ଜଳ ସାଜୁଛି କାଳ: କେବେ କନ୍ଦାଉଛି କେବେ ଭସାଉଛି

କାହା ପାଇଁ ବିପତ୍ତି ତ କାହା ପାଇଁ ସମ୍ପତ୍ତି | ବନ୍ୟାର ଦୁର୍ଦ୍ଦଶାରେ କିଏ ଛଟପଟ ହେଉଛି ତ କିଏ ପୁଣି ଚାତକ ଭଳି ବର୍ଷାକୁ ଅନାଇ ବସିଛି | ଗୋଟିଏ ପଟେ ପାଣି ବିନା କିଛି ସ୍ଥାନରେ ଜମି ଫାଟି ଆଁ କରିଥିବାବେଳେ କିଛି ସ୍ଥାନରେ ବନ୍ୟା ସ୍ଥିତି ଲୋକଙ୍କ ଆଖିରୁ ନିଦ ଛଡାଇନେଇଛି | ୧୦ ଦିନ ତଳେ ନବରଙ୍ଗପୁର, କୋରାପୁଟ, ମାଲକାନଗିରି ଭଳି ଜିଲ୍ଲାରେ ବର୍ଷା ଅଭାବରୁ ଜମି ଫାଟି ଆଁ କରିଥିବାବେଳେ ବର୍ଷା ହୋଇନଥିବା ଯୋଗୁଁ ଜୁନ-ଜୁଲାଇ ମାସରେ ସେଠାକାର ଚାଷୀମାନେ ତଳି ଉପାଡ଼ି ନପାରି ରୁଆ ଏବଂ ବେଉଷାଣି କାମ ସଠିକ ସମୟରେ କରିପାରିନଥିଲେ |

ଅନ୍ୟପଟେ କିନ୍ତୁ ଉତ୍ତର ଓଡିଶାରେ ପ୍ରବଳ ବର୍ଷା ଯୋଗୁଁ ନଦୀରେ ବନ୍ୟା ଆସିଥିଲା | ଏହା ଅନେକ ଲୋକଙ୍କୁ ପ୍ରଭାବିତ କରିଥିବାବେଳେ ବାହ୍ୟ ଜଗତରୁ ବିଛିନ୍ନ କରିଦେଇଥିଲା | କେତେବେଳେ ପାଣି ଚାଷୀ ପାଇଁ ସମ୍ପତ୍ତି ଭଳି ନିହାତି ଆବଶ୍ୟକ ହୋଇପଡୁଥିବାବେଳେ କେତେବେଳେ ପୁଣି ଅତ୍ୟଧିକ ପାଣି ଲୋକଙ୍କ ପାଇଁ ବିପତ୍ତିର କାରଣ ସାଜୁଛି | 

ବର୍ତ୍ତମାନ ବାଲେଶ୍ୱର, ଯାଜପୁର ଓ ଭଦ୍ରକରେ ବନ୍ୟା ଲୋକଙ୍କ ଆଖିରୁ ନିଦ ଛଡାଇନେଇଥିବାବେଳେ ଗାଁ ଗାଁରେ ପାଣି ପଶିଛି | କେତେକ ସ୍ଥାନରେ ରାସ୍ତା ଉପରେ ପାଣି ଚାଲୁଥିବାରୁ ବାହ୍ୟ ଜଗତରୁ ବିଛିନ୍ନ ହେବାକୁ ପଡିଛି | ଓଡିଶାର କିଛି ଜିଲ୍ଲା ପାଣିରେ ଉବୁଟୁବୁ ହେଉଥିବାବେଳେ କିଛି ଜିଲ୍ଲାରେ କମ ବର୍ଷା ହୋଇଥିବାରୁ କେମିତି ହେବ ଚାଷ ତାହାକୁ ନେଇ ଚିନ୍ତାରେ ପଡିଛି ଚାଷୀ | କାରଣ ବର୍ଷା ଠିକ ଭାବେ ନ ହେଲେ ତଳିରୁଆଠାରୁ ଆରମ୍ଭ କରି ବେଉଷଣ ସବୁ ଠପ ହୋଇଯିବ | ଆଉ ଠିକରେ ବର୍ଷା ନ ହେଲେ ଚାଷୀର ବର୍ଷକର ପରିଶ୍ରମ ବୃଥାରେ ଯିବ |