କେଉଁ ଆସନରୁ ନିର୍ବାଚନ ଲଢ଼ିବେ ପୂର୍ବତନ ମୁଖ୍ୟମନ୍ତ୍ରୀ ଚମ୍ପାଇ?

ନୂଆଦିଲ୍ଲୀ: ଝାଡ଼ଖଣ୍ଡରେ ବିଧାନସଭା ନିର୍ବାଚନ ତାରିଖ ଘୋଷଣା ହେବା ପରେ ରାଜନୈତିକ ହଲଚଲ ଦେଖିବାକୁ ମିଳିଛି | ନିର୍ବାଚନ ପ୍ରସ୍ତୁତି ସମ୍ପର୍କରେ ଦିଲ୍ଲୀରେ ବିଜେପିର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଯାଇଛି। ସେପଟେ ବିଜେପି ଭଲ ପ୍ରଦର୍ଶନ କରିବ ବୋଲି ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ଚମ୍ପାଇ ସୋରେନ ଦାବି କରିଛନ୍ତି। ପ୍ରାର୍ଥୀ ତାଲିକା ଏବଂ ବିଜେପି ବୈଠକ ସମ୍ପର୍କରେ ପଚରାଯାଇଥିବା ପ୍ରଶ୍ନର ଉତ୍ତର ମଧ୍ୟ ସେ ଦେଇଛନ୍ତି।

ଝାଡଖଣ୍ଡ ବିଧାନସଭା ନିର୍ବାଚନ ପୂର୍ବରୁ ବିଜେପି ନେତୃତ୍ୱ ସହ ବୈଠକରୁ ଫେରିବା ପରେ ଦଳର ନେତା ଚମ୍ପାଇ ସୋରେନ କହିଛନ୍ତି ଯେ ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ଏହି ବୈଠକ ହୋଇଥିଲା | ଖୁବ ଶୀଘ୍ର ପ୍ରାର୍ଥୀମାନଙ୍କ ନାମ ଘୋଷଣା କରାଯିବ | ସେହିପରି ଚମ୍ପାଇଙ୍କୁ ପଚରାଯାଇଥିଲା ଯେ ସେ କେଉଁ ଆସନରୁ ନିର୍ବାଚନ ଲଢ଼ିବେ? ଏହାର ଉତ୍ତରରେ ଚମ୍ପାଇ କହିଛନ୍ତି ଯେ ଦଳ ମୋତେ ଯେଉଁଠାରୁ ନିର୍ବାଚନ ଲଢ଼ିବାକୁ କହିବ, ସେଠାରୁ ନିର୍ବାଚନ ଲଢ଼ିବି | ପୁରା ଝାଡ଼ଖଣ୍ଡରେ ସବୁ ସ୍ଥାନରେ ଲଢ଼ିବାକୁ ପ୍ରସ୍ତୁତ ଅଛି | ଝାଡ଼ଖଣ୍ଡରେ ବିଜେପି ବହୁତ ଭଲ ପ୍ରଦର୍ଶନ କରିବ ଓ ସରକାର ଗଠନ କରିବ | 

ଅନ୍ୟପକ୍ଷରେ, ବିଜେପି ନେତୃତ୍ୱ ସହ ସାକ୍ଷାତ ପରେ ଫେରିବା ପରେ ଦଳର ରାଜ୍ୟ ସଭାପତି ବାବୁଲାଲ ମାରାଣ୍ଡି କହିଛନ୍ତି ଯେ ରାଜ୍ୟରେ ଥିବା ରାଜନୈତିକ ପରିସ୍ଥିତି ଏବଂ ଝାଡଖଣ୍ଡର ପ୍ରାର୍ଥୀଙ୍କ ବାବଦରେ ଆମେ ବିଜେପି କେନ୍ଦ୍ରୀୟ ନିର୍ବାଚନ କମିଟି ଆଗରେ ଉପସ୍ଥାପନ କରିଛୁ। ବିଜେପି ନେତା ଆହୁରି କହିଛନ୍ତି, ଆମେ କେନ୍ଦ୍ରୀୟ ନେତୃତ୍ୱଙ୍କୁ ସବୁକିଛି କହିବାକୁ ଚେଷ୍ଟା କରିଛୁ। ନିର୍ବାଚନ ପାଇଁ ଦଳ ସର୍ବଦା ପ୍ରସ୍ତୁତ ଥାଏ। ଦଳ ୩୬୫ ଦିନ ନିରନ୍ତର କାର୍ଯ୍ୟ କରେ ଏବଂ ଲୋକଙ୍କ ମଧ୍ୟରେ ରହେ  | କୌଣସି ରାଜନୈତିକ ଦଳ ଏତେ କାମ କରନ୍ତି ନାହିଁ | ଆପଣମାନେ(ଗଣମାଧ୍ୟମ ବ୍ୟକ୍ତିବିଶେଷଙ୍କୁ) ଶୀଘ୍ର ଭଲ ଖବର ପାଇବେ |