କରୋନା ସତର୍କତା : ପ୍ଲାଟଫର୍ମ ଟିକେଟ ମୂଲ୍ୟ ୫୦କୁ ବୃଦ୍ଧି କଲା ପୂର୍ବତଟ ରେଳପଥ
ନୂଆଦିଲ୍ଲୀ : କରୋନା ସଂକ୍ରମଣ ଦୃଷ୍ଟିରୁ ଓଡ଼ିଶା ସମେତ ସାରାଦେଶରେ ସତର୍କତା ଜାରି କରାଯାଇଛି । ବିଭିନ୍ନ ଜନଗହଳିପୂର୍ଣ୍ଣ ସ୍ଥାନରେ ଭିଡ଼ କମାଇବାକୁ ପଦକ୍ଷେପ ନିଆଯାଉଛି । ରେଳ ଷ୍ଟେସନଗୁଡ଼ିକରେ ଭିଡ଼ କମାଇବାକୁ ପ୍ଲାଟଫର୍ମ ଟିକେଟର ମୂଲ୍ୟ ୫୦ ଟଙ୍କାକୁ ବୃଦ୍ଧି କରାଯାଇଛି ।
ଗତକାଲି ପଶ୍ଚିମ ଓ କେନ୍ଦ୍ର ରେଳବାଇ ପକ୍ଷରୁ ପ୍ଲାଟଫର୍ମ ଟିକେଟ ମୂଲ୍ୟ ୫୦ ଟଙ୍କାକୁ ବୃଦ୍ଧି କରାଯାଇଥିବାବେଳେ ଆଜି ପୂର୍ବତଟ ରେଳବାଇ ପକ୍ଷରୁ ମଧ୍ୟ ସମାନ ନିଷ୍ପତ୍ତି ନିଆଯାଇଛି । ପୂର୍ବତଟ ରେଳବାଇ ଅଧିନରେ ଆସୁଥିବା ୫ଟି ପ୍ରମୁଖ ତଥା ଜନଗହଳିପୂର୍ଣ୍ଣ ଷ୍ଟେସନ ଭୁବନେଶ୍ୱର, କଟକ, ପୁରୀ, ଭଦ୍ରକ, ବ୍ରହ୍ମପୁରରେ ଏହି ବର୍ଦ୍ଧିତ ଦର ଲାଗୁ ହେବ । ସେହିପରି ପୂର୍ବତଟ ରେଳପଥ ଅଧିନରେ ଆସୁଥିବା ବିଶାଖାପାଟଣା ଷ୍ଟେସନରେ ମଧ୍ୟ ଏହା ପୂର୍ବରୁ ଲାଗୁ ହୋଇସାରିଛି ।
Sambad is now on WhatsApp
Join and get latest news updates delivered to you via WhatsApp
କରୋନା ସଂକଟ ଟଳିବା ପରେ ପ୍ଲାଟଫର୍ମ ଟିକେଟ ମୂଲ୍ୟ ପୂର୍ବ ଭଳି ୧୦ ଟଙ୍କାକୁ ଫେରିଯିବ ବୋଲି ଭାରତୀୟ ରେଳ ପକ୍ଷରୁ କୁହାଯାଇଛି । ଅନ୍ୟପକ୍ଷରେ ସାରାଦେଶରେ ଷ୍ଟେସନ ଓ ରେଳଗାଡ଼ିଗୁଡ଼ିକରେ ପରିଚ୍ଛନ୍ନତା ଲାଗି ପଦକ୍ଷେପ ନିଆଯାଇଛି । ସେହିପରି ସାରାଦେଶରେ ବିଭିନ୍ନ ଟ୍ରେନକୁ ବାତିଲ କରାଯାଇଛି ।
କରୋନା ଭାଇରସ ଏବେ ବିଶ୍ୱର ୧୬୫ଟି ଦେଶରେ ପହଞ୍ଚିଥିବାବେଳେ ପ୍ରାୟ ୨ ଲକ୍ଷ ଲୋକ ସଂକ୍ରମିତ ହୋଇଛନ୍ତି ଓ ୮୫୦୦ ରୁ ଅଧିକ ଲୋକ ମୃତ୍ୟୁବରଣ କରିଛନ୍ତି । ଭାରତରେ ଏପର୍ଯ୍ୟନ୍ତ ୧୪୭ ଜଣ ସଂକ୍ରମିତ ବ୍ୟକ୍ତି ଚିହ୍ନଟ ହୋଇଛନ୍ତି ଓ ୩ ଜଣ ମୃତ୍ୟୁବରଣ କରିଛନ୍ତି ।