ଭାରତୀୟ ମହିଳା କ୍ରିକେଟ ଦଳର ଖେଳାଳି ତଥା ଡିଏସ୍ପି ଦୀପ୍ତି ଶର୍ମାଙ୍କୁ ଚୁନା ଲଗାଇଲେ ସାଙ୍ଗ

ନୂଆଦିଲ୍ଲୀ: ଭାରତୀୟ ମହିଳା କ୍ରିକେଟ ଦଳର ଖେଳାଳି ତଥା ଉତ୍ତରପ୍ରଦେଶ ଡିଏସ୍ପି ଦୀପ୍ତି ଶର୍ମାଙ୍କ ଘରେ ଚୋରି ହୋଇଛି। ରିପୋର୍ଟ ଅନୁସାରେ, ତାଙ୍କ ନିଜ ବନ୍ଧୁ ଆରୁଷି ଗୋୟଲଙ୍କ ଉପରେ ଏହି ଚୋରିର ଅଭିଯୋଗ ଆସିଛି। ଦୀପ୍ତିଙ୍କ ଭାଇ ସୁମିତ ଶର୍ମା ପୁଲିସକୁ ଏହି ସୂଚନା ଦେଇଛନ୍ତି। ଦୀପ୍ତି ଶର୍ମାଙ୍କ ବନ୍ଧୁ ତାଙ୍କ ସହିତ ଜୁନିଅର ଦଳରେ ଖେଳିଛନ୍ତି। ଡିସିପି ସୋନମ କୁମାର ଏହି ସମ୍ପୂର୍ଣ୍ଣ ମାମଲା ବିଷୟରେ ସୂଚନା ଦେଇଛନ୍ତି।

ଦୀପ୍ତି ଶର୍ମାଙ୍କ ବନ୍ଧୁ ଆରୁଷି ଗୋୟଲ ଦିଲ୍ଲୀର ବାସିନ୍ଦା ଏବଂ ଆଗ୍ରା କ୍ୟାଣ୍ଟ ରେଳ ଷ୍ଟେସନରେ ଜୁନିଅର କ୍ଲର୍କ ଭାବରେ କାମ କରନ୍ତି। ଦୀପ୍ତିଙ୍କ ସହ ବନ୍ଧୁତାର ସୁଯୋଗ ନେଇ, ଆରୁଷି ଛୋଟ ଛୋଟ କିସ୍ତିରେ ୨୫ ଲକ୍ଷ ଟଙ୍କା ଋଣ ନେଇଥିଲେ। କିନ୍ତୁ ଯେତେବେଳେ ଏହି ଟଙ୍କା ଫେରସ୍ତ କରିବାର କଥା ଆସିଲା, ଆରୁଷି ଗୋୟଲ ଦୀପ୍ତି ଶର୍ମାଙ୍କୁ ଠକି ଦେଲେ ଏବଂ ଟଙ୍କା ଫେରସ୍ତ କରିବାକୁ ମନା କରିଦେଲେ।

ଦୀପ୍ତି ଆରୁଷିକୁ ତାଙ୍କ ଫ୍ଲାଟକୁ ଆସିବାକୁ ମନା କରିଦେଇଥିଲେ। ଯେତେବେଳେ ସେ ବିଦେଶରେ ଥିଲେ, ଆରୁଷି ଦୀପ୍ତିଙ୍କ ଫ୍ଲାଟରୁ ଜିନିଷପତ୍ର ନେବାକୁ କହିଥିଲେ। ଯେତେବେଳେ ଦୀପ୍ତିଙ୍କ ଭାଇ ସୁମିତ ଫ୍ଲାଟରେ ପହଞ୍ଚିଲେ, ତାଙ୍କ ପାଖରେ ଥିବା ଚାବିରେ ତାଲା ଖୋଲାଯାଇ ପାରିଲା ନାହିଁ। ଏହି ଘଟଣା ପରେ ଆରୁଷି କହିଥିଲେ ଯେ ସେ ତାଲା ବଦଳାଇ ଦେଇଛନ୍ତି। ପରେ, ସିସିଟିଭି ଫୁଟେଜ୍ ରୁ ଜଣାପଡ଼ିଥିଲା ​​ଯେ ଆରୁଷି ପୂର୍ବରୁ ମଧ୍ୟ ଦୀପ୍ତିଙ୍କ ଅନୁମତି ବିନା ଫ୍ଲାଟକୁ ଯାଇଥିଲେ। ଆରୁଷିଙ୍କ ବିରୋଧରେ ଦୀପ୍ତିଙ୍କ ଫ୍ଲାଟରୁ ଅଢ଼େଇ ହଜାର ଡଲାର, ସୁନା ଅଳଙ୍କାର ଏବଂ ନଗଦ ଚୋରି କରିଥିବା ଅଭିଯୋଗ ହୋଇଛି। ଉତ୍ତରପ୍ରଦେଶ ପୁଲିସ ମାମଲା ରୁଜୁ କରି କାର୍ଯ୍ୟାନୁଷ୍ଠାନ ଆରମ୍ଭ କରିଛି।