'କୋହଲି ଅଧିନାୟକ ଥିଲେ ଅଶ୍ୱିନଙ୍କୁ ଅବସର ନେବାକୁ ଦେଇନଥାନ୍ତେ'

ନୂଆଦିଲ୍ଲୀ: ଭାରତୀୟ କିଂବଦନ୍ତି ଅଫ୍‌ସ୍ପିନର୍‌ ତଥା ଉପଯୋଗୀ ଅଲରାଉଣ୍ଡର୍ ରବିଚନ୍ଦ୍ରନ ଅଶ୍ବିନ ବୁଧବାର ଅନ୍ତର୍ଜାତୀୟ କ୍ରିକେଟ୍‌ରୁ ଅବସର ଘୋଷଣା କରିଥିଲେ । ବ୍ରିସ୍‌ବେନ୍‌ରେ ଅଷ୍ଟ୍ରେଲିଆ ବିପକ୍ଷ ବର୍ଡର-ଗାଭାସ୍କର ଟ୍ରଫି ଟେଷ୍ଟ୍‌ ମ୍ୟାଚ୍‌ ଅମୀମାଂସିତ ଭାବେ ଶେଷ ହେବା ପରେ ପରେ ଅଶ୍ବିନ ଅଚାନକ ଏଭଳି ନିଷ୍ପତ୍ତି ବିଷୟରେ ସୂଚନା ଦେଇଥିଲେ। ୫ ମ୍ୟାଚ୍‌ ବିଶିଷ୍ଟ ଏହି ଶୃଙ୍ଖଳାରେ ୩ ମ୍ୟାଚ୍‌ ସରିଥିଲା ବେଳେ ଅଶ୍ବିନ କେବଳ ଗୋଟିଏ ମ୍ୟାଚ୍‌ ଆଡିଲେଡ୍‌ରେ ଖେଳିଥିଲେ। ଏହି ଦିବା-ରାତ୍ର ଟେଷ୍ଟ୍‌ରେ ସେ ୧/୫୩ ବୋଲିଂ ସଫଳତା ପାଇଥିଲେ। ବର୍ତ୍ତମାନ ଅଶ୍ୱିନଙ୍କ ଅବସର ପରେ ସୀମା ଆରପଟ ଅର୍ଥାତ୍ ପାକିସ୍ତାନରୁ ଏକ ବଡ ଦାବି କରାଯାଇଛି ଯେଉଁଥିରେ କୁହାଯାଇଥିଲା ଯେ ଯଦି ବିରାଟ କୋହଲି ଟିମ୍ ଇଣ୍ଡିଆର ଅଧିନାୟକ ହୋଇଥାନ୍ତେ, ତେବେ ସେ ଅଶ୍ୱିନଙ୍କୁ ଅବସର ନେବାକୁ ଅନୁମତି ଦେଇ ନଥାନ୍ତେ।

ପାକିସ୍ତାନର ପୂର୍ବତନ ବ୍ୟାଟ୍ସମ୍ୟାନ୍ ବାସିତ ଅଲି କହିଛନ୍ତି ଯେ ଯଦି ବିରାଟ କୋହଲି ଟିମ୍ ଇଣ୍ଡିଆର ଅଧିନାୟକ ହୋଇଥାନ୍ତେ, ତେବେ ସେ ଅଶ୍ୱିନଙ୍କୁ ସିରିଜ୍ ମଝିରେ ଅବସର ନେବାକୁ ଅଟକାଇଥାନ୍ତେ କାରଣ ଟିମ୍ ଇଣ୍ଡିଆ ତାଙ୍କୁ ସିଡନୀ ଟେଷ୍ଟରେ ଆବଶ୍ୟକ କରେ।

ତାଙ୍କ ୟୁଟ୍ୟୁବ୍ ଚ୍ୟାନେଲରେ ଯୋଗ ଦେଇ ଅଲି କହିଛନ୍ତି, "ମୁଁ ଗ୍ୟାରେଣ୍ଟି ଦେଉଛି ଯେ ଯଦି ବିରାଟ କୋହଲି ଅଧିନାୟକ ହୋଇଥାନ୍ତେ, ତେବେ ସେ ଅଶ୍ୱିନଙ୍କୁ ଅବସର ନେବାକୁ ଅନୁମତି ଦେଇ ନଥାନ୍ତେ ଏବଂ ତାଙ୍କୁ ଦୁଇଟି ମ୍ୟାଚ୍ ପରେ ଅବସର ଘୋଷଣା କରିବାକୁ କହିଥାନ୍ତେ। ସେହିପରି ରବି ଶାସ୍ତ୍ରୀ ଏବଂ ରାହୁଲ ଦ୍ରାବିଡ ମଧ୍ୟ ଟିମ୍ ଇଣ୍ଡିଆର କୋଚ୍ ଥିଲେ, ସେମାନେ ଅଶ୍ୱିନଙ୍କୁ ଅବସର ନେବାକୁ ଦେଇ ନଥାନ୍ତେ।

ସେ ଆହୁରି କହିଛନ୍ତି, ଏହା ଭୁଲ ଯେ ରୋହିତ ଏବଂ ଗମ୍ଭୀର ତାଙ୍କୁ ରାଜି କରାଇନଥିଲେ | ପାକିସ୍ତାନର ପୂର୍ବତନ ବ୍ୟାଟ୍ସମ୍ୟାନ୍ ମଧ୍ୟ କହିଛନ୍ତି ଯେ ଅଶ୍ୱିନଙ୍କ ଆକସ୍ମିକ ଅବସର ପରେ କିଛି ରହସ୍ୟ ଅଛି, ଯାହା ତାଙ୍କ ଶରୀର ଭାଷାରୁ ଦୃଶ୍ୟମାନ ହେଉଥିଲା। 

ସୂଚନାଯୋଗ୍ୟ ଯେ ଟେଷ୍ଟ୍‌ କ୍ରିକେଟ୍‌ରେ ଭାରତର ଶ୍ରେଷ୍ଠ ସ୍ପିନର୍‌ଙ୍କ ମଧ୍ୟରେ ଗଣାଯାଉଥିବା ଅଶ୍ବିନ ନିଜ ୧୩ ବର୍ଷ ଅନ୍ତର୍ଜାତୀୟ ଜୀବନରେ ୨୪ ହାରରେ ୫୩୭ ୱିକେଟ୍‌ ଅକ୍ତିଆର କରିଛନ୍ତି। ସେ ସର୍ବାଧିକ ୱିକେଟ୍‌ ଦଖଲକାରୀ ଭାରତୀୟଙ୍କ ମଧ୍ୟରେ ଅନୀଲ କୁମ୍ବଲେ (୬୧୯)ଙ୍କ ପଛକୁ ଦ୍ବିତୀୟ ସ୍ଥାନରେ ରହିଛନ୍ତି। ଟେଷ୍ଟ୍‌ ଜୀବନରେ ସେ ୩୭ଥର ୫ ୱିକେଟ୍‌ ସଫଳତା ପାଇଛନ୍ତି। ଟେଷ୍ଟ୍‌ କ୍ରିକେଟ୍‌ ଖେଳୁ ଖେଳୁ ସେ ନିଜର କମାଲ ଦେଖାଇଥିଲେ। ନିଜର ପ୍ରଥମ ୧୬ ‌ଟେଷ୍ଟ୍‌ ମ୍ୟାଚ‌୍‌ରେ ସେ ୯ ଥର ୫ ୱିକେଟ୍‌ ସଫଳତା ପାଇଥିଲେ। ୩୦୦ ଟେଷ୍ଟ୍‌ ୱିକେଟ୍‌ ନେବାରେ ଅଶ୍ବିନ ଦ୍ରୁତତମ ଥିଲା ବେଳେ ୪୦୦ରେ କିଂବଦନ୍ତି ସ୍ପିନର ମୁଥିଆ ମୁରଲୀଧରନ (୬୭)ଙ୍କ ପଛକୁ ଦ୍ବିତୀୟ ସ୍ଥାନରେ ରହିଛନ୍ତି। ୨୦୧୬-୧୭ ଘରୋଇ ଋତୁରେ ଅଶ୍ବିନ ଶିଖରକୁ ଉଠିଥିଲେ। ଭାରତର ବୋଲିଂ ଆକ୍ରମଣର ଦାୟିତ୍ବ ସେ ନେଇଥିଲେ। ଏହି ଋତୁରେ ନ୍ୟୁଜିଲାଣ୍ଡ ବିପକ୍ଷ ୩ ମ୍ୟାଚ୍‌ ବିଶିଷ୍ଟ ଶୃଙ୍ଖଳାରେ ୨୭ ୱିକେଟ୍‌ ନେବା ପରେ ଇଂଲଣ୍ଡ ବିପକ୍ଷ ୫ ମ୍ୟାଚ୍‌ ବିଶିଷ୍ଟ ଶୃଙ୍ଖଳାରେ ୨୮ ୱିକେଟ୍‌ କରାୟତ୍ତ କରିଥିଲେ। ଏହାପରେ ବାଂଲାଦେଶ ବିପକ୍ଷ‌ ଏକ ମାତ୍ର ଟେଷ୍ଟ୍‌ରେ ୬ ଏବଂ ଅଷ୍ଟ୍ରେଲିଆ ବିପକ୍ଷ ଟେଷ୍ଟ୍‌ରେ ୨୧ ୱିକେଟ୍‌ ନେଇଥିଲେ। ଏହି ଅପୂର୍ବ ସଫଳତା ତାଙ୍କୁ ବିଶ୍ବର ପ୍ରମୁଖ ସ୍ପିନର୍‌ ଭାବେ ପରିଗଣିତ କରିଥିଲା।