ବେଗୁନିଆପଡ଼ା: ଗଂଜାମ ଜିଲ୍ଲା କୋଦଳା ଥାନା ଅନ୍ତର୍ଗତ ବେରୁଆଁବାଡ଼ି ଗାଁର ଜଣେ ବ୍ୟକ୍ତିଙ୍କ ଘର ଭିତରେ ବୋମା ବିସ୍ଫୋରଣ ହୋଇଛି। ଏଥିରେ ୭ ଜଣ ଗୁରୁତର ହୋଇଛନ୍ତି। ଏମାନଙ୍କ ମଧ୍ୟରୁ ୫ ଜଣ ଗୁରୁତର ଥିବାରୁ ସେମାନଙ୍କୁ ବ୍ରହ୍ମପୁରସ୍ଥିତ ମହାରାଜା କୃଷ୍ଣଚନ୍ଦ୍ର ଗଜପତି ମେଡିକାଲ କଲେଜ ଓ ହସ୍ପିଟାଲ (ଏମକେସିଜି)କୁ ସ୍ଥାନାନ୍ତର କରାଯାଇଛି। ସେହିଭଳି ଅନ୍ୟ ୨ ଜଣଙ୍କୁ କୋଦଳା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି। ଗୁରୁତରମାନେ ହେଲେ ତ୍ରିପୁରାରୀ ବେହେରା, ଶ୍ରୀହରି ବେହେରା, ବିଷ୍ଣୁ ବେହେରା, ବଳରାମ ବେହେରା ଓ ମିଥୁନ ବେହେରା।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ଆଜି ଅପରାହ୍ନରେ କୋଦଳା ଥାନା ବେରୁଆଁବାଡ଼ି ଗ୍ରାମ ସିଅଳସାହିର ଦଣ୍ଡପାଣି ବେହେରାଙ୍କ ଘରେ ବୋମା ବିସ୍ଫୋରଣ ହୋଇଥିଲା। ଏହି ବିସ୍ଫୋରଣରେ ଦଣ୍ଡପାଣି ବେହେରାଙ୍କର ୪ ପୁଅ, ଜଣେ ଭାଇ ଓ ୨ ପୁତୁରା ଗୁରୁତର ଆହତ ହୋଇଛନ୍ତି। ସୂଚନା ପାଇ ପୁଲିସ ଓ ଦମକଳ ବାହିନୀ ଘଟଣାସ୍ଥଳକୁ ପହଞ୍ଚିଛି। ପୁଲିସ ପାରିପାର୍ଶ୍ବିକ ଅବସ୍ଥାକୁ ଦୃଷ୍ଟିରେ ଘଟଣାର ତଦନ୍ତ କରୁଛି। ଘର ଭିତରକୁ ବୋମା ଆସିଲା କେମିତି? ଦଣ୍ଡପାଣି ବେହେରା ବୋମା କାରବାର କରୁଥିଲେ କି ଏସବୁ ଉପରେ ସନ୍ଦେହ କରୁଛି ପୁଲିସ।