ବରିଷ୍ଠ ଆଇପିଏସ ଅଫିସର ରାଜେଶ ଦାସଙ୍କ ବିରୋଧରେ ଯୌନ ଶୋଷଣ ଅଭିଯୋଗ ଆଣିଲେ ମହିଳା ଆଇପିଏସ ଅଧିକାରୀ
ଚେନ୍ନାଇ: ଡିଜି ରାଙ୍କର ଜଣେ ଅଫିସରଙ୍କ ବିରୋଧରେ ଯୌନ ଶୋଷଣ ଭଳି ସଙ୍ଗୀନ ଅଭିଯୋଗ ଆଣିଛନ୍ତି ମହିଳା ଆଇପିଏସ ଅଧିକାରୀ | ତାମିଲନାଡୁର ଜଣେ ମହିଳା ଆଇପିଏସ ଅଧିକାରୀ ଆଇନ ଓ ବ୍ୟବସ୍ଥାର ସ୍ୱତନ୍ତ୍ର ପୁଲିସ ଡିଜି ରାଜେଶ ଦାସଙ୍କ ବିରୋଧରେ ଯୌନ ଶୋଷଣର ଅଭିଯୋଗ ଆଣିଛନ୍ତି | ଆଉ ଏହାକୁ ତଦନ୍ତ କରିବା ପାଇଁ ତାମିଲନାଡୁ ଗୃହ ବିଭାଗ ପକ୍ଷରୁ ୬ ଜଣିଆ କମିଟି ଗଠନ କରାଯାଇଛି | ଗୃହ ବିଭାଗର ସଚିବ ଏସ.କେ ପ୍ରଭାକର କହିଛନ୍ତି ଯେ ମହିଳା ଯୌନ ଉତ୍ପୀଡ଼ନ ଆଇନ-୨୦୧୩ ଅନୁଯାୟୀ କମିଟି ଗଠନ କରାଯାଇଛି |
Sambad is now on WhatsApp
Join and get latest news updates delivered to you via WhatsApp
ତାମିଲନାଡୁ ଗୃହ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ମହିଳା ଆଇପିଏସ ଅଧିକାରୀ ରାଜେଶ ଦାସଙ୍କ ବିରୋଧରେ ଅସଦାଚରଣର ଅଭିଯୋଗ ଆଣିଥିଲେ | ତେବେ ଏହି ଘଟଣାକୁ ନେଇ ତାମିଲନାଡୁରେ ରାଜନୀତି ଜୋର ଧରିଛି | ତାମିଲନାଡୁର ବିରୋଧୀ ଦଳ ଡ଼ିଏମକେ ପକ୍ଷରୁ କୁହାଯାଇଛି ଯେ ଏଆଇଡିଏମକେ ଶାସନ ସମୟରେ ଜଣେ ରକ୍ଷକଙ୍କୁ ବି ସୁରକ୍ଷା ଦେବାର ଆବଶ୍ୟକତା ରହିଛି | ଯେବେ ଜଣେ ମହିଳା ଆଇପିଏସ ଅଧିକାରୀ ନିଜର ଉଚ୍ଚପଦସ୍ଥ ଅଧିକାରୀଙ୍କ ବିରୋଧରେ ଅଭିଯୋଗ ଆଣୁଛନ୍ତି ସେତେବେଳେ ମହିଳାଙ୍କ ସୁରକ୍ଷାକୁ ନେଇ ରାଜ୍ୟ ସରକାରଙ୍କଠାରୁ ଆଉ କଣ ଆଶା କରିପାରିବା |
ତେବେ ଅଭିଯୋଗ ଆସିବା ପରେ ପୁଲିସ ମହାନିର୍ଦ୍ଦେଶକ ରାଜେଶ ଦାସଙ୍କୁ ବଦଳି କରାଯାଇଛି | ଏହା ସହ ଡିଜିପି ରାଙ୍କକୁ ସାମୟିକ ସମୟ ପାଇଁ ଫେରାଇନିଆଯାଇଛି |