କୁଆଡେ ଗାୟବ ହୋଇଗଲା ୭ ହଜାର କୋଟି ଟଙ୍କାର ଦୁଇ ହଜାର ନୋଟ

ନୂଆଦିଲ୍ଲୀ: ଦେଶରେ ୨୦୦୦ ଟଙ୍କିଆ ନୋଟ୍ ବିମୁଦ୍ରୀକରଣ ହେବାର ଦେଢ଼ ବର୍ଷରୁ ଅଧିକ ସମୟ ବିତିଯାଇଛି, କିନ୍ତୁ ଏବେ ବି ଲୋକମାନଙ୍କ ପାଖରେ ହଜାର ହଜାର କୋଟି ଟଙ୍କାର ଏହି ନୋଟ୍ ଅଛି | ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (ଆରବିଆଇ) ନିକଟରେ ରିପୋର୍ଟ କରିଛି ଯେ ୨୦୦୦ ଟଙ୍କିଆ ମଧ୍ୟରୁ ମୋଟ ନୋଟଗୁଡିକର ୯୮% ବ୍ୟାଙ୍କକୁ ଫେରିଛି। ଅର୍ଥାତ ପ୍ରାୟ ୨% ନୋଟ୍ ଲୋକମାନଙ୍କ ପାଖରେ ହିଁ ଅଛି | ଏହା ଏକ ବହୁତ ବଡ ସଂଖ୍ୟା ଏବଂ ଆରବିଆଇ ଏଥିପାଇଁ ଚିନ୍ତାରେ ପଡିଯାଇଛି |

ନିକଟରେ ୨୦୦୦ ଟଙ୍କିଆ ନୋଟ ଫେରସ୍ତକୁ ନେଇ ଆରବିଆଇ ସୂଚନା ଦେଇଛି ଯେ ଏହି ମୂଲ୍ୟର ୯୮ ପ୍ରତିଶତ ନୋଟ୍ ବ୍ୟାଙ୍କକୁ ଫେରିଛି, ଲୋକଙ୍କ ପାଖରେ ୭୧୧୭ କୋଟି ଟଙ୍କା ମୂଲ୍ୟର ନୋଟ୍ ଏବେ ଅଛି | ପ୍ରାରମ୍ଭିକ ପର୍ଯ୍ୟାୟରେ, ଏହି ନୋଟଗୁଡିକ ବହୁ ସଂଖ୍ୟାରେ ଫେରସ୍ତ ହେଉଥିଲା, କିନ୍ତୁ ବର୍ତ୍ତମାନ ସେତେ ଟଙ୍କା ଫେରସ୍ତ ଆସୁନାହିଁ | ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ଦ୍ୱାରା ଜୁଲାଇ ୧, ୨୦୨୪ରେ ଦିଆଯାଇଥିବା ରିପୋର୍ଟରେ ବଜାରରେ ବା ଲୋକଙ୍କ ପାଖରେ ୭୫୮୧ କୋଟି ଟଙ୍କା ଥିଲା | ସର୍ବଶେଷ ତଥ୍ୟ ଦର୍ଶାଉଛି ଯେ ଏବେ ବି ଏହି ସଂଖ୍ୟା ୭୦୦୦ କୋଟିରୁ ଅଧିକ ରହିଛି।

ଗତ ଦୁଇ ମାସ ମଧ୍ୟରେ କେବଳ ୩୨୦ କୋଟି ଟଙ୍କା ମୂଲ୍ୟର ନୋଟ୍ ଫେରସ୍ତ କରାଯାଇଛି। ଏହି ତଥ୍ୟ ଆହୁରି ଆଶ୍ଚର୍ଯ୍ୟ କରିଦେଉଛି ଯେ ଟଙ୍କା ଫେରସ୍ତ ଗତି କେତେ ମନ୍ଥର ହୋଇଛି | ଏନେଇ ବିଶେଷଜ୍ଞଙ୍କ କହିବା କଥା ଯେ ଏହାର ଅନେକ କାରଣ ହୋଇପାରେ | ପ୍ରଥମତଃ ସୂଚନାର ଅଭାବ, ବୋଧହୁଏ କିଛି ଲୋକ ଏପର୍ଯ୍ୟନ୍ତ ସଚେତନ ନୁହଁନ୍ତି ଯେ ୨୦୦୦ ଟଙ୍କିଆ ନୋଟ୍ ଅଚଳ ହୋଇଗଲାଣି | ଆଉ ଏକ କାରଣ ହୋଇପାରେ ଯେ କିଛି ଲୋକ ପାଇଁ ବ୍ୟାଙ୍କ କିମ୍ବା ଡାକଘରକୁ ଯାଉନାହାନ୍ତି | ଏଥି ସହିତ, ଏହା ସମ୍ଭବ ଯେ କିଛି ଲୋକ ଏହି ନୋଟଗୁଡ଼ିକୁ କଳା ଟଙ୍କା ଭାବରେ ଲୁଚାଇ ରଖିଛନ୍ତି |