ପ୍ରସବ ସମୟରେ କଟିଗଲା ଶିଶୁର ମୁଣ୍ଡ, ଗର୍ଭରେ ରହିଗଲା ଗଣ୍ଡି !
ହାଇଦ୍ରାବାଦ: ତେଲେଙ୍ଗାନାରେ ଜଣେ ଗର୍ଭବତୀ ମହିଳାଙ୍କର ପ୍ରସବ ସମୟରେ ନବଜାତର ମୁଣ୍ଡ କଟିଯାଇଛି | ନବଜାତର ମୁଣ୍ଡଟି କଟିଯାଇ ଡାକ୍ତରଙ୍କ ହାତକୁ ଆସିଯାଇଥିବା ବେଳେ ଗଣ୍ଡିଟି ମା‘ର ପେଟରେ ହିଁ ରହିଯାଇଛି | ଏହି ଘଟଣାଟି ନାଗରକୁରନୁଲ ଜିଲ୍ଲାର ଅଛମପେଟ ହସ୍ପିଟାଲରେ ଘଟିଛି | କେବଳ ଏତିକି ନୁହେଁ, ଏହି ଘଟଣା ବାବଦରେ ମହିଳାଙ୍କ ପରିବାର ଲୋକଙ୍କୁ କିଛି ନ ଜଣାଇ ତାଙ୍କୁ ଅନ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିବାର ପରିବାର ଲୋକ ଅଭିଯୋଗ କରିଛନ୍ତି | ଘଟଣା ବାବଦରେ ଜଣାପଡିବା ପରେ ଜିଲ୍ଲାପାଳ ତଦନ୍ତ ନିର୍ଦ୍ଦେଶ ଦେଇଛନ୍ତି | ମିଳିଥିବା ସୂଚନା ମୁତାବକ ନାଗରକୁରନୁଲ ଜିଲ୍ଲାରେ ରହୁଥିବା ସ୍ଵାତୀ ନାମ୍ନୀ ମହିଳାଙ୍କ ସହ ଏହି ଦୁଃଖଦ ଘଟଣା ଘଟିଛି |
Sambad is now on WhatsApp
Join and get latest news updates delivered to you via WhatsApp
ସ୍ଵାତୀଙ୍କ ପରିବାର ପକ୍ଷରୁ କୁହାଯାଇଛି ଯେ ଡିସେମ୍ବର ୧୮ ତାରିଖରେ ଗର୍ଭ ଯନ୍ତ୍ରଣା ହେବାରୁ ତାଙ୍କୁ ଅଛମପେଟ ହସ୍ପିଟାଲରେ ଭର୍ତ୍ତି କରାଯାଇଥିଲା | ତିନିଜଣ ଡାକ୍ତର ସ୍ଵାତୀଙ୍କ ଅସ୍ତ୍ରୋପଚାର କରିଥିବା ବେଳେ ଗର୍ଭବତୀଙ୍କ ସ୍ୱାସ୍ଥ୍ୟ ଗୁରୁତର ହେଉଥିବା କହି ତୁରନ୍ତ ହାଇଦ୍ରାବାଦ ନେଇଯିବାକୁ ପରିବାର ଲୋକଙ୍କୁ କହିଥିଲେ | ଏହା ପରେ ସ୍ଵାତୀଙ୍କୁ ହାଇଦ୍ରାବାଦର ପେଟାଲବୁରଜ ହସ୍ପିଟାଲରେ ଭର୍ତ୍ତି କରାଯାଇଥିଲା | ଏଠାରେ ହିଁ ପ୍ରକୃତ ଘଟଣା ସାମ୍ନାକୁ ଆସିଥିଲା |
ଏହି ହସ୍ପିଟାଲର ଡାକ୍ତରମାନେ କହିଥିଲେ ଯେ ପୂର୍ବରୁ ନବଜାତର ମୁଣ୍ଡଟି କଟିଯାଇଥିଲା, ଏବେ କେବଳ ଗଣ୍ଡି ହିଁ ମା’ ଗର୍ଭରେ ରହିଛି | ଏଠାକାର ଡାକ୍ତରମାନେ ତୁରନ୍ତ ସ୍ଵାତୀଙ୍କ ଅପରେସନ କରାଇ ତାଙ୍କ ପେଟରୁ ଗଣ୍ଡିଟିକୁ କାଢିଥିଲେ, ଯାହାଦ୍ୱାରା ସ୍ଵାତୀଙ୍କ ଜୀବନ ବଞ୍ଚିଯାଇଥିଲା | ପରିବାର ପକ୍ଷରୁ ଅଛମପେଟର ଡାକ୍ତରଙ୍କ ବିରୋଧରେ ପୁଲିସ ପାଖରେ ଅଭିଯୋଗ କରାଯାଇଛି | ଏହି ମାମଲାରେ ଅପରେସନ କରିଥିବା ଡାକ୍ତରଙ୍କୁ ନିଲମ୍ବିତ କରାଯାଇଥିବାବେଳେ ନାଗରକୁରନୁଲ ଜିଲ୍ଲାପାଳ ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି |