ବଡ଼ ଧନୀରୁ ଦେବାଳିଆ: ଅନିଲଙ୍କ ପତନ କାହାଣୀ

ମୁମ୍ବାଇ: ଅନିଲ ଅମ୍ବାନି ହେଉଛନ୍ତି ଧୀରୁଭାଇ ଅମ୍ବାନିଙ୍କ ସାନପୁଅ। ୨୦୦୨ରେ ଧୀରୁଭାଇ ଅମ୍ବାନିଙ୍କ ମୃତ୍ୟୁ ପରେ ବଡ଼ଭାଇ ମୁକେଶ ଓ ସେ ବାପାଙ୍କ ସାମ୍ରାଜ୍ୟକୁ ମିଶିକରି ଚଳାଉଥିଲେ। କିନ୍ତୁ ସେମାନଙ୍କ ମଧ୍ୟରେ ବିବାଦ ଦେଖାଦେବାରୁ ୨୦୦୫ ମସିହାରେ ସଂପତ୍ତିକୁ ଦୁଇ ଭାଇ ବାଣ୍ଟି ନେଇଥିଲେ। ମୁକେଶଙ୍କ ପାଖରେ ପ୍ରମୁଖ କମ୍ପାନି ପେଟ୍ରୋଲିୟମ ବ୍ୟବସାୟ ରହିଥିବାବେଳେ ଅନିଲଙ୍କ ହାତରେ ଟେଲିକମ, ଶକ୍ତି, ଆର୍ଥିକ ସେବା ଭଳି ନୂଆ ନୂଆ କମ୍ପାନି ରହିଥିଲା। ଏହା ସତ୍ତ୍ବେ ୨୦୦୮ ମସିହାରେ ଅନିଲ ଅମ୍ବାନି ବିଶ୍ବର ଷଷ୍ଠ ଧନୀ ବ୍ୟକ୍ତି ଭାବେ ବିବେଚିତ ହେଉଥିଲେ। କିନ୍ତୁ ତାହାପରଠାରୁ ତାଙ୍କର ବେଳା ଭଲ ଚାଲିନାହିଁ। ଉଭୟ ଆର୍ଥିକ ଏବଂ ଆଇନଗତ ଦିଗରୁ ସେ ବିଭିନ୍ନ ମାମଲାରେ ଫସିଛନ୍ତି। ୟୁପିର ଦାଦ୍ରିରେ ଗ୍ୟାସଭିତ୍ତିକ ମେଗା ଶକ୍ତି ପ୍ରକଳ୍ପ ସ୍ଥାପନ ପାଇଁ ଅନିଲ ଉଦ୍ୟମ କରିଥିଲେ ମଧ୍ୟ ୨୦୦୯ ମସିହାରେ ଆହ୍ଲାବାଦ ହାଇକୋର୍ଟ ସେହି ଜମି ଅଧିଗ୍ରହଣକୁ ବାତିଲ କରି ଦେଇଥିଲେ। ଏଥିସହିତ ଅନ୍ୟାନ୍ୟ ବ୍ୟବସାୟ କ୍ଷେତ୍ରରେ ମଧ୍ୟ ସେ ସେତେଟା ସଫଳତା ପାଇ ନଥିଲେ।

ରିଲାଏନ୍ସ କମ୍ୟୁନିକେସନ୍ସର ଋଣ ବୋଝ ବଢ଼ିଚାଲିଲା। ୨୦୧୯ ମସିହାରେ ଏହି କମ୍ପାନିଙ୍କୁ ଦେବାଳିଆ ପ୍ରକ୍ରିୟା ଭିତରକୁ ଟଣାଗଲା। ସେହିବର୍ଷ ଏରିକ୍‌ସନ୍‌କୁ ୫୫୦ କୋଟି ଟଙ୍କା ପ୍ରଦାନରେ ବିଫଳ ହେଲେ ତାଙ୍କୁ ଜେଲ୍‌ ପଠାଯିବ ବୋଲି ସୁପ୍ରିମକୋର୍ଟ ରାୟ ଦେଇଥିଲେ। କିନ୍ତୁ ଶେଷ ମୁହୂର୍ତ୍ତରେ ବଡ଼ଭାଇ ମୁକେଶ ତାଙ୍କୁ ସହଯୋଗର ହାତ ବଢ଼ାଇ ଅର୍ଥ ପ୍ରଦାନ କରିବାରୁ ଅନିଲ ଜେଲ୍‌ ଯିବାରୁ ବର୍ତ୍ତି ଯାଇଥିଲେ। ଚୀନର ଏକ ବ୍ୟାଙ୍କକୁ ୬୮୦ ନିୟୁତ ଡଲାର ଋଣ ପରିଶୋଧ ନ କରିବାରୁ ଲଣ୍ଡନର ଏକ ଅଦାଲତରେ ସେହି କମ୍ପାନି ମାମଲା ରୁଜୁ କରିଥିଲା। ୨୦୧୨ ମସିହାରେ ରିଲାଏନ୍ସ କମ୍ୟୁନିକେସନ୍ସ ଉକ୍ତ ଋଣ ଆଣିଥିଲା। ଏହି ମାମଲାର ସମାଧାନ ମଧ୍ୟ ବର୍ତ୍ତମାନ ସୁଦ୍ଧା ହୋଇନାହିଁ। ୨୦୨୧ ମସିହାରେ ରିଲାଏନ୍ସ କ୍ୟାପିଟାଲ ୨୪ ହଜାର କୋଟି ଟଙ୍କାର ବଣ୍ଡ୍‌ ପରିଶୋଧ କରି ନପାରି ଦେବାଳିଆ ମାମଲା ଆବେଦନ କରିଥିଲା। ଏଥିସହିତ ଗ୍ରୁପର ଅନ୍ୟ କେତେକ କମ୍ପାନିରେ ମଧ୍ୟ ସେ ସମାନ ପରିସ୍ଥିତିର ସାମ୍ନା କରୁଛନ୍ତି। ଏଭଳି ସ୍ଥିତିରେ ତାଙ୍କ ବିରୋଧରେ ସେବି ବଡ଼ କାର୍ଯ୍ୟାନୁଷ୍ଠାନ ନେଇ ସେୟାର ବଜାରରୁ ୫ ବର୍ଷ ପାଇଁ ବାରଣ କରିବା ସହିତ ୨୫ କୋଟି ଟଙ୍କାର ଜରିମାନା ଲଗାଇଛି। ତେଣୁ ବ୍ୟବସାୟ ଦୁନିଆରେ ଅନିଲ ଅମ୍ବାନି ଗତ ଦୁଇ ଦଶନ୍ଧି ମଧ୍ୟରେ ଉତ୍‌ଥାନ ଓ ପତନ ଦେଇ ଗତି କରୁଛନ୍ତି।