କରୋନା ଟିକାର ତୃତୀୟ ପର୍ଯ୍ୟାୟ କ୍ଲିନିକାଲ୍ ପରୀକ୍ଷା ପାଇଁ ଜାଇଡସ୍ କାଡିଲାକୁ ଅନୁମତି ଦେଲା ଡିସିଜିଅ‌ାଇ

ନୂଆଦିଲ୍ଲୀ: କରୋନାଭାଇରସ୍ ରୋଗୀଙ୍କ ଉପରେ ବିକଶିତ ହୋଇଥିବା ସ୍ୱଦେଶୀ କରୋନାଭାଇରସ୍ ଟିକାର ତୃତୀୟ ପର୍ଯ୍ୟାୟ କ୍ଲିନିକାଲ୍ ପରୀକ୍ଷା କରିବା ପାଇଁ ଡ୍ରଗ୍ କଣ୍ଟ୍ରୋଲର୍ ଜେନେରାଲ୍ ଅଫ୍ ଇଣ୍ଡିଆ (ଡିସିଜିଅ‌ାଇ)ରୁ ଅନୁମୋଦନ ଲାଭ କରିଛି ଜାଇଡସ୍ କାଡିଲା |

ନିକଟରେ ଜାଇଡସ୍ କାଡିଲା ବିକଶିତ କରିଥିବା କରୋନାଭାଇରସ୍ ଟିକାର ଦ୍ୱିତୀୟ ପର୍ଯ୍ୟାୟ କ୍ଲିନିକାଲ୍ ପରୀକ୍ଷଣ ଶେଷ କରିଥିଲା। ଅ‌ାଜି ଜୈବିକ ଚିକିତ୍ସା, ପେଗିଲେଟେଡ୍ ଇଣ୍ଟରଫେରନ୍ ଆଲଫା -୨ବି, ‘ପେଗିହେପ୍ଟିଏମ୍’ ସହିତ କରୋନାଭାଇରସ୍ ରୋଗୀଙ୍କ ଉପରେ ଟିକାର  ତୃତୀୟ ପର୍ଯ୍ୟାୟ କ୍ଲିନିକାଲ୍ ପରୀକ୍ଷା ଆରମ୍ଭ କରିବାକୁ ଜାଇଡସ୍ କାଡିଲାକୁ ଅନୁମତି ଦିଆଯାଇଛି |

ଡିସେମ୍ବରରୁ ଏହି ପରୀକ୍ଷା ଆରମ୍ଭ ହେବ ଏବଂ ଭାରତର ୨୦-୨୫ କେନ୍ଦ୍ରରେ ୨୫୦ରୋଗୀଙ୍କ ଉପରେ ଏହି ପରୀକ୍ଷା କରାଯିବ। ଜାଇଡସ୍ କାଡିଲାର ଅଧ୍ୟକ୍ଷ ପଙ୍କଜ ପଟେଲ କହିଛନ୍ତି ଯେ, ମାର୍ଚ୍ଚ ୨୦୨୧ସୁଦ୍ଧା କମ୍ପାନି ଟିକା ପରୀକ୍ଷା ଶେଷ କରିବା ସହ ବର୍ଷକୁ ୧୦୦ମିଲିୟନ୍ ଡୋଜ ଉତ୍ପାଦନ କରିବାର ଲକ୍ଷ୍ୟ ରଖିଛି ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ଅହମ୍ମଦାବାଦରେ ଥିବା ଫାର୍ମା କମ୍ପାନି ଜାଇଡସ୍ କାଡିଲାର ଉତ୍ପାଦନ କାରଖାନା ପରିଦର୍ଶନ କରି ଚାଲିଥିବା କରୋନାଭାଇରସ୍ ଟିକା ବିକାଶ କାର୍ଯ୍ୟର ସମୀକ୍ଷା କରିଥିଲେ। ପିପିଇ କିଟ୍ ପିନ୍ଧି ମୋଦୀ ଅହମ୍ମଦାବାଦଠାରୁ ୨୦କିଲୋମିଟର ଦୂରରେ ଥିବା ଚାଙ୍ଗୋଡର ଶିଳ୍ପାଞ୍ଚଳର ଜାଇଡସ୍ କାଡିଲା ଅନୁସନ୍ଧାନ କେନ୍ଦ୍ରରେ ଟିକା ବିକାଶ ପ୍ରକ୍ରିୟା ସମୀକ୍ଷା କରିଛନ୍ତି।