ଚୋରି ଟଙ୍କାରେ ସ୍ୱାମୀ ନିର୍ମାଣ କଲେ ଗାଁ ରାସ୍ତା, ପଞ୍ଚାୟତ ନିର୍ବାଚନରେ ଜିତିଗଲେ ପତ୍ନୀ
ପାଟନା: ଯେତିକି ଟଙ୍କା ଚୋରି କରୁଥିଲେ, ସେତିକି ଟଙ୍କା ଗାଁର ବିକାଶରେ ଖର୍ଚ୍ଚ କରୁଥିଲେ | ଗାଁକୁ ରାସ୍ତା ଖଣ୍ଡେ ନଥିବାବେଳେ ଚୋରି ଟଙ୍କାରେ ଗାଁକୁ ପକ୍କା ରାସ୍ତା କରିଥିଲେ | କେବଳ ନିଜ ଗାଁ ନୁହେଁ ବରଂ ଆଖପାଖ ୭ଟି ଗାଁର ରାସ୍ତାକୁ ପକ୍କା କରିଥିଲେ କୁଖ୍ୟାତ ଡକାୟତ | ୧୨ଟି ରାଜ୍ୟର ପୁଲିସ ଖୋଜୁଥିବାରୁ ଗାଁକୁ ଆସୁନଥିଲେ ସତ କିନ୍ତୁ ବିଭିନ୍ନ ମାଧ୍ୟମରେ ରାସ୍ତା ନିର୍ମାଣ ପାଇଁ ୧ କୋଟି ଟଙ୍କା ପଠାଇଥିଲେ | ତାଙ୍କ ଟଙ୍କାରେ ପତ୍ନୀ ଗାଁର ବିକାଶ କଥା ବୁଝୁଥିଲେ, ଆଉ ଫଳସ୍ୱରୂପ ଆଜି ଡ଼କାୟତଙ୍କ ପତ୍ନୀ ପଞ୍ଚାୟତ ନିର୍ବାଚନରେ ବିଜୟୀ ହୋଇଛନ୍ତି | ଲୋକଙ୍କ ବିଶ୍ୱାସ ଜିତିଛନ୍ତି, ଆଉ ସରକାରଙ୍କ ବିକାଶ ଅପେକ୍ଷା ଭୋଟର ଡ଼କାୟତଙ୍କ ବିକାଶ ମଡେଲକୁ ଅଧିକ ପସନ୍ଦ କରିଛନ୍ତି | ଆଜି ଆମେ ଆପଣଙ୍କୁ ଏମିତି ଜଣେ ଡ଼କାୟତଙ୍କ ବାବଦରେ କହିବୁ ଯାହାଙ୍କ ପତ୍ନୀ ଆଜି ବିହାରର ପଞ୍ଚାୟତ ନିର୍ବାଚନରେ ବିଜେତା ହୋଇଛନ୍ତି | ୧୧ ବର୍ଷ ପରେ ଗତକାଲି ଗାଜିଆବାଦ ପୁଲିସ ହାତରେ ଧରାପଡିଥିଲା କୁଖ୍ୟାତ ଡକାୟତ ଇରଫାନ୍ ଓରଫ ଉଜାଲେ |
Sambad is now on WhatsApp
Join and get latest news updates delivered to you via WhatsApp
ଉଜାଲେ ନାମରେ ବିଭିନ୍ନ ରାଜ୍ୟରେ ୨୦ରୁ ଅଧିକ ମାମଲା ପଞ୍ଜିକୃତ ହୋଇଥିଲା। ପୁଲିସ ତା ନିକଟରୁ କୋଟି କୋଟି ଟଙ୍କା ମୂଲ୍ୟର ଅଳଙ୍କାର ଜବତ କରିଥିଲା । ତେବେ କିଛି ଦିନତଳେ ଇରଫାନଙ୍କ ପତ୍ନୀ ଏବଂ ଜଣେ ପ୍ରେମିକାଙ୍କ ସମେତ ପୁଲିସ ୧୧ ଜଣ ସହଯୋଗୀଙ୍କୁ ଗିରଫ କରିଥିଲା | ଅବଶ୍ୟ ଇରଫାନଙ୍କ ପତ୍ନୀ ଜାମିନରେ ଖଲାସ ହୋଇ ବିହାରର ପୂପରି ଜିଲ୍ଲାପରିଷଦ ଆସନରୁ ନିର୍ବାଚନ ଲଢ଼ିଥିଲେ | ଆଉ ଆଜି ଫଳାଫଳ ଘୋଷଣା ହେବା ପରେ ସେ ବିଜୟୀ ହୋଇଥିବାର ଜଣାପଡିଛି | ଇରଫାନଙ୍କ କାହାଣୀ ମଧ୍ୟ ବହୁତ ରୋଚକ | ଗ୍ରାମବାସୀଙ୍କ କହିବା ମୁତାବକ ଇରଫାନ୍ ଏବଂ ତାଙ୍କ ପରିବାର ପୂର୍ବରୁ ଶ୍ରମିକ ଭାବରେ କାମ କରୁଥିଲେ | ତାଙ୍କ ପାଖରେ ମୁଣ୍ଡ ଗୁଞ୍ଜିବା ପାଇଁ କେବଳ ଗୋଟିଏ କୁଡ଼ିଆ ଥିଲା |
ଯେତେବେଳେ ସେ କାମ ପାଇଲେ ନାହିଁ, ଘର ଛାଡି ପଳାଇଯାଇଥିଲେ | ଘର ଛାଡି ସେ ଦେଶର ବିଭିନ୍ନ ସ୍ଥାନରେ ଚୋରି କରିବା ଆରମ୍ଭ କରିଥିଲେ | ପୁଲିସକୁ ଚକମା ଦେଇ ଚୋରି କରିଥିଲେ | କିଛି ଦିନ ପରେ ସେ ଗାଁକୁ ଆସି ରାସ୍ତା ନିର୍ମାଣ ସହ ଡ୍ରେନ ନିର୍ମାଣ କରାଇଥିଲେ | ଗାଁରେ ଯେଉଁ ପରିବାର ନିଜର ଝିଅ ବିବାହ କରିପାରୁନଥିଲେ ସେମାନଙ୍କୁ ସାହାଯ୍ୟ ସହ ରୋଗୀଙ୍କ ଚିକିତ୍ସା ପାଇଁ ମଧ୍ୟ ଟଙ୍କା ଖର୍ଚ୍ଚ କରୁଥିଲେ | ଆଉ ଯେତେବେଳେ ପୁଲିସ ତାଙ୍କୁ ଗିରଫ କରିଥିଲା ସେତେବେଳେ ହିଁ ଗାଁ ଲୋକ ତାଙ୍କ ଚୋରି ବାବଦରେ ଜାଣିଥିଲେ | ସୂଚନା ଥାଉ କି ଇରଫାନ୍ ଦେଶର ବିଭିନ୍ନ ସହରଗୁଡିକର ବଡ ଘରକୁ ଟାର୍ଗେଟ୍ କରୁଥିଲେ | କାମର ବାହାନା କରି ଘରେ ପ୍ରବେଶ କରି ସେ ସୁନା ଅଳଙ୍କାର ଲୁଟିନେଉଥିଲେ |