ନିଶା ନେବା ଅଭ୍ୟାସ ଛଡାଇବା ପାଇଁ ତାନ୍ତ୍ରିକକୁ ଡାକି ସ୍ବାମୀର ହତ୍ୟା କଲା ସ୍ତ୍ରୀ

ଶାହଜହାଁପୁର: ନିଶା ନେବା ଅଭ୍ୟାସ ଛଡାଇବା ପାଇଁ ତାନ୍ତ୍ରିକକୁ ଡାକି ସ୍ବାମୀର ହତ୍ୟା କଲା ସ୍ତ୍ରୀ। ୟୁପିର ଶାହଜହାଁପୁରରେ ଘଟିଛି ଏଭଳି ଆଶ୍ଚର୍ଯ୍ୟ କଲା ଭଳି ଘଟଣା। କିଛି ଦିନ ତଳେ ଜଣେ ଯୁବକଙ୍କୁ ଅପହରଣ କରି ହତ୍ୟା କରାଯାଇଥିଲା। ତାଙ୍କ ମୃତଦେହ ମିଳିବା ପରେ ପୁଲିସ ତଦନ୍ତ କରିବାରୁ ହତ୍ୟା ପଛରେ ପତ୍ନୀଙ୍କ ହାତ ଥିଲା ବୋଲି ଜଣାପଡ଼ିଛି। ମୃତକଙ୍କ ମୃତଦେହ ବରେଲିର ରେଳ ଟ୍ରାକରୁ ମିଳିଥିବା ବେଳେ ଏହି ମାମଲାରେ ପୁଲିସ ଯୁବକଙ୍କ ପତ୍ନୀ ଏବଂ ଭାଉଜଙ୍କ ସମେତ ୬ଜଣ ଅଭିଯୁକ୍ତଙ୍କୁ ଗିରଫ କରିଛି।

ସୂଚନା ମୁତାବକ, ଜଲାଲାବାଦ ପୁଲିସ ଷ୍ଟେସନର ଗୌସ ନଗର ସହରରେ ରହୁଥିବା ମୃତକ ସୁରଜିତ ମଦ୍ୟପାନ କରୁଥିଲେ। କାମ କରି ସେ ଯାହା ବି ରୋଜଗାର କରୁଥିଲେ ସେସବୁ ଟଙ୍କା ସେ ମଦ ପିଇବାରେ ଖର୍ଚ୍ଚ କରୁଥିଲେ। ମଦ ଛାଡ଼ିବାକୁ ବାରମ୍ବାର କହିବା ପରେ ସୁରଜିତ ମଦ ନଛାଡ଼ିବାରୁ ତାଙ୍କ ପତ୍ନୀ ବିମଳା ତାନ୍ତ୍ରିକ ଇରଫାନଙ୍କୁ ଭେଟିଥିଲେ। ପ୍ରଥମେ ସେ ମନ୍ତ୍ର ତନ୍ତ୍ର ମାଧ୍ୟମରେ ମଦ ପିଇବା ଅଭ୍ୟାସ ଛଡ଼ାଇବା ପାଇଁ ଚେଷ୍ଟ କରିଥିଲେ ବି ସୁରଜିତ ମଦ ପିଇବା ଛାଡ଼ିନଥିଲେ।

ଏହା ପରେ ତାଙ୍କ ପତ୍ନୀ ବିମଳା ତାଙ୍କ ସ୍ୱାମୀଙ୍କୁ ରାସ୍ତାରୁ ହଟାଇବା ପାଇଁ ତାନ୍ତ୍ରିକ ସହିତ କଥା ହୋଇଥିଲେ। ଏହି ହତ୍ୟାକାଣ୍ଡ ପାଇଁ ତାନ୍ତ୍ରିକଙ୍କୁ ତାଙ୍କ ପତ୍ନୀ ଏବଂ ଭାଉଜ ୨ ଲକ୍ଷ ଟଙ୍କା ଦେଇଥିଲେ। ଏହା ପରେ ତାନ୍ତ୍ରିକଙ୍କ ଚାରିଜଣ ସାଥୀ ତାଙ୍କୁ ମଦ ପିଇବାକୁ ଡାକି ଅପହରଣ କରିନେବା ସହ ବରେଲିକୁ ନେଇ ତାଙ୍କୁ ହତ୍ୟା କରିଥିଲେ। ହତ୍ୟା ପରେ ସୁରଜିତଙ୍କୁ ରେଳ ଧାରଣାରେ ଫିଙ୍ଗି ଦେଇଥିଲେ ଅଭିଯୁକ୍ତ। ଘଟଣାର କିଛି ଦିନ ପ‌ରେ ତାନ୍ତ୍ରିକ ବାକି ଥିବା ଟଙ୍କା ବିମଳାଙ୍କଠାରୁ ନେବାକୁ ଆସିଥିବା ବେଳେ ସୁରଜିତଙ୍କ ପରିବାର ଲୋକ ତାକୁ କାବୁ କରି ପୁଲିସ ହାତରେ ଦେଇଥିଲେ। ଏହା ପରେ ପୁଲିସ ତାନ୍ତ୍ରିକକୁ ପଚରାଉଚରା କରିବାରୁ ସବୁ ସତ ସାମ୍ନାକୁ ଆସିଥିଲା।