ଲଦାଖରେ ସୀମା ବିବାଦ ଆରମ୍ଭ କରିଥିବା ‘ପିଏଲ୍‌ଏ’ କମାଣ୍ଡର୍‌ଙ୍କୁ ବଦଳି କଲେ ଚୀନ୍‌ ରାଷ୍ଟ୍ରପତି ଜିନ୍‌ପିଙ୍ଗ୍‌

ନୂଆଦିଲ୍ଲୀ: ପୂର୍ବ ଲଦାଖରରେ ଦୀର୍ଘ ସାତ ମାସ ହେବ ଭାରତ ସହ ଲାଗି ରହିଥିବା ବିବାଦ ପାଇଁ ଦାୟୀ ‘ପିପୁଲସ୍‌ ଲିବରେସନ୍‌ ଆର୍ମି’ର କ୍ଷମତାଶାଳୀ ‘େଓ୍ଵଷ୍ଟର୍ଣ୍ଣ ଥିଏଟର୍‌ କମାଣ୍ଡର୍‌’ ଜେନେରାଲ୍‌ ଜାଓ ଜୋଙ୍ଗ୍‌କ୍ୱିଙ୍କୁ ଚୀନ୍‌ ରାଷ୍ଟ୍ରପତି ସି ଜିଙ୍ଗ୍‌ପିନ୍‌ ବଦଳି କରିଛନ୍ତି। ତାଙ୍କ ସ୍ଥାନରେ ଆସିଛନ୍ତି ଜେନେରାଲ୍‌ ଜାଙ୍ଗ୍‌ ଜୁଡୋଙ୍ଗ୍‌।

ପୂର୍ବରୁ ଜେନେରାଲ୍‌ ଜୁଡୋଙ୍ଗ୍‌ ଭାରତୀୟ ସୀମାନ୍ତରେ କାମ କରି ନାହାନ୍ତି। ଏବର୍ଷ ଗ୍ରୀଷ୍ମଋତୁରେ ଅବସର ଗ୍ରହଣ ବୟସ ୬୫ ବର୍ଷରେ ପଦାର୍ପଣ କରିଥିବା ଜେନେରାଲ୍‌ ଜାଓଙ୍କ ଠାରୁ ସେ ଯଥେଷ୍ଟ ସାନ। ଜେନେରାଲ୍‌ ଜାଙ୍ଗ୍‌ଙ୍କୁ ଏବେ ୫୮ ବର୍ଷ।

ଜେନେରାଲ୍‌ ଜାଙ୍ଗ୍‌ଙ୍କର କୌଣସି ରାଜନୈତିକ ଅଭିସନ୍ଧି ଅଛି କି, ନାହିଁ ତାହା ଜଣାପଡ଼ିନାହିଁ ବୋଲି ଘଟଣା ଉପରେ ଦୃଷ୍ଟି ରଖିଥିବା ଚୀନ୍‌ ପର୍ଯ୍ୟବେକ୍ଷକମାନେ କହିଛନ୍ତି।

ଜେନେରାଲ୍‌ ଜାଓ କିନ୍ତୁ, ଚୀନ୍‌ କମ୍ୟୁନିଷ୍ଟ୍‍ ପାର୍ଟିର କେନ୍ଦ୍ରୀୟ କମିଟିର ସଦସ୍ୟ ଥିଲେ ଏବଂ ‘ସେଣ୍ଟ୍ରାଲ୍‌ ମିଲିଟାରି କମିସନ୍‌’ରେ ଆସନଟିଏ ଚାହୁଁଥିଲେ। ସେ ଆସନ ପାଇଥିଲେ ୭୨ ବର୍ଷ ବୟସ ପର୍ଯ୍ୟନ୍ତ ସେ ଚାକିରି କରି ପାରି ଥାଆନ୍ତେ ବୋଲି ଭାରତୀୟ ସେନାବାହିନୀ ଅନୁମାନ କରୁଥିଲା।

୨୦୧୬ରେ ଜେନେରାଲ୍‌ ଜାଓ ‘େଓ୍ଵଷ୍ଟର୍ଣ୍ଟ ଥିଏଟର୍‌ କମାଣ୍ଡ୍‌’ର ଦାୟିତ୍ୱ ଗ୍ରହଣ କରିଥିଲେ ଏବଂ ତାଙ୍କର କାର୍ଯ୍ୟକାଳ ମଧ୍ୟ ବୃଦ୍ଧି କରାଯାଇଥିଲା। ଏଥର ଗ୍ରୀଷ୍ମକାଳରେ ସେ ଅବସର ଗ୍ରହଣ କରିବା ବୟସରେ ପହଞ୍ଚିଥିଲେ ମଧ୍ୟ ରାଷ୍ଟ୍ରପତି ଜିନ୍‌ପିଙ୍ଗ୍‌ ତାଙ୍କୁ ଚାକିରିରେ ରହିବାକୁ ଅନୁମତି ପ୍ରଦାନ କରିଥିଲେ।