ମିରଟ: ସାଧରଣତଃ ଘରର ରୋଷେଇ ଘରୁ ବାହାରୁଥିବା ଧୂଆଁରୁ ଆଖି ଜଳିଥାଏ । ତେବେ ଧୂଆଁକୁ ଘରୁ ବାହାର କରୁଥିବା ଚିମନି ମେସିନ୍ ଅଧିକ ମହଙ୍ଗା ହୋଇଥିବାରୁ ଅଧିକ ଲୋକ ଏହାକୁ ରୋଷେଇ ଘରେ ଲଗାଇପାରିନଥାନ୍ତି । ଆଉ ଏଥିପାଇଁ ବେଳେବେଳେ ପୂରା ଘର ଧୂଆଁମୟ ହୋଇଯାଏ । ଏହାକୁ ଦୂର କରିବା ପାଇଁ ଯୁବ ଇଞ୍ଜିନିୟର ଆସିଫ ଚୌହାନ ଇଲେକ୍ଟ୍ରୋ ଷ୍ଟାଟିକ୍ ଏୟାର ପ୍ୟୁରିଫାୟର ଡିଜାଇନ୍ କରିଛନ୍ତି । ଏହି ମେସିନ୍ ରୋଷେଇ ଘରୁ ବାହାରୁଥିବା ଧୂଆଁକୁ ଶୋଷଣ କରି ଏହାକୁ ତାଜା ପବନରେ ପରିଣତ କରେ ।
Sambad is now on WhatsApp
Join and get latest news updates delivered to you via WhatsApp
ଏହି ସ୍ୱତନ୍ତ୍ର ମେସିନରେ ତିନି ପ୍ରକାରର ରେଜିଷ୍ଟେନ୍ସ, କାପାସିଟର ଏବଂ ଷ୍ଟାଟଅପ୍ ଟ୍ରାନ୍ସଫର୍ମରର ବ୍ୟବହାର କରାଯାଇଛି, ଯାହା ଧୂଆଁରେ ଥିବା କିଛି କଣିକାକୁ ଅଧିକ ତାପମାତ୍ରାରେ ଜଳାଇଦିଏ । ଯେଉଁ ଧୂଆଁ ପାଇଁ ଆପଣଙ୍କ ଆଖି ପୋଡିଥାଏ । ଏହି ଧୂଆଁ ପ୍ୟୁରିଫାୟାର ଭିତରକୁ ଯିବା ପରେ ତାଜା ସ୍ୱଚ୍ଛ ପବନରେ ପରିଣତ ହୋଇଯାଏ । ତେବେ ଆସିଫଙ୍କ ଏହି ମେସିନ୍ କେବଳ ଘରୋଇ ବ୍ୟବହାର ପାଇଁ ହିଁ ପ୍ରଯୁଜ୍ୟ। ଆଉ ଏହାର ଦାମ୍ ପ୍ରାୟ ୪ ହଜାର ଟଙ୍କା ।
ତେବେ ଆସିଫଙ୍କ ଏହି ଡିଭାଇସକୁ ଅଧିକ ଉନ୍ନତଶୀଳ କରାଯାଇ ଏହାକୁ ଶିଳ୍ପ କ୍ଷେତ୍ରରେ ମଧ୍ୟ ବ୍ୟବହାର କରାଯାଇପାରିବ ବୋଲି ସେ ଦାବି କରିଛନ୍ତି । ଆଉ ଏପରି ହୋଇପାରିଲେ, ବିଭିନ୍ନ ଶିଳ୍ପାନୁଷ୍ଠାନ ତଥା କଳକାରଖାନାରୁ ବାହାରୁଥିବା ଦୂଷିତ ବାୟୁକୁ ତାଜା ପବନରେ ପରିଣତ କରାଯାଇପାରିବ ।
ମିରଟ ନିବାସୀ ଆସିଫ୍ ମେକାନିକାଲ ଇଞ୍ଜିନିୟରିଂରେ ଏମଟେକ୍ କରିବା ପରେ ବିଟେକ୍ ଛାତ୍ରମାନଙ୍କୁ ଏକ ଘରୋଇ ଅନୁଷ୍ଠାନରେ ୫ ବର୍ଷ ଶିକ୍ଷା ଦେଉଥିଲେ। ଦୁଇରୁ ତିନି ବର୍ଷ ପର୍ଯ୍ୟନ୍ତ ଏକ ଘରୋଇ କମ୍ପାନିରେ ମଧ୍ୟ କାର୍ଯ୍ୟ କରିଥିଲେ । ଏହାପରେ ସେ ଗତ କିଛି ବର୍ଷ ଧରି ନିଜର ଷ୍ଟାର୍ଟଅପ୍ ଆରମ୍ଭ କରିଥିଲେ । ଆଉ ଏବେ ତାଙ୍କର ଏହି ନୂଆ ଉଦ୍ଭାବନ ପାଇଁ ଚର୍ଚ୍ଚାରେ ରହିଛନ୍ତି ଆସିଫ୍ ।