୧୪ଟି ଘରୋଇ ପରୀକ୍ଷାଗାରକୁ କରୋନାଭାଇରସ ଟେଷ୍ଟ କିଟ୍ ପରୀକ୍ଷା ପାଇଁ ଅନୁମତି
ନୂଆଦିଲ୍ଲୀ : ଦେଶରେ କରୋନା ଭାଇରସ ସଂକ୍ରମିତଙ୍କ ସଂଖ୍ୟା ୨୨୩କୁ ବୃଦ୍ଧି ପାଇଥିବାବେଳେ ମୃତ୍ୟୁସଂଖ୍ୟା ୫କୁ ବୃଦ୍ଧି ପାଇଛି । ଦିନକୁ ଦିନ ସଂକ୍ରମିତଙ୍କ ସଂଖ୍ୟା ଏତେ ଦ୍ରୁତଗତିରେ ବଢିଚାଲିଛି ଯେ ପରୀକ୍ଷାଗାର ସଂଖ୍ୟା ନିଅଣ୍ଟ ପଡ଼ୁଛି । କାରଣ ଏବେ କେବଳ ସରକାରୀ ପରୀକ୍ଷାଗାର ଗୁଡ଼ିକରେ ସଂଦିଗ୍ଧ ଲୋକମାନଙ୍କ ନମୁନା ପରୀକ୍ଷଣ କରାଯାଉଛି । ଫଳରେ ଏଗୁଡ଼ିକ ଉପରେ ଅତ୍ୟଧିକ ଚାପପଡ଼ୁଛି । ଏହାକୁ ଦୃଷ୍ଟିରେ ରଖି ୧୪ଟି ଘରୋଇ ପରୀକ୍ଷାଗାରକୁ କରୋନା ପରୀକ୍ଷଣ ପାଇଁ ଲାଇସେନ୍ସ ଦେବାକୁ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି । ଏମାନଙ୍କ ମଧ୍ୟରେ ରହିଛନ୍ତି ରୋଚି ଡାଇଗ୍ନୋଷ୍ଟିକ୍ସ, ଅହମଦାବାଦର କୋସାରା ଡାଇଗ୍ନୋଷ୍ଟିକ୍ସ, ଚେନ୍ନାଇର ସିପିସି ଡାଇଗ୍ନୋଷ୍ଟିକ୍ସ । ଏହି ସଂସ୍ଥାମାନେ ଟେଷ୍ଟିଂ କିଟ୍ ଗୁଡ଼ିକର ମୂଲ୍ୟାଙ୍କନ କରିବେ ଓ ତଥ୍ୟକୁ ଭାରତୀୟ ଔଷଧ ମହାନିୟନ୍ତ୍ରକ (ଡିଜିସିଆଇ)ଙ୍କୁ ପ୍ରଦାନ କରିବେ ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ଭାରତୀୟ ଭେଷଜ ଗବେଷଣା ପରିଷଦ ଦ୍ୱାରା ସ୍ୱୀକୃତିପ୍ରାପ୍ତ ୬୦ଟି ଘରୋଇ ପରୀକ୍ଷାଗାରକୁ ଅନୁମତି ଦେବାକୁ ସରକାର ନିଷ୍ପତ୍ତି ନେଇଛନ୍ତି । ଉପରୋକ୍ତ ପରୀକ୍ଷାଗାର ଦ୍ୱାରା ପ୍ରମାଣିତ ଟେଷ୍ଟିଂ କିଟଗୁଡ଼ିକୁ ଏସବୁ ସଂସ୍ଥାମାନେ ବ୍ୟବହାର କରିପାରିବେ । ଅନ୍ୟପକ୍ଷରେ ସାରା ବିଶ୍ୱରେ କରୋନା ସଂକ୍ରମିତଙ୍କ ସଂଖ୍ୟା ଅଢେଇ ଲକ୍ଷ ଓ ମୃତ୍ୟୁସଂଖ୍ୟା ୧୦ ହଜାର ଟପିଯାଇଛି । ଶୁକ୍ରବାର ଅପରାହ୍ଣ ୫ଟା ସୁଦ୍ଧା ବିଶ୍ୱରେ ମୋଟ ସଂକ୍ରମିତଙ୍କ ସଂଖ୍ୟା ୨ ଲକ୍ଷ ୫୨ ହଜାର ୮୫୧ ଓ ମୃତ୍ୟୁସଂଖ୍ୟା ୧୦,୪୦୫ରେ ପହଞ୍ଚିଛି । ଇଟାଲୀ ଏବେ କରୋନା ସଂକ୍ରମଣର କେନ୍ଦ୍ର ରହିଛି । ଇଟାଲିରେ ସଂକ୍ରମିତଙ୍କ ସଂଖ୍ୟା ୪୧,୦୩୫ରେ ପହଞ୍ଚିଥିବାବେଳେ ମୃତ୍ୟୁସଂଖ୍ୟା ୩୪୦୫ରେ ପହଞ୍ଚିଛି ।