ପବଜି ଖେଳିବାକୁ ଷ୍ଟେସନରେ ବୋମା ଥିବା କହି ଟ୍ରେନ ଅଟକାଇଦେଲା ୧୨ ବର୍ଷର ବାଳକ
ବାଙ୍ଗାଲୋର: ପିଲାମାନଙ୍କର ମୋବାଇଲ୍ ସହିତ ସମୟ ବିତାଇବା ଏବଂ ମୋବାଇଲରେ ଗେମ ଖେଳିବା ପ୍ରବୃତ୍ତି ଏତେ ପରିମାଣରେ ବୃଦ୍ଧି ପାଇଛି ଯେ ସେମାନେ ନିଜ ଖେଳ ଜାରି ରଖିବା ପାଇଁ କିଛି ବି କରୁଛନ୍ତି | ଏଭଳି ଏକ ଘଟଣା ଏବେ ବାଙ୍ଗାଲୋରରୁ ସାମ୍ନାକୁ ଆସିଛି | ଖେଳ ଜାରି ରଖିବା ପାଇଁ ଜଣେ ୧୨ ବର୍ଷର ବାଳକ କିଭଳି ରେଳ କର୍ମଚାରୀ ଓ ପୁଲିସଙ୍କୁ ହଇରାଣ କରିଥିଲା ତାହା ଦେଖିବାକୁ ମିଳିଛି | ମିଳିଥିବା ସୂଚନା ମୁତାବକ ମାର୍ଚ୍ଚ ୩୦ରେ ବାଙ୍ଗାଲୋରର ୟେଲାହଙ୍କା ରେଳ ଷ୍ଟେସନରେ ହେଲ୍ପଲାଇନ ନମ୍ବର ୧୩୯ କୁ ଏକ ଫୋନ୍ କଲ ଆସିଥିଲା ଯେଉଁଥିରେ ରେଳ ଷ୍ଟେସନରେ ଏକ ବୋମା ଥିବାର କୁହାଯାଇଥିଲା।
Sambad is now on WhatsApp
Join and get latest news updates delivered to you via WhatsApp
ଫୋନ୍ କଲ ପରେ ପୁଲିସ ଘଟଣାସ୍ଥଳରେ ପହଞ୍ଚି ପୂରା ଷ୍ଟେସନକୁ ଶୀଘ୍ର ଖାଲି କରି ସବୁ ସ୍ଥାନରେ ଖୋଜାଖୋଜି କରିଥିଲା | କିନ୍ତୁ ବହୁ ସମୟ ଧରି ଖୋଜିବା ପରେ ବି ବୋମା ମିଳିନଥିଲା | ଏହି ପୁରା ଘଟଣାରେ ପ୍ରାୟ ୯୦ ମିନିଟ୍ ସମୟ ନଷ୍ଟ ହୋଇଥିବାବେଳେ ଯେତେବେଳେ ପୁଲିସ ଫୋନ୍ ନମ୍ବରକୁ ଯାଞ୍ଚ କରିଥିଲା, ସେତେବେଳେ ଏହି ଫୋନ କଲ୍ ନିକଟସ୍ଥ ଏକ କିରାଣି ଦୋକାନୀଙ୍କ ଫୋନ୍ ନମ୍ବରରୁ ଆସିଥିବାର ଜଣାପଡିଥିଲା |
ପୁଲିସ କହିଛି ଯେ ଦୋକାନୀ ଜଣକ ତାଙ୍କର ଫୋନ ୧୨ ବର୍ଷର ପୁଅକୁ ଦେଇଥିଲେ ଏବଂ ଏହି ଫୋନ କଲ୍ ତାଙ୍କ ପୁଅ କରିଥିଲେ | ଦୋକାନୀଙ୍କ ପୁଅ ତାଙ୍କ ସାଙ୍ଗଙ୍କ ସହ ପବଜି ଖେଳୁଥିଲେ | ତେବେ ତାଙ୍କ ସାଙ୍ଗ ୟେଲାହଙ୍କା ରେଳ ଷ୍ଟେସନରେ କାଚେଗୁଡା ଏକ୍ସପ୍ରେସ ଟ୍ରେନରେ ଯିବାର ଥିଲା । ଯଦି ଟ୍ରେନରେ ଯାତ୍ରା ଆରମ୍ଭ ହୋଇଯିବ, କାଳେ ମୋବାଇଲ ନେଟୱାର୍କ ମିଳିବ ନାହିଁ, ସେଥିପାଇଁ ସେ ଷ୍ଟେସନକୁ ମିଛ ଫୋନ କଲ କରିଥିଲେ | ୧୨ ବର୍ଷର ବାଳକ ବିରୋଧରେ ଯଦିଓ ପୁଲିସ କୌଣସି କାର୍ଯ୍ୟାନୁଷ୍ଠାନ ନେଇନାହିଁ ତଥାପି ଚେତାବନୀ ଦେଇଥିଲା |