କଂଗ୍ରେସରୁ ମୋହ ତୁଟାଇଲେ ଅହମ୍ମଦ ପଟେଲଙ୍କ ପୁଅ

ନୂଆଦିଲ୍ଲୀ: ବରିଷ୍ଠ କଂଗ୍ରେସ ନେତା ଅହମ୍ମଦ ପଟେଲଙ୍କ ପୁଅ ଫୈସଲ ଅହମ୍ମଦ ପଟେଲ କଂଗ୍ରେସ ଦଳକୁ ଅଲବିଦା କହିଛନ୍ତି। ଫୈସଲ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ କଂଗ୍ରେସ ସହିତ ସମ୍ପର୍କ ଶେଷ କରିବା ବିଷୟରେ ଘୋଷଣା କରିଥିଲେ। ବହୁତ ଦିନ ଧରି ରିପୋର୍ଟ ଆସୁଥିଲା ଯେ ଫୈସଲ ଅହମ୍ମଦ ପଟେଲ କଂଗ୍ରେସ ଉପରେ ରାଗିଥିଲେ। କଂଗ୍ରେସ ଛାଡିବା ସମ୍ପର୍କରେ ଫୈସଲ କହିଛନ୍ତି ଯେ ବହୁତ ଯନ୍ତ୍ରଣା ଏବଂ କଷ୍ଟ ସହିତ ସେ କଂଗ୍ରେସ ପାଇଁ କାମ କରିବା ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି।

କଂଗ୍ରେସ ଛାଡିବା ବିଷୟରେ ତାଙ୍କ ଟ୍ୱିଟ୍‌ରେ ଫୈସଲ୍ ପଟେଲ କହିଛନ୍ତି- "ବହୁତ ଯନ୍ତ୍ରଣା ସହିତ, ମୁଁ କଂଗ୍ରେସ ପାଇଁ କାମ କରିବା ବନ୍ଦ କରିବାକୁ ନିଷ୍ପତ୍ତି ନେଇଛି। ଏହା ଅନେକ ବର୍ଷ ଧରି ଏକ କଷ୍ଟକର ଯାତ୍ରା ଥିଲା। ମୋର ସ୍ୱର୍ଗତ ପିତା ଅହମ୍ମଦ ପଟେଲ ଦେଶ, ଦଳ ଏବଂ ଗାନ୍ଧୀ ପରିବାର ପାଇଁ କାମ କରି ତାଙ୍କର ସମଗ୍ର ଜୀବନ ବିତାଇଥିଲେ। ମୁଁ ତାଙ୍କ ପଦାଙ୍କ ଅନୁସରଣ କରିବାକୁ ଚେଷ୍ଟା କରିଥିଲି କିନ୍ତୁ ପ୍ରତ୍ୟେକ ପଦକ୍ଷେପରେ ପ୍ରତ୍ୟାଖ୍ୟାନ କରାଯାଇଥିଲା। ମୁଁ ଯେକୌଣସି ଉପାୟରେ ଲୋକଙ୍କ ପାଇଁ କାମ କରିବି। କଂଗ୍ରେସ ଦଳ ସବୁବେଳେ ମୋର ପରିବାର ହୋଇ ରହିବ। ମୁଁ ସମସ୍ତ କଂଗ୍ରେସ ନେତା, ଦଳୀୟ କର୍ମୀ ଏବଂ ଶୁଭେଚ୍ଛୁମାନଙ୍କୁ ଧନ୍ୟବାଦ ଦେବାକୁ ଚାହେଁ ଯେଉଁମାନେ ମୋତେ ସମର୍ଥନ କରିଛନ୍ତି।" ଦିବଂଗତ କଂଗ୍ରେସ ନେତା ଅହମଦ ପଟେଲଙ୍କ ପୁଅ ଫୈସଲ ପଟେଲ ମଧ୍ୟ ପୂର୍ବରୁ ଦଳ ଛାଡିବା ନେଇ ସଙ୍କେତ ଦେଇଥିଲେ। ପ୍ରାୟ ଦୁଇ ବର୍ଷ ପୂର୍ବେ, ତାଙ୍କ ରାଜନୈତିକ ଭବିଷ୍ୟତ ବିଷୟରେ, ଫୈସଲ କହିଥିଲେ ଯେ ସେ ଅପେକ୍ଷା କରି କରି କ୍ଳାନ୍ତ ହୋଇଗଲେଣି, କିନ୍ତୁ କଂଗ୍ରେସ ନେତୃତ୍ୱ ପକ୍ଷରୁ କୌଣସି ଉତ୍ସାହ ନଥିଲା ଏବଂ ତେଣୁ ସେ ତାଙ୍କର ବିକଳ୍ପଗୁଡ଼ିକୁ ଖୋଲା ରଖିଛନ୍ତି। 

ଅହମଦ ପଟେଲ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ଦୀର୍ଘ ସମୟ ଧରି ରାଜନୈତିକ ପରାମର୍ଶଦାତା ଏବଂ ଦଳର ସଂକଟମୋଚକ ଥିଲେ। କୋଭିଡ୍ ସଂକ୍ରମଣ ପରେ ସ୍ୱାସ୍ଥ୍ୟ ସମସ୍ୟା ଯୋଗୁଁ ଅହମ୍ମଦ ପଟେଲଙ୍କର ନଭେମ୍ବର ୨୫, ୨୦୨୦ରେ ୭୧ ବର୍ଷ ବୟସରେ ଦେହାନ୍ତ ହୋଇଥିଲା। ପଟେଲ ୧୯୯୩ ମସିହାରୁ ଲଗାତାର ପାଞ୍ଚ ଥର ପାଇଁ ଗୁଜରାଟରୁ ରାଜ୍ୟସଭାର ସଦସ୍ୟ ଥିଲେ। ଏହା ପୂର୍ବରୁ ସେ ୧୯୭୭, ୧୯୮୦ ଏବଂ ୧୯୮୪ ରେ ଲଗାତାର ତିନି ଥର ଗୁଜରାଟର ଭରୁଚ ଲୋକସଭା ଆସନରୁ ସାଂସଦ ହୋଇଥିଲେ।