ନୂଆଦିଲ୍ଲୀ: ବାଂଲାଦେଶର ଅନ୍ତରୀଣ ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସ ପ୍ରଧାନମନ୍ତ୍ରୀ ଶେଖ୍ ହସିନାଙ୍କ ଅନ୍‌ଲାଇନ୍ ଭାଷଣକୁ ରୋକିବା ପାଇଁ ଢାକାର ଅନୁରୋଧକୁ ପ୍ରତ୍ୟାଖ୍ୟାନ କରିଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସମାଲୋଚନା କରିଛନ୍ତି। ନିକଟରେ ଲଣ୍ଡନର ଚାଥାମ୍ ହାଉସରେ ଆଲୋଚନା ବେଳେ ୟୁନୁସ୍ ପ୍ରଧାନମନ୍ତ୍ରୀ ମୋଦୀଙ୍କ ସହ ହୋଇଥିବା ଏକ ବାର୍ତ୍ତାଳାପ ବିଷୟରେ ବର୍ଣ୍ଣନା କରିଥିଲେ। ଯେତେବେଳେ ମୋତେ ପ୍ରଧାନମନ୍ତ୍ରୀ ମୋଦୀଙ୍କ ସହ କଥା ହେବାର ସୁଯୋଗ ମିଳିଲା, ମୁଁ କେବଳ କହିଥିଲି ଯେ ଆପଣ ତାଙ୍କୁ (ହସିନାଙ୍କୁ) ଆତିଥ୍ୟ ଦେବାକୁ ଚାହୁଛନ୍ତି, ମୁଁ ଆପଣଙ୍କୁ ସେହି ନୀତି ତ୍ୟାଗ କରିବାକୁ ବାଧ୍ୟ କରିପାରିବି ନାହିଁ। କିନ୍ତୁ ଦୟାକରି ତାଙ୍କୁ କୁହନ୍ତୁ ଯେ ସେ ଯେପରି ବାଂଲାଦେଶୀ ଲୋକଙ୍କ ସହ କଥା ନ ହୁଅନ୍ତି। ଏଭଳି ଭାବେ ସେ ବୟାନ ଦେଉଛନ୍ତି ଯେ, ସମଗ୍ର ବାଂଲାଦେଶ କ୍ରୋଧିତ ହୋଇଯାଉଛି। ସେ କାହିଁକି ଏପରି କ୍ରୋଧ ଜଗାଇଲା ଭଳି ଭାଷଣ ଦେଉଛନ୍ତି? ୟୁନୁସ କହିଛନ୍ତି, ସେ ପ୍ରଧାନମନ୍ତ୍ରୀ ମୋଦୀଙ୍କୁ ହସ୍ତକ୍ଷେପ କରିବାକୁ ଏବଂ ହସିନାଙ୍କୁ ଅଧିକ ବୟାନ ଦେବାରୁ ରୋକିବାକୁ କହିଥିଲେ। ଉତ୍ତରରେ ଭାରତୀୟ ପ୍ରଧାନମନ୍ତ୍ରୀ କହିଥିଲେ, ଏହା ସୋସିଆଲ ମିଡିଆ, ଆପଣ ଏହାକୁ ନିୟନ୍ତ୍ରଣ କରିପାରିବେ ନାହିଁ। ଏହାର ଜବାବରେ ୟୁନୁସ କହିଛନ୍ତି, ଏହା ଏକ ବିସ୍ଫୋରକ ପରିସ୍ଥିତି, ଆପଣ କେବଳ ଏହାକୁ ସୋସିଆଲ ମିଡିଆ କହି ଏଡ଼ାଇ ଯାଇପାରିବେ ନାହିଁ। ବାଂଲାଦେଶ ଯାହା ଆଶା କରିଥିଲା ଭାରତ ତାହା କରୁଛି କି ବୋଲି ପଚରାଯିବାରୁ ୟୁନୁସ ବିନା ଦ୍ୱିଧାରେ ଉତ୍ତର ଦେଇଥିଲେ, ନା। ହସିନାଙ୍କୁ ପ୍ରତ୍ୟର୍ପଣ ପାଇଁ ବାଂଲାଦେଶ ଭାରତ ସରକାରଙ୍କୁ ଚିଠି ଲେଖିଛି, ଆଇନଗତ ପ୍ରକ୍ରିୟା ଚାଲିଛି କିନ୍ତୁ ଭାରତ ପ୍ରତ୍ୟର୍ପଣ କରିବାକୁ ମନା କରିଦେଇଛି। ଅଗଷ୍ଟ ୨୦୨୪ରେ ହସିନାଙ୍କ ବହିଷ୍କାର ପରେ ଅନ୍ତରୀଣ ମୁଖ୍ୟ ଭାବେ ଦାୟିତ୍ୱ ଗ୍ରହଣ କରିଥିବା ୟୁନୁସ କହିଛନ୍ତି ଯେ ବାଂଲାଦେଶ ଏବେ ବି ଭାରତ ସହ ଏକ ଦୃଢ଼ ଦ୍ୱିପାକ୍ଷିକ ସମ୍ପର୍କ ଚାହୁଛି। ତେବେ ଭାରତୀୟ ଗଣମାଧ୍ୟମରେ ମିଥ୍ୟା ସୂଚନା ପ୍ରସାରିତ ହେଉଥିବା ନେଇ ୟୁନୁସ ଉଦ୍‌ବେଗ ପ୍ରକାଶ କରିଛନ୍ତି, ଯେଉଁଥିରେ ଭାରତର ଶୀର୍ଷ ନୀତି-ନିର୍ଦ୍ଧାରକଙ୍କ ସମ୍ପୃକ୍ତି ଥିବା ସେ ସନ୍ଦେହ କରୁଛନ୍ତି।