‘ଯୋଗୀ ଫ୍ୟାକ୍ଟର’ କାମଦେଲାନି କାହିଁକି?

ଲକ୍ଷ୍ନୌ: ଉତ୍ତରପ୍ରଦେଶରେ ବିଜେପିକୁ ଯେଉଁ ଝଟକା ଲାଗିଛି, ତାହା ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ପାଇଁ ଆଶ୍ଚର୍ଯ୍ୟଜନକ ରିଅଲିଟି ଚେକ୍ ବା ‘ବାସ୍ତବିକତାର ଯାଞ୍ଚ’ ଭାବେ ଆସିଛି। ମୋଦୀ ଫ୍ୟାକ୍ଟର ବ୍ୟତୀତ କଡ଼ା ଆଇନଶୃଙ୍ଖଳା, ବିକାଶ ଓ ଆକ୍ରମଣାତ୍ମକ ହିନ୍ଦୁତ୍ୱର ମିଶ୍ରଣ ବା ‘ଯୋଗୀ ଫ୍ୟାକ୍ଟର’ ରୂପକ ଯେଉଁ ଶକ୍ତିଶାଳୀ ପିଚ୍ ବ୍ୟବହାର କରିଥିଲା ବିଜେପି, ତାହା ପ୍ରଚାର ସମୟରେ ପ୍ରବଳ କମ୍ପନ ସୃଷ୍ଟି କରିଥିଲା।

କିନ୍ତୁ ଏଥର ‘ଡବଲ୍ ଇଞ୍ଜିନ୍’ ଭୁଶୁଡ଼ି ପଡ଼ିଲା ଏବଂ ସପା ମୁଖ୍ୟ ଅଖିଳେଶ ଯାଦବ ପଛୁଆ, ଦଳିତ ଓ ସଂଖ୍ୟାଲଘୁଙ୍କୁ ଟାର୍ଗେଟ କରି ଏଥର ବାଜି ମାରିନେଲା। ତା' ପୂର୍ବରୁ ପଛକୁ ପଛ କ୍ରମାଗତ ୫ଟି ନିର୍ବାଚନରେ ବିଜେପିର କ୍ରମାଗତ ବିଜୟ ପାଇଁ ଯୋଗୀଙ୍କୁ ଶ୍ରେୟ ଦିଆଯାଇଥିଲା- ୨୦୧୭ ଓ ୨୦୨୨ ରାଜ୍ୟ ନିର୍ବାଚନ, ୨୦୧୯ ଲୋକସଭା ନିର୍ବାଚନ ଏବଂ ଦୁଇଟି ସ୍ଥାନୀୟ ସଂସ୍ଥା ନିର୍ବାଚନ। ଜଣେ ରାଜନୈତିକ ପର୍ଯ୍ୟବେକ୍ଷକ କହନ୍ତି, ଯେହେତୁ ଯୋଗୀଙ୍କୁ ବିଜୟର ଶ୍ରେୟ ଦିଆଯାଇଥିଲା, ତେଣୁ ତାଙ୍କୁ ନିରାଶାଜନକ ପ୍ରଦର୍ଶନର ଦାୟିତ୍ୱ ମଧ୍ୟ ନେବାକୁ ପଡ଼ିବ, କିନ୍ତୁ ତାଙ୍କୁ ବଳିବୋଦା କରାଯାଇପାରିବ ନାହିଁ। ଲୋକଙ୍କ ସରକାର ବିରୋଧୀ ଆଭିମୁଖ୍ୟକୁ ଅଣଦେଖା କରି ଯେଉଁ ନେତାଙ୍କ ବିରୋଧରେ ଜନ-ଅସନ୍ତୋଷ ରହିଥିଲା, ସେମାନଙ୍କୁ ପ୍ରାର୍ଥୀ କରାଯାଇଥିଲା।

ପରାଜୟର ଏହା ହେଉଛି ଅନ୍ୟତମ ମୁଖ୍ୟ କାରଣ। ଦଳର ଆଭ୍ୟନ୍ତରୀଣ ସୂତ୍ରରୁ ପ୍ରକାଶ ଯେ ପ୍ରାର୍ଥୀ ଚୟନ ଦାୟିତ୍ୱ କେନ୍ଦ୍ରୀୟ ନେତୃତ୍ୱଙ୍କ ଉପରେ ଥିବାରୁ ଏଥିରେ ଯୋଗୀଙ୍କର କିଛି ଦୋଷ ନାହିଁ। ପ୍ରାର୍ଥୀ ଚୟନରେ ତାଙ୍କର କୌଣସି ଭୂମିକା ନ ଥିଲା। ଯେଉଁମାନେ ସେମାନଙ୍କ ବିରୋଧରେ କ୍ରୋଧ ଥିବା ସତ୍ତ୍ୱେ ବିଜୟୀ ହୋଇଛନ୍ତି ସେମାନେ ନିଶ୍ଚିତ ଭାବରେ ଯୋଗୀଙ୍କ ଅବଦାନ ସହିତ ମୋଦୀ ଫ୍ୟାକ୍ଟରକୁ ଶ୍ରେୟ ଦେବେ।