ଓ୍ଵାସିଂଟନ : ବିଶ୍ୱରେ ପ୍ରଳୟ ଆସିବାର ଆଶଙ୍କା ଆଉ ଟିକିଏ ବଢିଯାଇଛି । ଏକଥା ଆଶଙ୍କା କରୁଛନ୍ତି ବିଶ୍ୱର ପ୍ରମୁଖ ଆଣବିକ ବିଜ୍ଞାନିମାନେ । ଏଥିପାଇଁ ପ୍ରଳୟ ଘଣ୍ଟା ବା ‘ଡୁମ୍ସ ଡେ କ୍ଲକ୍’କୁ ଅଧ ମିନିଟ୍ ଆଗୁଆ କରିଦେଇଛନ୍ତି । ଏହା ଫଳରେ ୫୦ ଦଶକର ଶୀତଳ ଯୁଦ୍ଧ ପରେ ବିଶ୍ୱରେ ମନୁଷ୍ୟକୃତ ପ୍ରଳୟ ଆରମ୍ଭ ହେବାର ସମ୍ଭବନା ସବୁଠାରୁ ଅଧିକ ରହିଛି । ଗତ ୨୦୧୬ରେ ଡୋଲାଲ୍ଡ ଟ୍ରମ୍ଫ ଆମେରିକା ରାଷ୍ଟ୍ରପତି ନିର୍ବାଚିତ ହେବା ପରେ ଏହି ଘଣ୍ଟାକୁ ୩୦ ସେକେଣ୍ଡ ଆଗକୁ ନିଆଯାଇଥିଲା । ଏବେ ଏହି ଘଣ୍ଟା କଣ୍ଟା ମଧ୍ୟରାତ୍ରିଠାରୁ ୨ ମିନିଟ୍ ଦୂରରେ ରହିଛି ।
Sambad is now on WhatsApp
Join and get latest news updates delivered to you via WhatsApp
ଡୁମ୍ସ ଡେ କ୍ଲକ ବା ପ୍ରଳୟ ଘଣ୍ଟା ଏକ ପ୍ରକାରର ସାଂକେତିକ ଘଣ୍ଟା ଯାହାକି ପୃଥିବୀ ମଣିଷକୃତ କାରଣ ଯୋଗୁଁ ଧ୍ୱଂସ ହେବାର ଆଶଙ୍କାକୁ ବୁଝାଏ । ମଣିଷକୃତ କାରଣ ମଧ୍ୟରେ ରହିଛି ପରମାଣୁ ଯୁଦ୍ଧ, ଜଳବାୟୁ ପରିବର୍ତ୍ତନ । ପୁଣି ଜୈବିକ ଓ ରାସାୟନିକ ଯୁଦ୍ଧ କାରଣରୁ ହେବାକୁ ଥିବା ପ୍ରଳୟ ମଧ୍ୟ ଏଥରେ ରହିଛି ।
ଏହି ଘଣ୍ଟା ୧୯୪୭ରେ ବୁଲେଟିନ ଅଫ ଆଟମିକ୍ ସାଇଣ୍ଟିଷ୍ଟର ସାଇନ୍ସ ଏଣ୍ଡ ସିକ୍ୟୁରିଟି ବୋର୍ଡ ଦ୍ୱାରା ସ୍ଥାପନା କରାଯାଇଥିଲା । ଏହି ବୋର୍ଡରେ ବିଶ୍ୱର ଅନେକ ଆଣବିକ ବିଜ୍ଞାନି ଓ ନୋବେଲ ବିଜେତା ସଦସ୍ୟ ଅଛନ୍ତି । ଆରମ୍ଭରେ ଏହି ଘଣ୍ଟା କଣ୍ଟା ମଧ୍ୟରାତ୍ରି ଠାରୁ ୭ ମିନିଟ୍ ଲେଟ୍ ଥିଲା । ଏହି ମଧ୍ୟ ରାତ୍ରି ହିଁ ସାଂକେତିକ ଭାବେ ପ୍ରଳୟକୁ ବୁଝାଏ ।
ବିଶ୍ୱରେ ଏବେ ଉତ୍ତର କୋରିଆର ଆଣବିକ କାର୍ଯ୍ୟକ୍ରମକୁ ନେଇ ଚିନ୍ତା ପ୍ରକାଶ ପାଇଛି । ଏହି କାରଣରୁ ଆମେରିକା ଓ ଉତ୍ତରକୋରିଆ ମଧ୍ୟରେ ବିବାଦ ବଢିଛି । ଲାଗୁଛି ଯେ କୌଣସି ସମୟରେ ଆଣବିକ ଯୁଦ୍ଧ ଲାଗିଯିବ । କିନ୍ତୁ ଏହି ପରିସ୍ଥିତିକୁ ଥଣ୍ଡା କରିବାରେ ବିଶ୍ୱ ନେତୃବୃନ୍ଦଙ୍କ ଉଦାସିନତା ପରିସ୍ଥିତିକୁ ଆହୁରି ଜଟିଳ କରିଛି । ପୁଣି ଜଳବାୟୁ ପରିବର୍ତ୍ତନ ଏହି ଚିନ୍ତାକୁ ଆହୁରି ବଢାଇଦେଇଛି ।