ଏହି ନିୟମ ଯୋଗୁଁ ଆଇପିଏଲ ନିଲାମରୁ ଓହରିପାରନ୍ତି ବେନ୍ ଷ୍ଟୋକ୍ସ

ନୂଆଦିଲ୍ଲୀ: ଇଂଲଣ୍ଡର ଖେଳାଳି ବେନ୍ ଷ୍ଟୋକ୍ସ ଆଇପିଏଲ୍ ୨୦୨୫ରେ ଖେଳିନପାରନ୍ତି | ମେଗା ନିଲାମରେ ଭାଗ ନେବାକୁ ବୋଧେ ତାଙ୍କର ଇଚ୍ଛା ନାହିଁ | ଏକ ରିପୋର୍ଟ ଅନୁଯାୟୀ, ଇଂଲଣ୍ଡ କ୍ରିକେଟ୍ ଦଳ ପାଇଁ ବେନ୍ ଷ୍ଟୋକ୍ସ ଏହି ନିଷ୍ପତ୍ତି ନେଇପାରନ୍ତି। ସେ ଶେଷ ଥର ପାଇଁ ଆଇପିଏଲ୍ ୨୦୨୩ ରେ ଖେଳିଥିଲେ | ସେ ଚେନ୍ନାଇ ସୁପର କିଙ୍ଗ୍ସ ପକ୍ଷରୁ ଖେଳିଥିବାବେଳେ ଏହା ପରେ, ୨୦୨୪ ସିଜିନରେ ନିଜ ନାମ ପ୍ରତ୍ୟାହାର କରିନେଇଥିଲେ  | ବର୍ତ୍ତମାନ ଷ୍ଟୋକ୍ସ ପୁଣି ଥରେ ଆଇପିଏଲ୍ ଛାଡିପାରନ୍ତି | ଏହାର ଗୋଟିଏ କାରଣ ବିସିସିଆଇ ନିୟମ ମଧ୍ୟ ହୋଇପାରେ |

ଟେଲିଗ୍ରାଫର ଏକ ଖବର ଅନୁଯାୟୀ, ବେନ ଷ୍ଟୋକ୍ସ ଆଇପିଏଲ ୨୦୨୫ର ମେଗା ନିଲାମ ପାଇଁ ତାଙ୍କ ନାମ ଦେବା ମୂଡ଼ରେ ନାହାନ୍ତି | ସେ ଇଂଲଣ୍ଡ ଦଳର ଆଗାମୀ ଟେଷ୍ଟ ମ୍ୟାଚ୍ ପାଇଁ ଆଇପିଏଲ୍ ଛାଡିପାରନ୍ତି । ଇଂଲଣ୍ଡ ଦଳର କାର୍ଯ୍ୟସୂଚୀ ବହୁତ ବ୍ୟସ୍ତ ହେବାକୁ ଯାଉଛି। ଏହି କାରଣରୁ ସେ ଏହାକୁ ଛାଡିପାରନ୍ତି | ବାସ୍ତବରେ ବିସିସିଆଇ ଆଇପିଏଲରେ ଏକ ଗୁରୁତ୍ୱପୂର୍ଣ୍ଣ ନିୟମ ଯୋଡିଛି। ଯଦି କୌଣସି ଖେଳାଳି ନିଲାମରେ ବିକ୍ରି ହେବା ପରେ ତାଙ୍କ ନାମ ପ୍ରତ୍ୟାହାର କରନ୍ତି, ତେବେ ତାଙ୍କୁ ଦୁଇଟି ସିଜିନରୁ ବ୍ୟାନ କରାଯିବ | ଏହି ନିୟମ ପୂର୍ବରୁ, ଅନେକ ବିଦେଶୀ ଖେଳାଳି ନିଲାମରେ ବିକ୍ରି ହେବା ପରେ ସେମାନଙ୍କ ନାମ ପ୍ରତ୍ୟାହାର କରୁଥିଲେ | ଏଭଳି ପରିସ୍ଥିତିରେ ଦଳଗୁଡିକ କ୍ଷତି ସହିଥିଲେ। ତେଣୁ, ଏହା ମଧ୍ୟ ସମ୍ଭବ ଯେ ଷ୍ଟୋକ୍ସ ଏହି କାରଣରୁ ନାମ ନ ଦେବା ପାଇଁ ନିଷ୍ପତ୍ତି ନେଇଥିବେ |

ବେନ ଷ୍ଟୋକ୍ସଙ୍କର ଏପର୍ଯ୍ୟନ୍ତ ଭଲ ରେକର୍ଡ ରହିଛି। ସେ ଜଣେ ଶକ୍ତିଶାଳୀ ଅଲରାଉଣ୍ଡର ହୋଇଛନ୍ତି। ଷ୍ଟୋକ୍ସ ଏପର୍ଯ୍ୟନ୍ତ ଆଇପିଏଲରେ ୪୫ଟି ମ୍ୟାଚ୍ ଖେଳିଛନ୍ତି। ଏହି ଅବଧି ମଧ୍ୟରେ ୯୩୫ ରନ୍ ସ୍କୋର କରିଛନ୍ତି | ସେ ଏହି ଟୁର୍ନାମେଣ୍ଟରେ ୨ ଶତକ ଏବଂ ୨ଟି ଅର୍ଦ୍ଧଶତକ ହାସଲ କରିଛନ୍ତି | ଷ୍ଟୋକ୍ସ ମଧ୍ୟ ଆଇପିଏଲରେ ୨୮ଟି ୱିକେଟ୍ ନେଇଛନ୍ତି। ଷ୍ଟୋକ୍ସଙ୍କ ଶ୍ରେଷ୍ଠ ସ୍କୋର ହେଉଛି ୧୦୭ ରନ୍।