ନୂଆଦିଲ୍ଲୀ : ଶନିବାର ସଂଧ୍ୟାସୁଦ୍ଧା ସାରା ଦେଶରେ ମୋଟ ୨୭,୭୭୬ଟି ଟିକାକରଣ ଅଧିବେଶନରେ ୧୫ ଲକ୍ଷ ୩୭ ହଜାର ୧୯୦ ଜଣ କରୋନା ଟିକା ନେଇସାରିଲେଣି ବୋଲି କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ସ୍ବାସ୍ଥ୍ୟ ମନ୍ତ୍ରାଳୟର ଅତିରିକ୍ତ ସଚିବ ମନୋହର ଅଗନାନି କହିଛନ୍ତି ଯେ ଦେଶରେ ଟିକା ନେଇଥିବା ୧୫ ଲକ୍ଷ ୩୭ ହଜାର ୧୯୦ ଜଣ ଲୋକଙ୍କ ମଧ୍ୟରୁ ମାତ୍ର ୧୧ ଜଣଙ୍କ ଠାରେ ଗୁରୁତର ପାର୍ଶ୍ବପ୍ରତିକ୍ରିୟା ଦେଖାଦେଇଥିବାରୁ ସେମାନେ ହସପିଟାଲରେ ଭର୍ତ୍ତି ହୋଇଛନ୍ତି । ଏହା ମୋଟ ସଂଖ୍ୟାର ମାତ୍ର ୦.୦୦୦୭ ପ୍ରତିଶତ । ଦେଶରେ ଏପର୍ଯ୍ୟନ୍ତ ୬ ଜଣ ବ୍ୟକ୍ତି ଟିକା ନେବା ପରେ ପ୍ରାଣ ହରାଇଛନ୍ତି । ଗତ ୨୪ ଘଣ୍ଟାରେ ଗୁରୁଗ୍ରାମର ଜଣେ ୫୬ ବର୍ଷୀୟା ମହିଳା ପ୍ରାଣ ହରାଇଛନ୍ତି । ତେବେ ସେମାନଙ୍କ ମୃତ୍ୟୁ ଟିକା ସହିତ ସମ୍ପର୍କିତ ନୁହେଁ ସେ କହିଛନ୍ତି ।
ଦେଶରେ ଏବେ ୧୨ଟି ରାଜ୍ୟରେ କୋଭାକ୍ସିନ ବ୍ୟବହାର କରୁଛନ୍ତି । ଆସନ୍ତା ସପ୍ତାହରୁ ଆଉ ୭ଟି ରାଜ୍ୟରେ ଏହି ଟିକା ବ୍ୟବହାର ହେବ ବୋଲି ସେ କହିଛନ୍ତି । ସେସବୁ ରାଜ୍ୟଗୁଡ଼ିକ ହେଲେ ଛତିଶଗଡ଼, ଗୁଜୁରାଟ, ଝାଡ଼ଖଣ୍ଡ, କେରଳ, ମଧ୍ୟପ୍ରଦେଶ, ପଞ୍ଜାବ ଓ ପଶ୍ଚିମବଙ୍ଗ ।