ନୂଆଦିଲ୍ଲୀ: କୋଭିଡ୍-୧୯ ସଂକ୍ରମଣ ଲାଗି ଜାରି କଟକଣା କୋହଳ କରିଛନ୍ତି କେନ୍ଦ୍ର ସରକାର। ଅନଲକର ତୃତୀୟ ପର୍ଯ୍ୟାୟରେ ଅଗଷ୍ଟ ୫ ତାରିଖ ଠାରୁ ପୁଣି ଯୋଗ ଓ ଜିମ୍ନାସିୟମ୍ କେନ୍ଦ୍ର ଖୋଲିବାକୁ ସରକାର ଅନୁମତି ଦେଇଛନ୍ତି। ଆଜି ଏ ନେଇ ଜାରି ହୋଇଛି ଗାଇଡଲାଇନ୍। ଗୃହ ବ୍ୟାପାର ମନ୍ତ୍ରାଳୟ ଦ୍ବାରା ଜାରି ମାର୍ଗଦର୍ଶିକା ଅନୁସାରେ କୋଭିଡ୍-୧୯ କଣ୍ଟେନ୍ମେଣ୍ଟ୍ ଜୋନ୍ରେ ଥିବା ଯୋଗ ପ୍ରତିଷ୍ଠାନ ଓ ଜିମ୍ନାସିୟମ୍ କେନ୍ଦ୍ରଗୁଡ଼ିକ ଖୋଲିବାକୁ ଅନୁମତି ମିଳିବ ନାହିଁ।
Sambad is now on WhatsApp
Join and get latest news updates delivered to you via WhatsApp
ନିବୁଜ ସ୍ଥାନମାନଙ୍କରେ ଥିବା ଜିମ୍ନାସିୟମ୍ ଓ ଯୋଗ ପ୍ରତିଷ୍ଠାନଗୁଡ଼ିକୁ ୬୫ ବର୍ଷରୁ ଅଧିକ ବୟସ୍କ ଲୋକ, ଏକାଧିକ ଶାରୀରିକ ସମସ୍ୟା ଭୋଗୁଥିବା ଲୋକ, ଅନ୍ତଃସତ୍ତ୍ବା ମହିଳା ଏବଂ ୧୦ ବର୍ଷରୁ କମ୍ ବୟସ୍କ ପିଲାମାନଙ୍କୁ ନ ଯିବା ପାଇଁ ନିର୍ଦେଶ ଦିଆଯାଇଛି।
ଯେତେଦୂର ସମ୍ଭବ ବ୍ୟକ୍ତବିଶେଷ ନିଜ ନିଜ ମଧ୍ୟରେ ଅନ୍ୟୂନ ୬ ଫୁଟ୍ ଦୂରତା ବଜାୟ ରଖିବା ଉଚିତ ବୋଲି ଗାଇଡ୍ଲାଇନ୍ରେ କୁହାଯାଇଛି। ମାସ୍କ ଓ ମୁଖାବରଣ ପିନ୍ଧିବା ବାଧ୍ୟତାମୂଳକ କରାଯାଇଛି। କିନ୍ତୁ, କସରତ ସମୟରେ ଯେଉଁମାନେ ଶ୍ବାସକ୍ରିୟାରେ କଷ୍ଟ ଅନୁଭବ କରନ୍ତି ପ୍ରତିରକ୍ଷାମୂଳକ ପଦକ୍ଷେପ ଭାବେ ସରକାର ସେମାନଙ୍କୁ ‘ଭାଇଜର୍’ ପିନ୍ଧିବାକୁ ଅନୁମତି ଦେଇଛନ୍ତି।
ଥରକୁ ଥର ହାତ ଧୋଇବା ଓ ହ୍ୟାଣ୍ଡ୍ ସାନିଟାଇଜର୍ ବ୍ୟବହାର ଉପରେ ଗୃହ ବ୍ୟାପାର ମନ୍ତ୍ରାଳୟ ଗୁରୁତ୍ବାରୋପ କରିବା ସହ ଶ୍ବାସପ୍ରଶ୍ବାସ ସଂକ୍ରାନ୍ତ ସବୁ କାର୍ଯ୍ୟରେ ସତର୍କତା ଅବଲମ୍ବନ କରିବାକୁ ପରାମର୍ଶ ଦେଇଛି। ଗାଇଡ୍ଲାଇନ୍ରେ କୁହାଯାଇଛି, ଛିଙ୍କିବା/କାଶିବା ସମୟରେ ପାଟି ଓ ନାକ ଟିସ୍ୟୁ, କପଡ଼ା କିଂବା କହୁଣିରେ ଢାଙ୍କି ରଖନ୍ତୁ। ଟିସ୍ୟୁ ବ୍ୟବହାର କରୁଥିବେ ତାହାକୁ ଠିକଣା ସ୍ଥାନରେ ଫିଙ୍ଗି ଦିଅନ୍ତୁ।
ଫିଟ୍ନେସ୍ କାର୍ଯ୍ୟକଳାପ ଲାଗି ଜିମ୍ କିମ୍ବା ହେଲଥ ସେଣ୍ଟରରେ ପ୍ରତି ବ୍ୟକ୍ତିବିଶେଷଙ୍କ ପାଇଁ ୪ ବର୍ଗ ମିଟର ସ୍ଥାନ ରଖିବାକୁ ଜିମ୍ନାସିୟମ୍ ଓ ଯୋଗ ପ୍ରତିଷ୍ଠାନର ମାଲିକ ଓ ପରିଚାଳକମାନଙ୍କୁ କୁହାଯାଇଛି। ଉପକରଣ ଏବଂ ମେସିନ ସବୁ ୬ ଫୁଟ୍ ବ୍ୟବଧାନରେ ରଖାଯିବା ଉଚିତ। କେନ୍ଦ୍ର ବାହାରେ ଜାଗା ଥିଲେ ସେଠାରେ ବ୍ୟକ୍ତି ବିଶେଷକଙ୍କ ବ୍ୟାୟାମ ପାଇଁ ସୁବିଧା କରିପାରିଲେ ଉତ୍ତମ। ଫ୍ଲୋର୍ କିଂବା ୱାଲ୍ ମାର୍କିଙ୍ଗ୍ ବ୍ୟବହାର କରି କେନ୍ଦ୍ର ପରିସରର ପ୍ରବେଶ ଓ ପ୍ରସ୍ଥାନ ପଥ ନିର୍ଦ୍ଧାରଣ କରିବାକୁ ସେମାନଙ୍କୁ ନିର୍ଦେଶ ଦିଆଯାଇଛି।