ପେଟିଏମ ଉପରେ କାହିଁକି କଟକଣା ଲଗାଇଲା ରିଜର୍ଭ ବ୍ୟାଙ୍କ ?

ନୂଆଦିଲ୍ଲୀ: ଭାରତୀୟ ରିଜର୍ଭ ବ୍ୟାଙ୍କ ୩୧ ଜାନୁଆରୀ ୨୦୨୪ରେ ପେଟିଏମ୍ ପେମେଣ୍ଟ ବ୍ୟାଙ୍କ ଉପରେ କଟକଣା ଲଗାଇଥିଲା। ସେବେଠାରୁ ଏବେ ପେଟିଏମ୍ ର କ'ଣ ହେବ ତାହା ସମସ୍ତେ ଜାଣିବାକୁ ଚାହୁଁଛନ୍ତି। ଫେବୃଆରୀ ୨୯ ପରେ ବନ୍ଦ ହେବ ପେଟିଏମ୍ ? ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ମଧ୍ୟ ଆଜି ମୁଦ୍ରାନୀତି ଘୋଷଣା ପରେ ପେଟିଏମ୍ ରେ ଅନେକ କଥା କହିଛି। ରିଜର୍ଭ ବ୍ୟାଙ୍କ କହିଛି ଯେ ପେଟିଏମ ପେମେଣ୍ଟ ବ୍ୟାଙ୍କ ବିଭିନ୍ନ ନିୟମକୁ ବାରମ୍ବାର ଉଲ୍ଲଙ୍ଘନ କରିଚାଲିଥିଲା ।

ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ଗଣମାଧ୍ୟମକୁ କହିଛନ୍ତି ଯେ ଉଲ୍ଲଂଘନର ଗମ୍ଭୀରତାକୁ ଦୃଷ୍ଟିରେ ରଖି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ସେ କହିଛନ୍ତି ଯେ ଆରବିଆଇ ଦ୍ୱାରା ନିଆଯାଇଥିବା କୌଣସି ପଦକ୍ଷେପ ଶୃଙ୍ଖଳିତ ସ୍ଥିରତା, ଗ୍ରାହକଙ୍କ ସ୍ୱାର୍ଥରକ୍ଷା ପାଇଁ ସର୍ବୋତ୍ତମ ସ୍ୱାର୍ଥରେ ଅଟେ । କହିଛନ୍ତି ଯେ ଯଦି ସବୁ କିଛି ପାଳନ କରାଯାଏ, ତେବେ କେନ୍ଦ୍ରୀୟ ବ୍ୟାଙ୍କ କୌଣସି ନିୟନ୍ତ୍ରିତ ସଂସ୍ଥା ବିରୋଧରେ କାହିଁକି କାର୍ଯ୍ୟାନୁଷ୍ଠାନ ଗ୍ରହଣ କରିବ? ସେ ଆହୁରି ମଧ୍ୟ କହିଛନ୍ତି ଯେ ପେଟିଏମ ସମ୍ପର୍କରେ ଲୋକମାନଙ୍କ ମନରେ ଅନେକ ପ୍ରଶ୍ନ ରହିଥିବାରୁ ସେ ସମ୍ପର୍କରେ ଆସନ୍ତା ସପ୍ତାହରେ ଏକ ଏଫଏକ୍ୟୁ ଜାରି କରାଯିବ ।

ସେହିପରି ଆରବିଆଇ ଡେପୁଟି ଗଭର୍ଣ୍ଣର ସ୍ୱାମୀନାଥନ ଜେ କହିଛନ୍ତି ଯେ ପେଟିଏମ୍ ଉପରେ ନଜର ରଖାଯାଇଛି ଏବଂ ଆଗକୁ ଉପଯୁକ୍ତ ପଦକ୍ଷେପ ନିଆଯିବ।