ଖୋର୍ଦ୍ଧା : ବାଲୁଗାଁ ବିଜ୍ଞପିତ ଅଂଚଳ ସଫେଇ କର୍ମଚାରୀମାନେ ଆଜି ୭ ଦଫା ଦାବି ସମ୍ବଳିତ ଏକ ସ୍ମାରକପତ୍ର ଜିଲ୍ଲାପାଳଙ୍କୁ ପ୍ରଦାନ କରି ଯଥାଶୀଘ୍ର ଏହାର ସମାଧାନ କରିବାକୁ ଦାବି କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଆଜି ଅପରାହ୍ଣରେ ଜିଲ୍ଲାସ୍ତରୀୟ ଚୁକ୍ତିଭିତ୍ତିକ ଠିକା ସଫେଇ କର୍ମଚାରୀ ସଂଘର ନେତୃତ୍ୱରେ ବାଲୁଗାଁ ଏନ୍ଏସିରେ କାମ କରୁଥିବା ପ୍ରାୟ ୪୦ରୁ ଉଦ୍ଧ୍ୱର୍ ସଫେଇ କର୍ମଚାରୀ ଜିଲ୍ଲାପାଳଙ୍କ କାର୍ଯ୍ୟାଳୟ ନିକଟରେ ପହଂଚିଥିଲେ । ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ କିଛି ସମୟ ଧାରଣା ଦେବା ପରେ ଏକ ପ୍ରତିନିଧି ଦଳ ଜିଲ୍ଲାପାଳଙ୍କୁ ସାକ୍ଷାତ କରି ଦାବିପତ୍ର ଦେଇଥିଲେ । ଦାବି ସମ୍ପର୍କରେ ସୂଚନା ଦେଇ ସଂଘର ସଭାପତି ମୋହନ ନାୟକ କହିଛନ୍ତି ଯେ ବାଲୁଗାଁ ଏନ୍ଏସିରେ ଦୀର୍ଘ ଦିନ ଧରି ସଫେଇ କର୍ମଚାରୀମାନେ ଏକ ଠିକା ସଂସ୍ଥା ମାଧ୍ୟମରେ କାମ କରୁଛନ୍ତି । ମାସିକ ୩୦ ଦିନ କାମ କରୁଥିବା ବେଳେ ସେମାନଙ୍କୁ ୨୬ ଦିନର ମଜୁରୀ ପ୍ରଦାନ କରାଯାଉଛି । ୧ରୁ ୭ ତାରିଖ ମଧ୍ୟରେ ମଜୁରି ପ୍ରଦାନ କରିବା ନିୟମ ରହିଥିବା ବେଳେ ଏହି ସମୟରେ ପ୍ରଦାନ କରାଯାଉନାହିଁ । ଏନେଇ ପ୍ରତିବାଦ କଲେ ଚୁକ୍ତି ବାତିଲ କରି ଚାକିରିରୁ ଛଟେଇ କରିବାକୁ ଠିକାସଂସ୍ଥା ଧମକ ଦେଉଛନ୍ତି ।
ଏନ୍ଏସି ଓ ଠିକା ସଂସ୍ଥା ଇପିଏଫ୍ ବାବଦରେ ମଜୁରିରୁ ଟଙ୍କା କଟାଯାଉଥିବା କୁହାଯାଉଛି, କିନ୍ତୁ ଏନେଇ କୌଣସି ସଠିକ୍ ପ୍ରମାଣପତ୍ର ପ୍ରଦାନ କରାଯାଉନାହିଁ । କରୋନା ସଂକ୍ରମଣ ସମୟରେ ମାସ୍କ, ସାବୁନ୍, ହାତ ଗ୍ଲୋବ୍ ଆଦି ଦେବା ନିୟମ ରହିଥିବା ବେଳେ ସେଗୁଡ଼ିକ ପ୍ରଦାନ କରାଯାଉନାହିଁ କି ସେମାନଙ୍କ ସ୍ୱାସ୍ଥ୍ୟର ସୁରକ୍ଷା ପାଇଁ କୌଣସି ବ୍ୟବସ୍ଥା କରାଯାଉନାହିଁ ।
ସଂଘର ସହ ସମ୍ପାଦକ ସାବିତ୍ରୀ ନାୟକ କହିଛନ୍ତି ଯେ ନିକଟରେ ସମସ୍ତ ସଫେଇ କର୍ମଚାରୀ ଟିକା ନେଇଥିଲେ । ତେବେ ସେମାନଙ୍କ ମଧ୍ୟରୁ ଦୁଇଜଣଙ୍କ ମଧ୍ୟରେ ସ୍ୱାସ୍ଥ୍ୟଗତ ପ୍ରତିକ୍ରିୟା ସୃଷ୍ଟି ହୋଇଛି । ସେମାନେ କାମକୁ ଯାଇପାରୁନାହାନ୍ତି । ଏହି ସମୟରେ ସେମାନଙ୍କ ପରିବାର ଆର୍ଥିକ ସମସ୍ୟାର ସମ୍ମୁଖିନ ହୋଇଛନ୍ତି । ଏଣୁ ସେମାନଙ୍କୁ ଆର୍ଥିକ ସହାୟତା ପ୍ରଦାନ କରିବା ସହ ପରବର୍ତୀ ଚିକିତ୍ସା ପାଇଁ ମଧ୍ୟ ଜିଲ୍ଲା ପ୍ରଶାସନର ଦୃଷ୍ଟି ଆକର୍ଷଣ କରାଯାଇଛି ।