳ ମାଡ଼ ମରାଯିବା ପରେ ସେପ୍ଟେମ୍ବର ୧୫ ତାରିଖରେ ତାଙ୍କର ମୃତ୍ୟୁ ହୋଇଥିଲା । ଏହା ପରେ ଆନ୍ଦୋଳନ ଆରମ୍ଭ ହୋଇଥିଲା । କୁହାଯାଉଛି ଯେ ଅମିନି ଜଣେ କୁର୍ଦ୍ଦ ଥିଲେ ।