ବ୍ଲାକମେଲ ପରେ ଆତ୍ମହତ୍ୟା କଲେ ଚାଟାର୍ଡ ଆକାଉଣ୍ଟାଣ୍ଟ

ମୁମ୍ବାଇ: ମୁମ୍ବାଇର ସାନ୍ତାକ୍ରୁଜ୍ (ପୂର୍ବ)ର ଯଶବନ୍ତ ନଗରର ଜଣେ ୩୨ ବର୍ଷୀୟ ଚାର୍ଟାର୍ଡ ​​ଆକାଉଣ୍ଟାଣ୍ଟ (ସିଏ) ଏକ ଭିଡିଓ ମାଧ୍ୟମରେ ବ୍ଲାକମେଲ୍ ହେବା ପରେ ଆତ୍ମହତ୍ୟା କରିଛନ୍ତି। ମୃତକଙ୍କ ନାମ ରାଜ ଲୀଲା ମୋରେ, ଯିଏ ବିଷ ପିଇ ଆତ୍ମହତ୍ୟା କରିଥିଲେ। ପୋଲିସ ଘଟଣାସ୍ଥଳରୁ ଏକ ତିନି ପୃଷ୍ଠାର ସୁଇସାଇଡ ନୋଟ୍ ମଧ୍ୟ ପାଇଛି, ଯେଉଁଥିରେ ସେ ତାଙ୍କ ମୃତ୍ୟୁ ପାଇଁ ଦୁଇ ଜଣ ରାହୁଲ ପରୱାନି ଏବଂ ସାବା କୁରେଶୀଙ୍କୁ ଦାୟୀ କରିଛନ୍ତି। ପୁଲିସର ସୂଚନା ଅନୁଯାୟୀ, ଜଣେ ମହିଳା ସମେତ ଦୁଇ ଅଭିଯୁକ୍ତଙ୍କ ବିରୁଦ୍ଧରେ ଟଙ୍କା ଆଦାୟ ଏବଂ ଆତ୍ମହତ୍ୟା ପାଇଁ ଉସୁକେଇବା ଅଭିଯୋଗରେ ଏକ ମାମଲା ରୁଜୁ କରାଯାଇଛି।

ପୋଲିସ ଅଧିକାରୀମାନେ କହିଛନ୍ତି ଯେ ଏହି ଦୁଇଜଣ ଗତ ୧୮ ମାସରେ ଏକ ଭିଡିଓ ଭାଇରାଲ କରିବାର ଧମକ ଦେଇ ପୀଡିତଙ୍କ ଠାରୁ ୩ କୋଟି ଟଙ୍କାରୁ ଅଧିକ ଆଦାୟ କରିଥିଲେ। ପୀଡିତଙ୍କ ମାଆ ତାଙ୍କ ବୟାନରେ କହିଛନ୍ତି ଯେ ରାଜ ଗତ କିଛି ମାସ ଧରି ମାନସିକ ଚାପରେ ଥିଲେ। ପୋଲିସ ଦ୍ୱାରା ଦାଖଲ କରାଯାଇଥିବା ଏଫଆଇଆରରେ ଉଲ୍ଲେଖ କରାଯାଇଛି ଯେ ସୁଇସାଇଡ ନୋଟରେ ରାଜ ତାଙ୍କ ମୃତ୍ୟୁ ପାଇଁ ରାହୁଲ ଏବଂ ସାବାଙ୍କୁ ଦାୟୀ କରିଛନ୍ତି।

ପୋଲିସ ସୂତ୍ର ଅନୁଯାୟୀ, ଅଭିଯୁକ୍ତମାନେ ସେୟାର ବଜାରରେ ରାଜଙ୍କ ବିପୁଳ ନିବେଶ ଏବଂ ସିଏ ଭାବରେ ତାଙ୍କର ଉଚ୍ଚ ଦରମା ପ୍ରାପ୍ତ ଚାକିରି ବିଷୟରେ ଅବଗତ ଥିଲେ। ପୋଲିସ କହିଛି ଯେ ଅଭିଯୁକ୍ତମାନେ ଭିଡିଓ ଲିକ୍ କରିବାର ଧମକ ଦେଇ ରାଜଙ୍କୁ ତାଙ୍କ କମ୍ପାନୀର ଆକାଉଣ୍ଟରୁ ଏକ ବଡ଼ ପରିମାଣର ଟଙ୍କା ନିଜ ବ୍ୟକ୍ତିଗତ ଆକାଉଣ୍ଟକୁ ସ୍ଥାନାନ୍ତର କରିବାକୁ ବାଧ୍ୟ କରିଥିଲେ। କେବଳ ଏତିକି ନୁହେଁ, ଅଭିଯୁକ୍ତମାନେ ରାଜଙ୍କଠାରୁ ଜୋରଜବରଦସ୍ତ ଏକ ବିଳାସପୂର୍ଣ୍ଣ କାର ମଧ୍ୟ ନେଇଥିଲେ। ପୋଲିସ ଏହି ମାମଲାରେ ଆତ୍ମହତ୍ୟା ପାଇଁ ଉସୁକାଇବା ଏବଂ ଟଙ୍କା ଆଦାୟର ମାମଲା ରୁଜୁ କରିଛି।