ପରାଜୟ ଭୟରେ ବିଜେଡି ମିଥ୍ୟା ବିଜ୍ଞାପନର ସାହାରା ନେଉଛି : ବିଜେପି
ଭୁବନେଶ୍ୱର: ପରାଜୟ ଭୟରେ ବିଜେଡି ଏବେ ମିଥ୍ୟା ବିଜ୍ଞାପନର ସାହାରା ନେଉଛି । କୋଟି କୋଟି ଟଙ୍କା ଖର୍ଚ୍ଚ କରି ମିଥ୍ୟା ବିଜ୍ଞାପନ ଦେଇ ଓଡିଆ ଲୋକଙ୍କୁ ଭୁଆଁ ବୁଲାଇବା ପାଇଁ ବିଜେଡି କରୁଥିବା ପ୍ରୟାସ କେବେ ସଫଳ ହେବ ନାହିଁ । ମିଛକୁ ଯେତେ ବଡ ପାଟିରେ ଚିତ୍କାର କରି କହିଲେ ମଧ୍ୟ ମିଥ୍ୟା କେବେ ସତ ହେବ ନାହିଁ କି ଓଡିଶାର ଲୋକେ ଏହାକୁ ବିଶ୍ୱାସ କରିବେ ନାହିଁ । ବାରିପଦା ମେଡିକାଲ କଲେଜରେ ନାମ ଲେଖାରେ କେନ୍ଦ୍ର ସରକାର ବାଧକ ସାଜୁଥିଲେ ବୋଲି ବିଜେଡି ଆଜି ଅନେକ ଖବର କାଗଜର ପ୍ରଥମ ପୃଷ୍ଠାରେ ବିଜ୍ଞାପନ ଦେଇଛି । ହେଲେ ବାସ୍ତବରେ କେନ୍ଦ୍ର ସରକାରଙ୍କର ଅନୁଦାନରେ ହିଁ ବାରିପଦା ସମେତ ବାଲେଶ୍ୱର, କୋରାପୁଟ, ପୁରୀ ଓ ବଲାଙ୍ଗୀରରେ ମେଡିକାଲ କଲେଜ ସ୍ଥାପନା ହୋଇପାରିଛି । ମେଡିକାଲ କାଉନସିଲ ଅଫ ଇଣ୍ଡିଆର ଏକ ଅଧା ଚିଠିକୁ ବିଜେଡି ଦେଖାଇ ନିଜର ଅପାରଗତା ଓ ବିଫଳତାକୁ ଲୁଚାଇବାର ପ୍ରୟାସ କରିଛି । ନବୀନ ବାବୁ ତାଙ୍କ ଅପାରଗତା ଓ ବିଫଳତାକୁ ଲୁଚାଇବାର ଯେତେ ପ୍ରୟାସ କଲେ ବି ଓଡିଶା ଲୋକ ସବୁ ବୁଝି ସାରିଲେଣି, ଏହାର ଜବାବ ଲୋକେ ଏବେ ଭୋଟ ମାଧ୍ୟମରେ ଦେଉଛନ୍ତି ବୋଲି ବିଜେପିର ବରିଷ୍ଠ ନେତା ପ୍ରକାଶ ମିଶ୍ର ଏକ ସାମ୍ବାଦିକ ସମ୍ମିଳନିରେ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଶ୍ରୀ ମିଶ୍ର କହିଛନ୍ତି ଶାସକ ବିଜେଡି ତାର ବିଜ୍ଞାପନରେ ଏକ ସରକାରୀ ଚିଠିକୁ ଅଧା ଦେଖାଇ ନିର୍ବାଚନ ଆଦର୍ଶ ଆଚରଣ ବିଧିକୁ ଉଲଘଂନ କରୁଛି । ରାଜ୍ୟ ମୁଖ୍ୟ ନିର୍ବାଚନ ଅଧିକାରି ଏହା ଉପରେ ବିଜୁ ଜନତା ଦଳ ଉପରେ କାର୍ଯ୍ୟାନୁଷ୍ଠାନ ନେବା ଦରକାର ।