ଜାମିନ ଲାଗି ସୁପ୍ରିମକୋର୍ଟଙ୍କ ଦ୍ବାରସ୍ଥ ହେଲେ ଚିଦମ୍ବରମ୍, ମାମଲାର ତ୍ବରିତ ଶୁଣାଣି ନିଷ୍ପତ୍ତି କରିବେ ପ୍ରଧାନ ବିଚାରପତି ଗୋଗୋଇ
ନୂଆଦିଲ୍ଲୀ: ଜାମିନ ପାଇଁ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହେଲେ ପୂର୍ବତନ ଅର୍ଥମନ୍ତ୍ରୀ ପି ଚିଦମ୍ବରମ୍ । ଆଇଏନଏକ୍ସ ମିଡିଆ ଦୁର୍ନୀତି ମାମଲାରେ ୪ସପ୍ତାହରୁ ଅଧିକ ସମୟ ଧରି ଜେଲରେ ଥିବା ଚିଦମ୍ବରମ ସୁପ୍ରିମକୋର୍ଟରେ ଜାମିନ ଆବେଦନ କରିଛନ୍ତି । ଏହାସହ ଜାମିନ ମାମଲାର ଶୀଘ୍ର ଶୁଶାଣି କରିବା ପାଇଁ ଆବେଦନ କରିଛନ୍ତି । ବିଚାରପତି ଏନ ଭି ରମନ୍ନାଙ୍କ ନେତୃତ୍ୱରେ ଗଠିତ ଖଣ୍ଡପୀଠରେ ଆବେଦନ କରିଛନ୍ତି ଚିଦମ୍ବରମଙ୍କ ଓକିଲ କପିଲ ସିବଲ ।
Sambad is now on WhatsApp
Join and get latest news updates delivered to you via WhatsApp
ତେବେ ସୋମବାରଠାରୁ ଆରମ୍ଭ ହେବାକୁ ଥିବା ସପ୍ତାହ ବ୍ୟାପୀ ଦଶହରା ଛୁଟି ପୂର୍ବରୁ ତୁରନ୍ତ ଶୁଣାଣି କରିବା ପାଇଁ ସର୍ବୋଚ୍ଚ ନ୍ୟାୟାଳୟଙ୍କ ନିକଟରେ ଆବେଦନ କରାଯାଇଛି । ଏହି ଆବେଦନର ଶୁଣାଣି କେବେ ହେବ ତାହାର ନିଷ୍ପତ୍ତି ନେବାକୁ ମାମଲାକୁ ପ୍ରଧାନ ବିଚାରପତି ରଂଜନ ଗୋଗୋଇଙ୍କ ନିକଟକୁ ପଠାଇ ଦିଆଯାଇଛି ବୋଲି ଖଣ୍ଡପୀଠ କହିଛନ୍ତି । ଚିଦାମ୍ବରମ ଜାମିନରେ ଗଲେ ସାକ୍ଷୀଙ୍କୁ ପ୍ରଭାବିତ କରିପାରନ୍ତି ବୋଲି ଆଶଙ୍କା ଦର୍ଶାଇ ଦିଲ୍ଲୀ ହାଇକୋର୍ଟ ଚିଦାମ୍ବରମଙ୍କ ଜାମିନ ନାମଂଜୁର କରିଥିଲେ । ଏହାପରେ ସେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି ।
ଅନ୍ୟ ପକ୍ଷରେ ଆଜି ସ୍ୱତନ୍ତ୍ର ସିବିଆଇ କୋର୍ଟ ଚିଦମ୍ବରମଙ୍କ ହାଜତ ମିଆଦକୁ ଆଉ ୧୪ ଦିନ ପାଇଁ ବଢାଇଦେଇଛନ୍ତି । ଆସନ୍ତା ଅକ୍ଟୋବର ୧୭ ପର୍ଯ୍ୟନ୍ତ ସେ ତିହାର ଜେଲରେ ରହିବେ । ସିବିଆଇ ପକ୍ଷରୁ ସୋଲିସିଟର ଜେନେରାଲ ତୁଷାର ମେହେଟ୍ଟା ତାଙ୍କୁ ଅଧିକ ଜେରା ପାଇଁ ହାଜତ ମିଆଦ ବଢାଇବାକୁ ଯୁକ୍ତି ରଖିଥିଲେ ।
ତେବେ ଚିଦମ୍ବରମଙ୍କୁ ଘରରନ୍ଧା ଖାଦ୍ୟ ପ୍ରଦାନ କରିବାକୁ କୋର୍ଟ ଅନୁମତି ଦେଇଛନ୍ତି । ତାଙ୍କ ସ୍ୱାସ୍ଥ୍ୟ ଠିକ ରହୁ ନ ଥିବାରୁ ଘରରନ୍ଧା ଖାଦ୍ୟ ନିମନ୍ତେ ଅନୁମତି ଦେବାକୁ ଚିଦମ୍ବରମଙ୍କ ଓକିଲ କପିଲ ସିବଲ କୋର୍ଟଙ୍କ ଅନୁମତି ମାଗିଥିଲେ ।
ଗତ ୧୯ ତାରିଖରେ ସିବିଆଇ କୋର୍ଟ ଚିଦମ୍ବରମଙ୍କୁ ୧୪ ଦିନ ପାଇଁ ବିଚାରବିଭାଗୀୟ ହାଜତକୁ ପଠାଇଦେଇଥିଲେ । ଆଜି ତାଙ୍କର ହାଜତ ମିଆଦ ଶେଷ ହୋଇଥିଲା । ଗତ ଅଗଷ୍ଟ ୨୦ରେ ଚିଦମ୍ବରମଙ୍କୁ ସିବିଆଇ ଗିରଫ କରିଥିଲା ।