ଆମ କାର୍ଯ୍ୟକର୍ତ୍ତା ହିଁ ଆମ ଗୌରବ: ଥରୁର

ନୂଆଦିଲ୍ଲୀ: କଂଗ୍ରେସ ସଭାପତି ନିର୍ବାଚନରେ ପରାଜିତ ହେବାପରେ ଶଶୀ ଥରୁର ଆଜି ଏକ ପ୍ରେସ୍‌ ବିବୃତିରେ ଦଳ ପ୍ରତି ତାଙ୍କର ପ୍ରତିବଦ୍ଧତାକୁ ଦୋହରାଇଛନ୍ତି। ସେ କହିଛନ୍ତି, ନବ ନିର୍ବାଚିତ କଂଗ୍ରେସ ସଭାପତି ଖଡ଼ଗେ ଜଣେ ବରିଷ୍ଠ ନେତା ଏବଂ ସବୁବେଳେ ସେ ଦଳକୁ ଠିକ୍‌ ମାର୍ଗଦର୍ଶନ ଦେବେ। ମୁଁ ବହୁତ ଖୁସି ‌ଯେ ୧୦୦୦ରୁ ଅଧିକ ପ୍ରତିନିଧି ମୋତେ ଭୋଟ୍‌ ଦେଇଛନ୍ତି। ଆମ କାର୍ଯ୍ୟକର୍ତ୍ତାମାନେ ହିଁ ଆମ ଦଳର ପ୍ରକୃତ ଗୌରବ। ଥରୁର କହିଛନ୍ତି, ମୁଁ ଅସନ୍ତୁଷ୍ଟ ପ୍ରାର୍ଥୀ ନଥିଲି ବରଂ ପରିବର୍ତ୍ତନ ଆଣିବା ପାଇଁ ପ୍ରାର୍ଥୀ ଥିଲି। ଏହି ନିର୍ବାଚନ ବ୍ୟକ୍ତିକୈନ୍ଦ୍ରିକ ନଥିଲା, ଏହା ଦଳର ନିର୍ବାଚନ ଥିଲା ବୋଲି ଥରୁର କହିଛନ୍ତି। ଗାନ୍ଧି ପରିବାର ପ୍ରତି ମୋର ପୂର୍ଣ୍ଣ ଭରସା ରହିଛି ଏବଂ ସେମାନେ ଏକ ସଂପୂର୍ଣ୍ଣ ସ୍ବଚ୍ଛ ଓ ନିରପେକ୍ଷ ନିର୍ବାଚନକୁ ସମ୍ଭବ କରାଇଛନ୍ତି ବୋଲି ସେ କହିଛନ୍ତି।

ଭାରତ ଯୋଡ଼ୋ ଯାତ୍ରାକୁ ପୂରା ଦେଶରେ ବିପୁଳ ସମର୍ଥନ ମିଳିଛି ଏବଂ ଏହା ସମସ୍ତଙ୍କ ପାଇଁ ପ୍ରେରଣାଦାୟୀ ବୋଲି ଥରୁର କହିଛନ୍ତି। କଂଗ୍ରେସର ସମସ୍ତ ସଦସ୍ୟଙ୍କ ହୃଦୟରେ ଗାନ୍ଧି ପରିବାର ପାଇଁ ସ୍ବତନ୍ତ୍ର ସ୍ଥାନ ରହିଛି ବୋଲି ସେ କହିଛନ୍ତି। ଅନ୍ୟପକ୍ଷେ ନିର୍ବାଚନ ଜିତିଥିବା ମଲ୍ଲିକାର୍ଜୁନ ଖଡ଼ଗେ କହିଛନ୍ତି, ମୁଁ ମଧ୍ୟ ମୋର ସହଯୋଗୀ ଶଶି ଥରୁରଙ୍କୁ ଶୁଭେଚ୍ଛା ଜଣାଇବାକୁ ଚାହୁଛି ଏବଂ ଆମେ ସମସ୍ତେ ଏକଜୁଟ ହୋଇ କାମ କରିବାକୁ ସଂକଳ୍ପ ନେଇଛୁ।