ଆହତ ସ୍ୱାମୀଙ୍କୁ ଡାକ୍ତରଖାନାକୁ ପିଠିରେ ବୋହି ନେଲେ ସ୍ତ୍ରୀ: ଭିଡିଓ ଭାଇରାଲ

ଭୋପାଳ: କୁହାଯାଇଛି ଯେ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଥିବା ନିବିଡ଼ତା ଏବଂ ପ୍ରେମ ଜନ୍ମଜନ୍ମାନ୍ତରର ବୋଲି କୁହାଯାଇଥାଏ। ଦାମ୍ପତ୍ୟ ଜୀବନର ଏହି କର୍ତ୍ତବ୍ୟ ପାଳନ କରିବାର ମଧ୍ୟପ୍ରଦେଶର ଭିଣ୍ଡ ଜିଲ୍ଲାରେ ଏକ ହୃଦୟସ୍ପର୍ଶୀ ଚିତ୍ର ସାମ୍ନାକୁ ଆସିଛି। ଭିଡିଓରେ ଜଣେ ମହିଳା ତାଙ୍କ ସ୍ୱାମୀଙ୍କୁ ଚିକିତ୍ସା ପାଇଁ ନିଜ ପିଠିରେ ଭିଣ୍ଡର ଜିଲ୍ଲା ଡାକ୍ତରଖାନାକୁ ନେଉଥିବାର ନଜର ଆସିଛନ୍ତି। ମହିଳାଙ୍କ ସ୍ୱାମୀଙ୍କ ଗୋଡରେ ଆଘାତ ଲାଗିଛି ଏବଂ ସେ ଚାଲିବାକୁ ଅସମର୍ଥ ଥିବା ଜଣାପଡିଛି।

ଶାଢ଼ି ପିନ୍ଧି ଓଢ଼ଣୀ ଦେଇ ମହିଳା ଜଣକ ସ୍ବାମୀଙ୍କ ପ୍ରତି ନିଜର କର୍ତ୍ତବ୍ୟ ଏବଂ ଦାୟିତ୍ବବୋଧ ପ୍ରଦର୍ଶନ କରିଛନ୍ତି। ମହିଳା ଜଣକ ହୃଦୟଙ୍ଗମ କଲେ ଯେ ତାଙ୍କ ସ୍ୱାମୀଙ୍କ ଚିକିତ୍ସାରେ ବିଳମ୍ବ ହେଉଛି। ମହିଳା ଜଣକ ଡାକ୍ତରଖାନାର ବିଶୃଙ୍ଖଳାର ଶିକାର ହେବାକୁ ଉଚିତ୍ ମନେ କରି ନ ଥିଲେ। ସ୍ୱାମୀଙ୍କୁ ତାଙ୍କ ପିଠିରେ ବୋହି ନେଇ ଚିକିତ୍ସା ପାଇଁ ଡାକ୍ତରଖାନା ଭିତରକୁ ସେ ଯାଇଥିଲେ। ଏହି ସମୟରେ ଡାକ୍ତରଖାନାରେ ଉପସ୍ଥିତ ବ୍ୟକ୍ତି ଏହି ବିରଳ ତଥା ସୁନ୍ଦର ଦୃଶ୍ୟର ଏକ ଭିଡିଓ ପ୍ରସ୍ତୁତ କରିଥିଲେ। ଏହି ଭିଡିଓ ସୋସିଆଲ ମିଡିଆରେ ଏବେ ଭାଇରାଲ ହେବାରେ ଲାଗିଛି ଏବଂ ଲୋକମାନେ ମହିଳାଙ୍କ ସାହସକୁ ପ୍ରଶଂସା କରୁଛନ୍ତି।

ଏନକ୍ୟୁଏଏସ ଅର୍ଥାତ୍ ଜାତୀୟ ଗୁଣବତ୍ତା ନିଶ୍ଚିତତା ମାନାଙ୍କ ସର୍ଭେରେ ଦେଶରେ ଏକ ନମ୍ବର ସ୍ଥାନ ପାଇଥିବା ଭିଣ୍ଡ ଜିଲ୍ଲା ହସ୍ପିଟାଲରେ ଚିକିତ୍ସା ପାଇଁ ଜଣେ ମହିଳା ତାଙ୍କ ସ୍ୱାମୀଙ୍କୁ ଡାକ୍ତରଖାନା ପରିସରକୁ ନିଜ ପିଠିରେ ବ‌ୋହି ନେଉଥିବାର ଚିତ୍ର ଡାକ୍ତରଖାନା ପ୍ରଶାସନର ସେବା ବ୍ୟବସ୍ଥାକୁ ଖୁଲାସା କରିଛି।

ପର୍ଯ୍ୟାପ୍ତ ଷ୍ଟ୍ରେଚର, ଆମ୍ବୁଲାନ୍ସ ଏବଂ ଅନ୍ୟାନ୍ୟ ଆବଶ୍ୟକୀୟ ସୁବିଧା ଥିବା ସତ୍ତ୍ବେ ମହିଳାଙ୍କୁ ତାଙ୍କ ସ୍ୱାମୀଙ୍କୁ ନିଜ ପିଠିରେବୋହି ନେବାକୁ ପଡିଲା । ଡାକ୍ତରଖାନା ପରିଚାଳନା ଏ ବିଷୟରେ ଜାଣିବା ମାତ୍ରେ ହସ୍ପିଟାଲର ମ୍ୟାନେଜର ସାକେତ ଚୌରାସିଆଙ୍କୁ ସିଭିଲ୍ ସର୍ଜନ ଡାକ୍ତର ଜେ.ଏସ୍ ଯାଦବ ନୋଟିସ୍ ଜାରି କରିଥିଲେ।

ଜିଲ୍ଲା ଡାକ୍ତରଖାନାରେ ପର୍ଯ୍ୟାପ୍ତ ସଂଖ୍ୟକ ଷ୍ଟ୍ରେଚର ଏବଂ ହ୍ୱିଲ ଚେୟାର ଉପଲବ୍ଧ ବୋଲି କୁହାଯାଉଛି। କିନ୍ତୁ ଅନିୟମିତତା ଯୋଗୁ ରୋଗୀଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡିଲା। ଏହି ପ୍ରସଙ୍ଗରେ ଯେତେବେଳେ ଡାକ୍ତରଖାନା ପରିଚାଳକ ସାକେତ ଚୌରାସିଆଙ୍କ ସହ କଥାବାର୍ତ୍ତା କରିବାକୁ ଚେଷ୍ଟା କରାଯାଇଥିଲା, ସେତେବେଳେ ସେ କିଛି କହିବା ପରିବର୍ତ୍ତେ କ୍ୟାମେରା ଆଗରୁ ଦୌଡ଼ି ପଳାଇଥିବାର ଦେଖାଯାଇଥିଲା।