କେନ୍ଦ୍ର ବଜେଟ୍‌ ୨୦୨୪-୨୫: ନିଯୁକ୍ତି ସୃଷ୍ଟି ପାଇଁ ୨ ଲକ୍ଷ କୋଟି

ନୂଆଦିଲ୍ଲୀ: ଅର୍ଥମନ୍ତ୍ରୀ ନିର୍ମଳା ସୀତାରମଣ ବଜେଟ୍‌ରେ ନିଯୁକ୍ତି ସମ୍ବନ୍ଧୀୟ ପ୍ରୋତ୍ସାହନ ଅଧୀନରେ ତିନୋଟି ଯୋଜନା ଘୋଷଣା କରିଛନ୍ତି । ସେ କହିଛନ୍ତି ଯେ ସରକାର ଆଗାମୀ ପାଞ୍ଚ ବର୍ଷ ମଧ୍ୟରେ ନିଯୁକ୍ତି ସୃଷ୍ଟି ପାଇଁ ୨ ଲକ୍ଷ କୋଟି ଟଙ୍କା ଆବଣ୍ଟନ କରିବେ। ସ୍କିମ ଏରେ ଇପିଏଫଓରେ ପ୍ରଥମ ଥର ପାଇଁ ପଞ୍ଜିକୃତ କର୍ମଚାରୀଙ୍କୁ ୩ଟି କିସ୍ତିରେ ସିଧାସଳଖ ୧ ମାସର ଦରମା ହସ୍ତାନ୍ତର କରାଯିବ। ଏଥିରେ ୧୫,୦୦୦ ଟଙ୍କା ପର୍ଯ୍ୟନ୍ତ ରାଶି ଦିଆଯିବ। ସ୍କିମ୍-ବି ଉତ୍ପାଦନ କ୍ଷେତ୍ରରେ ନିଯୁକ୍ତି ସୃଷ୍ଟି ଉପରେ ଆଧାରିତ। ଏଥିରେ ଉଭୟ କର୍ମଚାରୀ ଏବଂ ନିଯୁକ୍ତିଦାତାଙ୍କୁ ନିଯୁକ୍ତିର ପ୍ରଥମ ଚାରି ବର୍ଷ ପାଇଁ ଇପିଏଫଓ ଅବଦାନକୁ ସରକାର ପ୍ରଦାନ କରିବେ। ସ୍କିମ୍‌-ସିରେ ନିଯୁକ୍ତିଦାତାଙ୍କୁ ସହାୟତା ଦିଆଯିବ। ଏଥିରେ ପ୍ରତି ଅତିରିକ୍ତ କର୍ମଚାରୀଙ୍କ ଇପିଏଫ୍ ଅବଦାନ ପାଇଁ ୨ ବର୍ଷ ପର୍ଯ୍ୟନ୍ତ ମାସିକ ୩୦୦୦ ଟଙ୍କା ପର୍ଯ୍ୟନ୍ତ ନିଯୁକ୍ତିଦାତାଙ୍କୁ ଫେରସ୍ତ କରାଯିବ। ଆସନ୍ତା ୫ ବର୍ଷରେ ୨୦ ଲକ୍ଷ ଯୁବକଯୁବତୀଙ୍କୁ ଦକ୍ଷତା ତାଲିମ ପ୍ରଦାନ କରିବା ଲାଗି ଏକ ନୂଆ କେନ୍ଦ୍ର ପ୍ରାୟୋଜିତ ସ୍କିମ୍ ଘୋଷଣା କରାଯାଇଛି। ରାଜ୍ୟ ସରକାର ଓ ଶିଳ୍ପ ସଂସ୍ଥାଗୁଡ଼ିକର ସହଯୋଗରେ ଏହି ସ୍କିମ୍ କାର୍ଯ୍ୟକାରୀ ହେବ। ଏହି ମଡେଲ୍ ଦକ୍ଷତା ଋଣ ସ୍କିମ୍‌ରେ ୭.୫ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ଦିଆଯିବ। ଏହି ସ୍କିମ୍‌ରେ ୧,୦୦୦ ଆଇଟିଆଇକୁ ହବ୍ ଆଣ୍ଡ୍‌ ସ୍ପୋକ୍ ମଡେଲ୍‌ରେ ରୂପାନ୍ତରୀତ କରାଯିବ। ଘରୋଇ ଶିକ୍ଷାନୁଷ୍ଠାନରେ ଉଚ୍ଚ ଶିକ୍ଷା ପାଇଁ ସରକାର ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ସହାୟତା ପ୍ରଦାନ କରିବେ। ଭାରତକୁ ୨୦୪୭ ସୁଦ୍ଧା ବିକଶିତ ରାଷ୍ଟ୍ରରେ ପରିଣତ କରିବା ଦିଗରେ ଏହି ସ୍କିମ୍ ସହାୟକ ହେବ।

୫ ବର୍ଷରେ ୨୦ ଲକ୍ଷ ଯୁବକଯୁବତୀ ହେବେ କୁଶଳୀ
ନୂଆ କେନ୍ଦ୍ର ପ୍ରାୟୋଜିତ ସ୍କିମ୍ ଘୋଷଣା
୧୦୦୦ ଆଇଟିଆଇ ହେବ ହବ୍ ଆଣ୍ଡ୍‌ ସ୍ପୋକ୍ ମଡେଲ୍‌

ଏମ୍ଏସ୍‌ଏମ୍ଇ ପାଇଁ ନୂଆ ଋଣ ଗ୍ୟାରେଣ୍ଟି ସ୍କିମ୍

ନୂଆଦିଲ୍ଲୀ: ଏଥର ବଜେଟ୍‌ରେ ଶ୍ରମ ଶକ୍ତି ସମ୍ବେଦନଶୀଳ ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ (ଏମ୍ଏସ୍‌ଏମ୍ଇ) ଓ ବିନିର୍ମାଣ କ୍ଷେତ୍ର ଉପ‌ରେ ଜୋର୍‌ ଦିଆଯାଇଛି। ଏମ୍ଏସ୍‌ଏମ୍ଇମାନଙ୍କ ଲାଗି ନୂଆ ଋଣ ସ୍କିମ୍ ଓ ରେଟିଂ ବ୍ୟବସ୍ଥା ଆରମ୍ଭ କରାଯିବ ବୋଲି ଘୋଷଣା ହୋଇଛି। ଏମ୍ଏସ୍‌ଏମ୍ଇଗୁଡ଼ିକ ଆଗକୁ ବଢ଼ି ଯେଭଳି ବିଶ୍ବସ୍ତରରେ ପ୍ରତିଦ୍ବନ୍ଦ୍ବିତା କରିପାରିବେ ସେଥିପାଇଁ ସେମାନଙ୍କ ନିମନ୍ତେ ପାଣ୍ଠି, ନିୟାମକ ପରିବର୍ତ୍ତନ ଓ ପ୍ରଯୁକ୍ତି ସହାୟତାର ମିଶ୍ରଣରେ ଏକ ପ୍ୟାକେଜ୍ ପ୍ରସ୍ତୁତ କରାଯାଇଛି ବୋଲି ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି। ସେ କହିଛନ୍ତି ଯେ ବିନିର୍ମାଣ କ୍ଷେତ୍ରରେ ଥିବା ଏମ୍ଏସ୍‌ଏମ୍ଇଗୁଡ଼ିକ ପାଇଁ ଏକ କ୍ରେଡିଟ୍ ଗ୍ୟାରେଣ୍ଟି ସ୍କିମ୍ ପ୍ରସ୍ତୁତ କରାଯାଇଛି ଯେଉଁଥିରେ ବିନା କୌଣସି ତୃତୀୟ ପକ୍ଷ ବନ୍ଧକରେ ସେମାନଙ୍କୁ ମିଆଦି ଋଣ ପ୍ରଦାନ କରାଯିବ। ମେସିନ୍ ଓ ଉପକରଣ କିଣିବା ଲାଗି ସେମାନଙ୍କୁ ଏହି ଋଣ ଦିଆଯିବ। ଏମ୍ଏସ୍‌ଏମ୍ଇଗୁଡ଼ିକ ଲାଗି ୧୦୦ କୋଟି ଟଙ୍କାର ଗ୍ୟାରେଣ୍ଟି ସୁରକ୍ଷା ମଧ୍ୟ ଘୋଷଣା ହୋଇଛି। ଋଣଗ୍ରହୀତାଙ୍କୁ ଋଣ ରାଶି ଉପର ଗ୍ୟାରେଣ୍ଟି ଫି’ ଓ ହ୍ରାସ ପାଉଥିବା ଋଣ ରାଶି ଉପରେ ବାର୍ଷିକ ଗ୍ୟାରେଣ୍ଟି ଫି’ ଦେବାକୁ ପଡ଼ିବ। ସଂସ୍ଥା ଚାପରେ ଥିବା ସମୟରେ ଯେଭଳି ଋଣ ପ୍ରବାହ ଜାରି ରହିବ ସେଥିପାଇଁ ମଧ୍ୟ ବ୍ୟବସ୍ଥା କରାଯିବ। ଏମ୍ଏସ୍‌ଏମ୍ଇ ପାଇଁ ନୂଆ ଋଣ ଅନୁଶୀଳନ ମଡେଲ୍‌ରେ ରାଷ୍ଟ୍ରାୟତ୍ତ ବ୍ୟାଙ୍କଗୁଡ଼ିକ ନିଜର ବ୍ୟବସ୍ଥା କରିବେ। ସେମାନଙ୍କୁ ବାହ୍ୟ ଏଜେନ୍ସି ଉପରେ ନିର୍ଭର କରିବାକୁ ପଡ଼ିବନି। ଟିଆର୍‌ଇଡିଏସ୍‌ରେ ସାମିଲ ହେବା ପାଇଁ କ୍ରେତାଙ୍କ ନିମନ୍ତେ କାରବାର ସୀମାକୁ ୫୦୦ କୋଟି ଟଙ୍କାରୁ ହ୍ରାସ କରି ୨୫୦ କୋଟି ଟଙ୍କା କରାଯାଇଛି। ଏମ୍ଏସ୍‌ଏମ୍ଇ କ୍ଷେତ୍ରର ୫୦ ବହୁ-ଉତ୍ପାଦ ଖାଦ୍ୟ ବିକିରଣ ପାଇଁ ଆର୍ଥିକ ସହାୟତା ଘୋଷଣା କରାାଇଛି।