ସମ୍ପତ୍ତି ଭାଗବଣ୍ଟାକୁ ନେଇ ପରିବାରର ୬ ଜଣ ସଦସ୍ୟଙ୍କୁ ନିର୍ମମ ହତ୍ୟା କଲେ ଯୁବକ
ଲଖନଉ: ଉତ୍ତରପ୍ରଦେଶର ରାଜଧାନୀ ଲଖନଉ ରେ ଆଜି ଜଣେ ଯୁବକ ଜଘନ୍ୟ କାଣ୍ଡ ଘଟାଇଛନ୍ତି | ଯୁବକ ଜଣକ ତାଙ୍କ ପରିବାରର ୬ ଜଣ ସଦସ୍ୟଙ୍କୁ ନିର୍ମମ ଭାବେ ହତ୍ୟା କରିଛି | ଏହି ହତ୍ୟାକାଣ୍ଡ ସମଗ୍ର ଅଞ୍ଚଳରେ ଆଲୋଡ଼ନ ସୃଷ୍ଟି କରିଛି । ମିଳିଥିବା ସୂଚନା ମୁତାବକ ଲଖନଉର ବନଠାରରେ ଅଜୟ ନାମକ ଯୁବକ ଏକ ଧାରୁଆ ଛୁରୀରେ ତାଙ୍କ ପିତାମାତା, ଭାଇ-ଭାଉଜ ଏବଂ ପୁତୁରା-ଝିଆରୀଙ୍କୁ କାଟି ହତ୍ୟା କରିଛି ।
Sambad is now on WhatsApp
Join and get latest news updates delivered to you via WhatsApp
ଯୁବକ ଜଣକ ମାନସିକ ସନ୍ତୁଳନ ହରାଇ ଏଭଳି କରିଥିବାର କୁହାଯାଉଛି। ପରିବାରର ସମସ୍ତ ଲୋକ ଶୋଇବା ପରେ ଅଭିଯୁକ୍ତ ଯୁବକ ସମସ୍ତଙ୍କୁ ହତ୍ୟା କରିଥିଲା | ପରେ ଯୁବକ ଜଣକ ନିଜେ ପୁଲିସ ଷ୍ଟେସନକୁ ଯାଇ ଆତ୍ମସମର୍ପଣ କରିଥିଲା । ଅଭିଯୁକ୍ତ ଅଜୟ ସହ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ପୋଷ୍ଟମର୍ଟମ ପାଇଁ ପଠାଇଥିଲା।
ପ୍ରାଥମିକ ଅନୁସନ୍ଧାନରୁ ଜଣାପଡିଛି ଯେ ଅଭିଯୁକ୍ତଙ୍କ ଘରେ ସମ୍ପତ୍ତି ବିବାଦ ଲାଗି ରହିଥିଲା । ଏହି ସମୟରେ ଅଜୟ ଜାଣିବାକୁ ପାଇଥିଲା ଯେ ସମ୍ପତ୍ତି ବିକ୍ରି ହୋଇଛି ଏବଂ ତାଙ୍କୁ କୁହାଯାଇ ନାହିଁ। ଏହି ଘଟଣାରେ କ୍ରୋଧିତ ଅଭିଯୁକ୍ତ ଅଜୟ ଏହି ଜଘନ୍ୟ ହତ୍ୟାକାଣ୍ଡ କରିଥିଲା। ପୁଲିସ ଏବେ ଅଭିଯୁକ୍ତଙ୍କୁ ପଚରାଉଚରା କରୁଛି।